यूपीएससी मे मैथिली फेर बनेलक रिकार्ड, 22 मे स 13 गोट छात्र सफल

सावित्री कुमारी

दरभंगा । संघ लोक सेवा आयोग क सिविल सेवा परीक्षा क नतीजा सोझा अछि आ मैथिली एक बेर फेर सिद्ध केलक अछि जे ओ कोनो आन भाषा क मुकाबले सफलताक बेहतर गारंटी अछि । एहि साल मैथिली भाषा स उत्तीर्ण कुल 22 गोट छात्र साक्षात्कार मे शामिल भेल छलथि, जाहि मे स 13 गोट छात्र क चयन भेल अछि । कोनो भारतीय भाषा लेल इ चयनक एकटा रिकार्ड अछि । मैथिली भाषा स सफल भेल छात्र मे चारिटा छात्र मिथिला मूलक नहि छथि । हरियाणा, उत्तर प्रदेश आ राजस्थान मूल क चारिगोट छात्र क सफलता बता रहल अछि जे कहियो मैथिल ब्राह्मण भाषा बताउल गेल मैथिली आइ अपन राष्ट्रीय उपस्थिति दर्ज करा चुकल अछि । खास गप इ सेहो अछि जे घोषित परिणाम मे मैथिली भाषा क चुनाव केनिहार छात्रक रैंक सेहो 109 स 913 क बीच अछि । सूची पर ध्यान दी त मधुबनीक नीरज कुमार झा -109 आ सचिन कुमार-129 रैंक भेटल अछि। पटनाक राकेश रंजन – 138, विवेक कुमार – 200, कुमार सत्यम- 339 रैंक भेटल अछि । उत्तर प्रदेशक अर्चित विश्वेश -335 रैंक पौलथि त मुजफ्फरपुर क मनीष कुमार- 399 रैंक पर छथि । हरियाणाक आदित्य भरद्वाज- 441 त सुपौलक सोनम कुमार- 451 पर छथि । भागलपुरक कुंदन कुमार -553 आ मुजफ्फरपुर प्रभात कुमार – 775 रैंक पौलथि अछि। राजस्थान क सतपाल – 809 आ सबस नीचा राजस्थान कए नीलिमा खोरवाल -913 रैंक पर संतोष जोकर छथि ।

उल्लेखनीय अछि जे एहि साल देशभरि मे 1099 उम्मीदवार बाजी मारलथि अछि । सामान्य वर्ग स 500, ओबीसी क 347, एससी कैटगरी के 163 और एसटी के 89 उम्मीदवार सफलता हासिल केलथि अछि । आईएएस लेल 180, आईएफएस लेल 45 आ आईपीएस लेल 150 उम्मीदवार क चयन भेल अछि । एकर अलावा केंद्रीय सेवाओं मे ग्रुप-ए लेल 603 आ ग्रुप-बी लेल 231 क चयन भेल अछि ।

परिणाम मे अगर बिहारी क गप करि त एहि साल कुल 31 टा उम्मीदवार बिहार स चयन सूची मे छथि । दरभंगा क सौम्या झा, मधुबनी क नीरज झा, सुमित कुमार झा आ पटना क सन्नी राज क्रमश: 58, 109 ,111 आ 132म रैंक प्राप्त केलथि अछि । बासुकीनाथ झा आ आदित्य झा कए क्रमश: 378 आ 503 स्थान प्राप्त भेल । हिनकर केन्द्रीय सेवा (समुह अ) लेल चयन भेल।

नीरज झा आ सन्नी राज पिछला साल इंडियन रेवेन्यू सर्विसेज क्लियर क चुकल छलथि। 109 रैंक अननिहार नीरज झा विदेश सेवा मे जेताह। नीरज मूल रूप स मधुबनी छथि मुदा फिलहाल धनबाद मे रहैत छथि।
सन्नी राज क इ चारिम प्रयास छल। 132म रैंक स खुश छथि। सन्नी डीएवी खगौल स मैट्रिक केलाक बाद एनआइटी जमशेदपुर स इंजीनियरिंग मे ग्रेजुएशन केलथि।

नीक वा अधलाह - ज़रूर कहू जे मोन होय

comments