विश्व भरि मे परचम लहरा रहलीह मैथिल ललना

मैथिली ठाकुर आ श्रुति झा पर अछि गर्व

मिथिलाक बेटी मैथिली ठाकुर आ श्रुति झा द्वारा फहराओल गेल परचम सं मिथिलाक माथ एक बेर फेर स उंच भए गेल अछि । जतए मैथिली ठाकुर रियलीटी शो राइजिंग स्टार क पहिल राउंड मे जीत दर्ज केने छथि । ओतहि दोसर दिस श्रुति झा माइलस्टोन मिसेज इंडियाक ताज अपना नाम क माता पिताक संग संग समस्त मिथिला वासीक नाम जगजगार क देलनि । ओमहर एहि बीच पटना क निवासी संदीप दास कए सेहो ग्रैमी एवार्ड स नवाजल गेल अछि । ई तीनू खबैर स एक बात त स्पष्ट अछि जे अपन प्रतिभाक दम पर मैथिल आ बिहारी नेना विश्व भरि मे अपन झंडा गारि रहल छथि ।

मैथिली ठाकुर
Maithili Thakur 3मैथिली ठाकुर मूल रूप स मिथिलाक मधुबनी जिलाक बेनीपट्टी प्रखण्ड अंतर्गत उड़ेन क रहनिहारि छथि । मैथिलीक अनुसार संगीतक ज्ञान हुनका अपन बाबा बच्चा ठाकुर आ पिता रमेश ठाकुर स प्राप्त भेल अछि। घर मे संगीतक वातावरण हेबाक कारणे ओ सदैव आगा बढैत गेलीह । उल्लेखनीय अछि जे अपन प्रतिभाक दम पर ओ कतेको रियलीटो शो मे स्थान पाबि चुकल छथि। एहि स पहिने ओ इंडियन आइडियल जूनियर-2015, सारेगामापा क मंच पर जेबा मे सफल रहली अछि। एमहर जखन हुनकर चयन राइजिंग स्टार लेल भेल त लागल जेना सोशल मीडियाक मैथिली समाजक बीच जेना क्रांति आबि गेल । मैथिली कए जीतेबा लेल लोक विशेष तरहक अभियान चलौलनि । परिणाम स्वरूम मैथिली पहिल राउंड में 94 प्रतिशत भोट आनि अगिला राउंड मे प्रवेश केलथि । भवि‍ष्य मे मैथिली हारथु वा जितथु मुदा ओ अपन प्रतिभाक दम पर लोकक हृदय में स्थान बनेबा मे सफल रहली अछि ।

श्रुति झा
Shruti Jha4अमेरिका मे रहनिहार श्रुति झाक पुश्तैनी घर दरभंगा क मंगरौनी मे अछि । श्रुति झा देश- विदेश क प्रतिभागी कए पाछॉं छोड़ैत माइलस्टोन मिसेज इंडिया क ताज अपन नाम क कए संपूर्ण मिथिलांचलक नाम रौशन केने अछि ।
श्रुति बिहार झा पेशा स इंजिनियर छलीह आओर अखन अपन पति क संगे अमेरिका मे रहैत छलीह । अखन ओ अमेरिकन कॉपरेरेशन सेक्शन मे इंजिनियर क रूप मे कार्यरत छलीह । श्रुति क एहि सफर मे हुनकर परिवार क भरपूर समर्थन भेटल । आ हुनकरे बदौलत ओ एहि प्रतियोगिता मे जीत हासिल केलथि ।

संदीप दास
sandeep dasपटना निवासी तबला वादक संदीप दास कए ग्रैमी पुरस्कार स सम्मानित कएल गेल अछि । म्यूजिक एल्बम कैटेगरी मे वायलिन वादक यो यो मा केर एल्बम सिंग मी होम कए अवार्ड देल गेल अछि । एहि एल्बम मे यो यो मा आ भारतीय तबला वादक संदीप दास क जुगलबंदी अछि । एहि लेल हुनका एही प्रतिष्ठित पुरस्कार प्रदान कयल गेल अछि । बतबैत चली जे संदीप दास क जन्म बिहारक राजधानी पटना मे भेल अछि । सेंट जेवियर स स्कूलिंग करबाक बाद ओ बीएचयू स इंग्लिश लिटरेचर क पढ़ाई केलनि । संदीप दास बनारस घराना क पंडित किशन महाराजक शिष्य छथि ।

नीक वा अधलाह - ज़रूर कहू जे मोन होय

comments