मुंगेर क रनवे तैयार, बिहटा क मापी पूरा

Mungair Runwayपटना । केंद्र सरकार क नव विमानन नीति एलक बाद वायुसेवाक क्षेत्र मे उपेक्षित रहल बिहार सन राज्य मे एकटा नव उम्मीद जगल अछि।  मुंगेर आ रक्सौल सन छोट-छोट रनवे कए मरम्मत कैल जा रहल अछि। संगहि गया बिहटा सन पैघ रनवे वाला एयरपोर्ट क विस्तार क प्रक्रिया तेज कैल गेल अछि।

बेगूसराय, रक्सौल, गोपालगंज समेत कईटा रनवे पर मरम्मत क काज चालू अछि। सब किछु ठीक रहल, त शीघ्र सफियाबाद हवाई अड्डा स हवाई जहाज उड़ान भरत। मुंगेर स हवाई सेवा प्रारंभ करबा लेल सफियाबाद हवाई अड्डा क कायाकल्प कैल जा चुकल अछि। मुंगेर रनवे करीब आठ करोड खर्च भेलाक बाद छोट विमान क परिचालन लेल तैयार भ गेल अछि। पिछला सप्ताह मुख्यमंत्री एहि नवनिर्मित रनवे कए लोकार्पित केलथि। मुंगेर जिला प्रशासन क कहब अछि जे शीघ्र एहि एयरपोर्ट कए ऑथोरिटी कए सौंपल जायत। दोसर दिन बिहटा कए पटना एयरपोर्ट क विकल्प बनेबाक प्रयास जारी अछि। बिहटा एयरबेस कए वायुसेना सिविल एविएशन लेल देबाक फैसला क लेलक अछि। नागर विमानन मंत्रालय बिहटा स अंतरराष्ट्रीय उडान शुरु करबा लेल करीब 120 एकड जमीन क मांग प्रशासन स केने छल। मांग क संग तीनटा नक्शा सेहो उपलब्ध करेने छल। जिला प्रशासन आहि मे स एकटा नक्शा अनुसार जमीन क नापी पिछला दू दिन मे संपन्न क सोमदिन जिला अधिकारी कए सौंप देल गेल। ऑथिरिटी क जरुरत क हिसाब स तीनटा गाम क कुल 120 एकड जमीनक मापी कैल गेल अछि। डीसीएलआर बृंदा लाल क नेतृत्व मे भेल एहि मापी मे एहि गप क ख्याल राखल गेल जे एयरपोर्ट विस्तार लेल जे जमीन अधिग्रहित होएत ओहि स ककरो घर नहि क्षतिग्रस्त होई। सीओ रघुवीर प्रसाद संग करीब एक दर्जन अमीन आ अधिकारी एहि काज मे लागल छलाह। सीओ रघुवीर प्रसाद कहला जे विशंभरपुर, कुतलुपुर और दोघडा गामक बधार क किछु हिस्सा मापी मे आयल अछि। मापी क रिपोर्ट केंद्र कए पठाउ जाएत, ओकर बाद अधिग्रहण लेल कार्रवाई शुरु होएत। उल्लेखनीय अछि जे इसमाद अपने लोकनि कए पहिने एहि संदर्भ मे समाद द चुकल अछि जे बिहार मे प्रस्तावित अंतरजिला हवाईसेवा लेल एयरपोर्ट आ रनवे क मरम्मत क काज जारी अछि। भागलपुर एयरपोर्ट क मरम्मत पहिने संपन्न भ गेल छल। मुंगेर आ बेगूसराय क लोक क हवाई सफर क सपना सेहो जल्द साकार होए जा
रहल अछि।

सफियाबाद हवाई अड्डा स हवाई सेवा आरंभ करबा लेल रनवे क लंबाई-चौड़ाई आओर बढ़ा देल गेल अछि। 10 सीटर हवाई जहाज लेल सुरक्षित लैंडिंग आ टेकऑफ लेल कम स कम तीन हजार वर्ग फुट जमीन पर रनवे तैयार कैल गेल अछि। पहिने इ 2520 वर्ग फुट क दायरा मे छल । बेगूसराय कए सेहो हवाई मार्ग स जोडबा लेल स्थानीय एयरपोर्ट क मरम्मत क काज जारी अछि।

नीक वा अधलाह - ज़रूर कहू जे मोन होय

comments