कानून बनाकए स्कूल मे मोबाइल बैन करनिहार पहिल देश बनल फ्राँस

0
6

93% बच्चा मोबाईल लाबय छलथि, एहिसँ रिजल्ट 10% घटैत अछि
एहि शैक्षणिक सत्र सँ बैन लागू होएत, शिक्षकक मोबाइल व्यवहार पर सेहो पाबंदी रहत

समदिया

देश विदेश । अपन सबहक देशक चुनाव सबमे अक्सर टॉपर बच्चाक मोबाईल, लैपटॉप देनाई अहम एजेंडा रहैत अछि । जखन कि दुनियाँ क एकटा एहनों देश अछि जे अपन टॉपर्स कए गैजेट सबसँ दूर रखबाक प्रयास कए रहल अछि, ताकि टॉपर्स टॉप पर सतत बनल रहथि । ई देश अछि : फ्राँस । फ्राँस एहन पहिल देश बनल जे कानून बनाकए स्कूल सबमे बच्चाक मोबाईल अननाई बैन कए रहल अछि । देशक कानून निर्माण कमिटि एहि प्रस्ताव कए पास कय चुकल अछि । अगस्त-सितंबर सँ शुरु होए वला नबका सत्र सँ ई फ्राँस क सब स्कूल मे लागू भए जाएत । फ्रेंच एजेंसी ऑफ रेग्युलेटिंग टेलिकम्युनिकेशन क एकटा रिपोर्ट क अनुसार – 12 सँ 17 सालक 93% बच्चा मोबाईल लए कए स्कूल जाईत छथि, जखन कि 2005 मे ई आँकड़ा 72% छल । आब ई नबका कानून बच्चाक संगे शिक्षक पर सेहो लागू होएत। फ्राँस क शिक्षाविद स्कूल मे मोबाईल बैन करेबाक अपील करैत रहय छलथि । हुनक कहनाए छलनि – बच्चा सब क्लास में सेहो मोबाईल क इस्तमाल करैत रहय छथि। पीसा एजुकेशन इंडिकेटर क मोताबिक – शिक्षाक गुणवत्ता मे फ्राँस क रैंकिंग पछिला 5 साल मे 5 पायदान खसल अछि । एहि क पाछू क्लास मे बच्चाक द्वारा मोबाईल व्यवहार सेहो जिम्मेदार अछि । एहि क देखैत पछिला साल फ्राँस क आमचुनाव मे राष्ट्रपति इमैनुएल मैक्रो स्कूल मे मोबाईल बैन करेबाक वादा केने रहथि । हालांकि आब एतय विपक्ष क कहनाम छनि जे एतेक पैघ स्तर पर बैन लागू कए सकनाई संभव नहिं अछि । फ्राँस मे करीब 51 हजार प्राईमरी आ 7 हजार मिडिल स्कूल अछि । एहिमे सँ करीब 29 हजार स्कूल सब अपन-अपन स्तर सँ कैंपस मे मोबाईल बैन केने छल । आब नव कानून क तहत स्कूल सभकए ई जिम्मेदारी देल जायत जे ओ अपन कैंपस मे एहिक पालन सुनिश्चित करथि।

एक दिन मोबाईल आनय स एक सप्ताह स्कूल नहि एनाए जतेक नुकसान होईत अछि

की वाकई मे बच्चाक एकेडमिक प्रदर्शन आ हुनक मोबाईल लए कए स्कूल आबय के कोनो संबंध अछि? जवाब ताकय लेल लंदन स्कूल आफ इकोनॉमिक्स किछु समय पहिने एकटा शोध केने छल । नतीजा निकलल छल जे जाहि स्कूल सभ मे मोबाईल अननाए बैन अछि, ओतय बच्चाक प्रदर्शन 6 स 10% नीक रहैत अछि । एहि अध्ययन टीमक नेतृत्वकर्ता रिसर्चर रिचर्ड माफी कहय छथि । बेशक मोबाईल आ आन गैजेट पढ़ाई क नव तरीका सभकए हिस्सा अछि मुदा स्कूल मे मोबाईल आनय स बच्चाक ध्यान भटकि रहल अछि । एहि रिसर्च के हिसाब सँ – “क्लास मे मोबाईल आनय स बच्चाक एक दिन मे ओतेक नुकसान होएत अछि जतेक एक सप्ताह स्कूल नहिं आबय सँ होएत अछि।”

Please Enter Your Facebook App ID. Required for FB Comments. Click here for FB Comments Settings page