आकाश भ गेल साफ, स्पाइस जेट आ इंडिगो शुरु करत दरभंगा स सेवा

कुमुद सिंह
पटना । सबकिछु ठीक रहल त अगिला सप्ताह तक दरभंगा स विमान सेवा शुरु करबा लेल इच्छुक विमान कंपनी कए लेटर आफ  एवार्ड इस्यू भ जायत। दरभंगा नगर विधानसभा क्षेत्रक विधायक संजय सरावगी इ जानकारी दैत दावा केलथि अछि जे एहि साल प्रवासी मैथिल गर्मी छुट्टी मे दरभंगा विमान स आबि सकताह।
एयरपोर्ट लेल नव टर्मिनल क कार्य शीघ्र शुरु होएत। एकरा लेल 50 एकड़ जमीन सेहो अधिग्रहित भ चुकल अछि। 6 मासक भीतर स्पाइस जेट या इंडिगो दरभंगा एयरपोर्ट स देश क तीनटा शहर दिल्ली,मुंम्बई आ बेंगलुरु लेल सीधा विमान सेवा शुरु क देत।
उल्लेखनीय अछि जे नागरिक विमानन सचिव आर एन चैबे और एयरपोर्ट ऑथरिटी ऑफ  इंडिया के अधिकारीक संग बुधदिन बिहार भवन, नई दिल्ली मे उपमुख्यमंत्री सुशील कुमार मोदी कए बैसार भेल। बैसारक बाद मोदी कहला जे दरभंगा स उड़ान योजना क तहत अगिला छह माह मे मुम्बई, बंगलुरू आ दिल्ली लेल विमान सेवा प्रारंभ भ जायत। एकर समीक्षा लेल एकटा उच्चस्तरीय टीम 24 जनवरी कए पटना आबि रहल अछि। पटना एयरपोर्ट क नव टर्मिनल क काज सेहो अप्रैल स प्रारंभ भ जायत।
ओ कहला जे दू विमानन कम्पनी स्पाइस जेट आ इंडिगो दरभंगा स मुम्बई, बंगलुरू आ दिल्ली क सेवा लेल निविदा देलक अछि। एयरफोर्स क अधीन दरभंगा एयरपोर्ट पर टर्मिनल भवन आ प्रवेश लेल सरकार जमीन उपलब्ध करा देलक अछि।
जेना कि अपने कए पता अछि जे दरभंगा एयरपोर्ट शुरु करबा लेल बहुत दिन स आंदोलन चलि रहल छल। एहि ठाम स विमानसेवा 1950 स 1962 धरि चालू छल। ओकर बाद छोट मोट प्रयास भेल मुदा ओ सफल नहि भ सकल। दरभंगा स विमान सेवाक उम्मीद तखन जागल जखन केंद्र क मोदी सरकार छोट शहर लेल उडान योजना अनलक। उड़ान योजनाक पहिल किश्त मे दरभंगा नहि आयल मुदा दोसर किश्त मे दरभंगा आ किशनगंज कए शामिल कैल गेल। जाहि स हवाई सेवा शुरू हेबाक उम्मीद बढि़ गेल। दरभंगा मे विमान सेवाक संभावना एतबा छल जे तीनटा विमानन कंपनी बिना कोनो सरकारी छूट लेने दरभंगा स विमान सेवा शुरु करबा लेल आवेदन द देलक।
एयरपोर्ट ऑथोरिटी ऑफ इंडिया (एएआइ) दिस स आरसीएस या उड़ान योजना लेल जे 141 रूट क सूची जारी भेल अछि ओहि मे दरभंगा स दिल्ली संग मुंबई आ बेंगलुरु शामिल अछि।
केंद्र सरकार दूनू एयरपोर्ट पर नव टर्मिनल भवन, एटीसी आ अन्य जरूरी सुविधा लेल 100-100 करोड़ टका खर्च करत। पटना आ  कोलकाता एयरपोर्ट आ डीजीसीए क विशेषज्ञ क एकटा टीम एहि दूनू ठामक दौरा सेहो केलक अछि।
आरसीएस : 1
पटना-बोकारो 274 किमी
बोकारो-पटना 269 किमी
आरसीएस :  2
पटना-इलाहाबाद 343 किमी
इलाहाबाद-पटना 343 किमी
आरसीएस : 3
पटना-जमशेदपुर 359 किमी
जमशेदपुर-पटना 363 किमी
आरसीएस  4
दरभंगा-आइजीआइ एयरपोर्ट दिल्ली976 किमी
आइजीआइ  एयरपोर्ट दिल्ली-दरभंगा972 किमी
आरसीएस : 5
दरभंगा-बेंगलुरु 1737 किमी
बेंगलुरु-दरभंगा 1758 किमी

नीक वा अधलाह - ज़रूर कहू जे मोन होय

comments