बहुत किछु कहि गेल झारखंड क जनादेश

कुमुद सिंह

झारखंड । झारखंड मे एहि स नीक परिणाम क उम्‍मीद नहि कैल जा सकैत अछि । इ उम्‍मीद कोनो दल या गठबंधन क जीत स संबंध नहि रखैत अछि । इ जीत लोकतंत्र आ जनता क अधिकार क जीत स संबंध रखैत अछि । झारखंड विधानसभा क परिणाम मे कोनो दल क जीत बा हारि स बेसी महत्‍वपूर्ण तथ्‍य ओहि नेता क जीत आ हारि अछि जे पिछला 14 साल स झारखंड क जनादेश कए मजाक बना देने छलाह । झारखंड क कोनो पुरान मुख्‍यमंत्री बा उपमुख्‍यमंत्री विधान सभा नहि पहुंच सकलाह अछि । हेमंत सोरेन दूटा मे स एकटा सीट जरूर जीत गेलाह, मुदा दुमका स हुनकर हारि महत्‍वपूर्ण अछि। बाबूलाल मरांडी, अर्जुन मुंडा, मधु कोरा, हेमंत सोरेन आ सुदेश महतो क पराजय इ बता रहल अछि जे झारखंड क जनता पार्टी स बेसी हिनका सब स अपन बेइज्‍जति क बदला लेलक अछि । ओना आजुक परिणाम मे झारखंड केवल एहन नेता स मुक्‍त नहि अपना कए केलक अछि बल्कि ओहन दल स सहो अपना कए मुक्‍त करबा मे सफल रहल जे झारखंड कए अपन मौजे जेकां व्‍यवहार करैत छल आ ओकरा लेल झारखंड महज सत्‍ता कए संतुलित या नियंत्रित करबाक माध्‍यम छल। जदयू, राजद आ बसपा मे स केवल बसपा कए खाता खुलल अछि । पिछला 14 साल मे राजद या जदयू राज्‍य मे अपन कए झारखंड क पार्टी नहि बना सकल । एहि कारण झामुमो, झाविमो आ आजसू क परिणाम जदयू या राजद स काफी नीक रहल । नवीन जायसवाल सन किछु परिणाम विशुद्ध रूप स जनादेशक संदेश द गेल । आजसू प्रमुख सुदेश महतो जाहि प्रकार स अपन जीत लेल भाजपा स गठबंधन क नवीन जायसवाल क टिकट काटी देने छलाह, जनता एकर जबाव हुनका हरा आ नवीन कए जीता कए द देलक । कुल मिलाकए पिछला 14 साल मे झारखंड मे जेतबा कद्दावर नेता छलाह ओ लगभग सदन स दूर भ चुकला अछि । भ्रष्‍टाचार क खिलाफ बहुत हद तक जनादेश अछि। परिवारवाद क जरूर मनोबल खसल अछि, किछु परिणाम अपवाद स्‍वरूप राखल जा सकैत अछि । उपलब्‍ध उम्‍मीदवार में एकटा नीक सरकार लेल जेतबा नीक चयन भ सकैत छल, झारखंडक जनता केलक अछि । एहन मे देखबाक चाही जे राज्‍य क आगूक भविष्‍य केहन होइत अछि किया त आब पूर्णबहुमतक सरकार बनत आ दागी कद्दावर नेता सदन स बाहर रहताह । लोकतंत्र मे जनता एहि स फाजिल की क सकैत अछि ।

इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments

1 टिप्पणी

Comments are closed.