फिल्म पद्मावती क शूटिंग लेल बिहार भ रहल तैयार

अपन विशाल यूनिट संग फरवरी मे अउताह भंसाली 
padmavatiहाजीपुर । बॉलीवुड मे बिहार क कहानी त सबदिन मांग मे रहल, मुदा बिहार मे शूटिंग क मांग पर बिहार क निर्माता आ निर्देशक तक नाक भौं सिकुरा लैत छथि। मुदा निर्माता-निदेशक संजय लीला भंसाली अपन आगामी फिल्म पद्मावती क शूटिंग बिहार मे करबाक तैयारी मे जुटल छथि। पद्मावती एक बेर फेर बिहार क एकटा नव छवि गढ़त, जे पिछला 15-17 साल क स्थापित छवि स अलग होएत। बच्चू यादवक बिहार एक बेर फेर हीरामन क बिहार बनत। सैकड़ा स बेसी हाथी आ हजार घोड़ा जखन वैशालीक युद्ध क मैदान मे इतिहास कए जीवंत करत त बिहार सिनेमाई परदा पर लोकेशनक नव हीरो क रूप मे सामने आउत। भंसाली कहैत छथि जे कहानीक मांग कए वैशाली पूरा करैत अछि। बिहार मे जाकर सिनेमा बनेबा पर हो कहैत छथि जे इ सब हुनका लेल एकटा रोमांच अछि।
वैशाली क ऐतिहासिक धरती पर पद्मावती क शूटिंग क जोर-शोर स तैयारी चलि रहल अछि। उम्मीद अछि जे फरवरी में फिल्म यूनिट बिहार आउत आ किछु दिन वैशाली क जमीन पर शूटिंग होएत। फिल्म में रणवीर सिंह और दीपिका पादुकोण लीड रोल मे छथि। खास बात अछि जे बिहार मे एकटा पैघ वजट क पीरियड फिल्म क शुटिंग हेबा स बिहार खास क तिरहुत क धरोहरक प्रति आम लोक मे धारणा बदलत।
अलाउद्दीन खिलजी क आक्रमण क दौरान जौहर करनिहारि चित्तौड़ क महारानी पद्मावती क कथा पर आधारित एहि सिनेमाक एकटा बेहद महत्वपूर्ण युद्ध दृश्य एहि ठाम फिल्माउल जाएत। सगहि किछु गीत आ संवाद सेहो एहि ठाम शूट होयत।  स्थानीय प्रबंधक लेल एकटा चुनौति अछि जे एहि शूटिंग लेल सैकड़ा स बेसी संख्या में हाथी आ घोड़ा क व्यवस्था करब। किया कि भसाली युद्ध मे जीवंतता देबा लेल कोनो समझौता करबा लेल तैयार नहि होइत छथि।
शूटिंग लेल आन इंतजाम क संग संग सुरक्षाक सेहो पुख्ता व्यवस्था कैल जा रहल अछि। स्थानीय प्रबंधन देख रहल यूनिट क सदस्य कहला जे यूनिट लेल हाजीपुर क एकटा होटल कए बुक कैल गेल अछि। प्रोडक्शन स जुड़ल टीम लोकेशन सबहक निरीक्षण क चुकल अछि।
एहि संबंध मे सदर एसडीपीओ राशिद जमां कहला अछि जे पुलिस प्रशासन कए एहि संबंध में सूचना भेटल अछि। पूरा यूनिट कए प्रयाप्त सुरक्षा मुहैया कराउल जाएत।
उल्लेखनीय अछि बिहार क कहानी पर आधारित पैघ वजट क सिनेमा क शूटिंग तक बिहार मे नहि होइत अछि। निर्माता-निर्देशक प्रकाश झा लग इ मांग कई बेर उठाउल गेल मुदा ओ बिहार क सेट कहियो भोपाल त कहियो पुणा लग बना लैत छथि। जखन कि बिहार मे सब तरहक कहानी लेल नीक लोकेशन क कमी नहि अछि मुदा कोनो बिहारी कए ओहि लोकेशनक जरुरत महसूस नहि होइत अछि। एखन मे एहि शूटिंग स बिहार मे रोजगारक एकटा नव अध्याय खुलबाक संभावना प्रबल बनि रहल अछि। उम्मीद करि जे वैशाली स पूरा यूनिट संतुष्ट भ लौट एकटा सुपर हिट फिल्म तैयार करै जाहि स आन फिल्मकार सेहो एहि ठाम शूटिंग करबा लेल प्ररित होइथि।

नीक वा अधलाह - ज़रूर कहू जे मोन होय

comments