नहि रहलाह मधुबनीक “राजकुमार”

0
70
मधुबनी।  पूर्व मंत्री राजकुमार महासेठ (८७वर्ष) क शनि दिन निधन सँ मधुबनी शोकाकुल भय गेल। दूपहर करीब एक बजे बैचेनी क शिकायत पर हुनका मंगरौनी अवस्थित हार्ट अस्पताल पहुँचाओल गेल जतय डाक्टर हुनका मृत घोषित कयलन्हि।ई समाचार सुनितहिंँ शहरवासी शोकाकुल भय हुनक आवास परिसर दिश दौड़लाह । हुनक ज्येष्ठ पुत्र मधुबनी विधानसभा क्षेत्रक वर्तमान विधायक श्री समीर कुमार महासेठ क निर्णयानुसार हुनक अन्त्येष्ट मधुबनी- पंडौल मुख्य मार्ग क समीप अवस्थित हुनक निजी वाग मे आई रवि दिन सम्पन्न भेल।
हुनक निधन पर भाजपा सांसद हुकुमदेव नारायण यादव, सांसद वीरेंद्र चौधरी, राजद विधायक डॉ फैयाज अहमद, विधान पार्षद, रामलखन राम रमण, जदयू क राष्ट्रीय महासचिव संजय कुमार झा, पूर्व मंत्री देवेंद्र यादव, पूर्व विधायक रामनरेश पांडे, पूर्व एमएलसी विनोद सिंह, समाजसेवी हितेंद्र नारायण ठाकुर, जदयू के मुन्ना चौधरी, जदयू सेवादल क प्र्रदेश महासचिव प्रफुल्ल कुमार ठाकुर, युवा जदयू क राष्ट्रीय सचिव रंजीत कुमार झा संवेदना व्यक्त करैत हुनका महान समाजसेवी आ मजदूर किसान क हितैषी नेता जनौलनि।   दिवंगत नेता क प्रति भाजपा जिला अध्यक्ष घनश्याम ठाकुर, देवेंद्र कुमार यादव, शंकर झा, सुनील कुमार मिश्र, डाक्टर पी के झा, नवीन जायसवाल, शशिनाथ चौधरी, सीपीआई मिथिलेश कुमार झा, श्रवण पूर्वे,राजश्री किरण, प्रह्लाद पूर्वे,प्रणव पंजियार, राजेश मिश्रा, पूर्व विधायक रामकुमार यादव,आंन्द मोहन,नंद कुमार मंडल, फूलहसन अंसारी, इत्यादि अपन संवेदना व्यक्त कयलनि।
मुख्यमंत्री श्री नीतीश कुमार पूर्व मंत्री राजकुमार महासेठ क निधन पर संवेदना व्यक्त करैत हुनका प्रख्यात राजनेता आ समाजसेवी जनौलन्हि आ कहलनि जे ओ मिथिलांचल के विकास हेतु सतत प्रयत्नशील छलाह,हुनकर निधन सँ सामाजिक राजनीतिक क्षेत्र मे अपूर्णीय क्षति भेल अछि। मुख्यमंत्री तथा उपमुख्यमंत्री श्री सुशील कुमार मोदी फोन पर विधायक श्री समीर कुमार महासेठ केँ सान्त्वना देलैन। पूर्व मंत्री अपन परिवार मे दू पुत्र-रत्न विधायक श्री समीर कुमार महासेठ आ ई. संजीव कुमार महासेठ,बड़की पुत्री प्रो. श्रीमती कविता नायक, दोसर पुत्री कल्पना कुमारी,तेसर कल्याणी कुमारी आ कीर्ति कुमारी केँ छोडि दिवंगत भेलाह।
पूर्व मंत्री राजकुमार महासेठ क परिवार पारंपरिक रूपेँ प्रतिष्ठित व्यवसायिक पृष्ठभूमिक अछि।हिनक पिता स्व. राम अवतार महासेठ मधुबनी क प्रतिष्ठित व्यवसाई आ मधुबनी नगरपालिका क चेयरमैन छलाह।हिनक प्रारंभिक शिक्षा गोकुल मथुरा सूड़ी स्कूल संँ मैट्रिक, आरके कालेज सँ१९५० ई. मे इंटर आ वाणिज्य क स्नातकोत्तर शिक्षा हिन्दू विश्वविद्यालय वाराणसी से तदनन्तर दरभंगा से कानून क शिक्षा प्राप्त कय मधुबनी वार एसोसियेशन मे वकालत शुरू कयलनि आ शीघ्रे इनकम टैक्स आ सेल्स टैक्स क प्रतिष्ठित वकील मे हिनक गनती होबय लागल। हिनक राजनीतिक जीवन  बीएचयू से एक छात्र नेता क रूपेँ शुरू भेल।१९६६ सँ१९७८ तक ओ एम एल सी आ१९६३ से१९७७ धरि नगरपालिका क चेयरमैन पद पर रहलाह। १९८०मे ओ लोकदल क टिकट पर चुनाव लड़ि विधायक बनलाह। १९९० मे ओ निर्दलीय प्रत्याशी क रूपेँ जीत हासिल कयलनि आ उद्धव सिंचाई क अध्यक्ष बनलाह। १९९५ मे राजदक टिकट पर चुनाव जीत पशु पालन मंत्री बनलाह।
सर्व. महासेठ दरभंगा-राजकुमार स्व जीवेश्र्वर सिंह के सहपाठी छलाह आ इप्टा क मधुबनी चैप्टरक मुख्य संरक्षक छलाह। २७ मार्च २०१८ केँ इसमाद द्वारा लगाओल गेल २०० वर्षक फ़ोटो प्रदर्शनी मे अपन बहुतो पुरान घटना सबहक चर्चा कयलनि। दिवंगत पूर्व मंत्री के अंतिम संस्कार हुनक आवास सँ प्रारंभ भय हिनक महिंद्रा एजेंसी क समीप हिनक पुश्तैनी कलमवाग मे भेल। मुखाग्नि हिनक ज्येष्ठ पुत्र श्री समीर कुमार महासेठ देलखिन।एहि महायात्रा मे शहर आ हिनक चुनाव क्षेत्रसँ सब वर्गक लोक , पदाधिकारी, व्यापारी, संबंधी, जनप्रतिनिधि, राजनेता सम्मिलित भेलाह। राज्यकीय सम्मानक संग हिनका अंतिम विदाई देल गेल।

Comments

comments