विकास क बाट पर देश स नम्हर बिहारक डेग

मुजफ्फरपुर क पैघ छलांग, दरभंगा मुंहभरि धड़ाम
सबसे धनीक पटना, सबस गरीब शिवहर
प्रधान समदिया
gdprateपटना । विकास क बाट पर बिहार क डेग एक बेर फेर देश स नम्हर भेल । ओना आधार वर्ष बदलला स दोहरा अंक नहि छुबि सकलक, मुदा तखनो बिहारक विकास दर देश के विकास दर 6.8 क मुकाबला में 7.6 प्रतिशत रहल, जे देश मे सर्वाधिक अछि । आजादीक बाद बिहार मे जतय मुजफ्फरपुर निरंतर पायदान चढि़ पांचम स्थान पर आबि गेल, ओतहि दरभंगा अपन अवसान कए जारी रखैत एहि साल 12म स्थान स 19म स्थान पर आबि गेल । ओना विकास दर मे बेगूसराय सभ सं समृद्ध त मधेपुरा, सुपौल सभसं गरीब रहल ।
राष्ट्रीय स्तर पर कृषि आ उत्पादन क्षेत्र मे गिरावटक असरि बिहार पर सेहो देखबा मे आयल । एकर बावजूद राज्यक अर्थव्यवस्था मजबूत बनल अछि । चालू वित्तीय वर्ष मे बिहारक विकास दर 7.6 प्रतिशत छल जे राष्ट्रीय विकास दर 6.8 प्रतिशत स बहुत बेसी अछि ।
वित्त मंत्री अब्दुल बारी सिद्दीकी विधानमंडल मे आर्थिक सर्वेक्षण, 2016-17 पेश केलनि । एकरा अनुसारे विनिर्माण, बिजली, गैस आ जलापूर्ति, व्यापार, मरम्मत, होटल-रेस्टोरेंट, परिवहन, भंडारण आ संचार मे विकासक रफ्तार दू अंक मे रहल अछि । ओतहि राजस्व प्राप्ति मे 17.7 हजार करोड़क बढ़ोतरी भेल अछि । जखनिक प्रति व्यक्ति आय 26,801 रुपया सं बढ़ि क 36,964 रुपया भ गेल अछि । हालांकि, राष्ट्रीय औसत सं आब सेहो ई बड़ कम अछि । ओतहि पछिला पांच बरख मे वाहन रजिस्ट्रेशन मे प. बंगाल (24.2 प्रतिशत) के बाद बिहार (15.4 प्रतिशत) पूरा देश मे दोसर नंबर पर अछि।
वित्त मंत्रीक अनुसार वर्ष 2015-16 मे बकाया ऋण 88,829 करोड़ छल, जाहि सं ऋण आ जीएसडीपी क बीचक अनुपात 21.5 प्रतिशत तक रहल । राजस्व प्राप्तिक साथ ब्याज भुगतानक अनुपात 2011-12 मे 9.3 प्रतिशत छल, जे 2015-16 मे घटि क 8.5 प्रतिशत रहि गेल । बिहारक मुद्रास्फीति दर 2.52 प्रतिशत अछि, जखनकि राष्ट्रीय दर 4.31 प्रतिशत अछि ।
वर्ष  2015-16 मे राज्यक सकल घरेलू उत्पाद 3.27 लाख करोड़ छल जे 2016-17 मे बढि क 4.14 लाख करोड़ भ गेल । राज्य मे प्रति व्यक्ति आय वर्ष 2015-16 मे 26,801 रुपया आ वर्ष 2014-15 मे 25,400 रुपया छल, जे वर्तमान मे बढि क 36,964 अछि । एखन राज्य मे प्रति व्यक्ति आय राष्ट्रीय औसतक लगभग 35 प्रतिशत अछि । जखनिक करीब 10 साल पहिने ई 33 प्रतिशत छल । हालांकि, राष्ट्रीय प्रति व्यक्ति आय 77 हजार 435 रुपया क तुलना मे बिहार मे ई आधा सं कम अछि । पड़ोसी राज्य झारखंड मे सेहो प्रति व्यक्ति आय बिहार सं ज्यादा 54,140  रुपया अछि ।
प्रति व्यक्ति आयक मामला मे जिलावार काफी विभिन्नता वा असमानता पाओल गेल अछि । पटना, मुंगेर आ बेगूसराय सबसं समृद्ध जिला अछि । जखनिक मधेपुरा, सुपौल आ शिवहरक लोक सभसं गरीब छथि । अगर पटनाक छोडि़ देल जाय तं मुंगेर मे प्रति व्यक्ति आय सबसं बेसी अछि । मुंगेर मे प्रति व्यक्ति आय शिवहर सं तीन  गुना बेसी अछि । ओतहि शिवहर जिला मे प्रति व्यक्ति आय राज्य मे सबसं कम अछि ।
कृषि मे विकास दर घटला सं राज्यक सकल घरेलू उत्पाद मे प्राथमिक क्षेत्र क हिस्सेदारी मे पछिला बरखक तुलना मे गिरावट आओल अछि । वर्ष 2015-16 मे प्राथमिक सेक्‍टर क हिस्सेदारी जीएसडीपी मे 19.6 प्रतिशत सं घटि क 18.1 प्रतिशत रहि गेल । ओतहि सेकेंडरी सेक्टर (द्वितीय) क हिस्सेदारी 17.1 प्रतिशत बढिक 18.1 प्रतिशत भ गेल अछि । टरसियरी (तृतीय) सेक्टरक हिस्सेदारी तकरीबन बराबर रहल । तृतीयक क्षेत्रक हिस्सेदारी 2014-15 मे 59.8 प्रतिशत क तुलना मे 2015-16 मे 59.9 प्रतिशत रहल । वर्ष 2011-12 स 2015-16 क तुलना कैल जाय त प्राथमिक क्षेत्र मे 7 प्रतिशतक गिरावट आ तृतीयक क्षेत्र मे 6 प्रतिशतक उछाल आओल अछि । राज्य मे निमाज़्णक क्षेत्र मे तरक्की नहि भेल, मुदा सर्विस सेक्टर मे ग्रोथ हेबा सं ई बढ़ोतरी दर्ज कैल गेल अछि ।
एहि क्षेत्र मे 10 प्रतिशत स बेसी वृद्धि भेल
17.7 : विनिर्माण
15.2 : बिजली, गैस और जलापूर्ति
14.6 : व्यापार, मरम्मत, होटल आ रेस्टोरेंट
12.6 : परिवहन, भंडारण आ संचार
टॉप आ पछुआयल जिला
मानदंड                      टॉप थ्री                                       बॉटम थ्री
प्रति व्यक्ति आय      (पटना, मुंगेर, बेगूसराय)                 (शिवहर, सुपौल, मधेपुरा)
पेट्रोल खपत           (पटना, मुजफ्फरपुर, पूर्वीं चंपारण)     (शिवहर, अरवल, शेखपुरा )
डीजल खपत           (पटना, पूर्वीं चंपारण, मुजफ्फरपुर)     (शिवहर, अरवल, शेखपुरा)
एलपीजी उपयोग      (पटना, मुजफ्फरपुर, शेखपुरा)           (शिवहर, अरवल, चंपारण)
छोट बचत             (पटना, सारण, नालंदा)                   (प चंपारण, सीतामढ़ी, अररिया)

नीक वा अधलाह - ज़रूर कहू जे मोन होय

comments