गोल्ड लोन घोटाला : बैंकक अधिकृत गोल्ड जाँच एक्सपर्ट आन कर्मचारी सबसंग मिलकए लगेलथि चपत

बैंक देलक 300 गोटेक गोल्ड लोन, 181 मे 77 क सोना नकली छल

मणिभूषण झा
गोपालगंज । गोपालगंज क बैंक सबमे सबकिछु ठीक नहिं चलि रहल अछि । कोनो बैंक स ग्राहक कए जाली नोट भेटि रहल अछि त कोनो बैंक मे नकली गोल्ड राखिकय करोड़ों लोन उठा लेने छथि । नकली गोल्ड दए क लोन लेबाक मामला क खुलासा होईते जिला क बैंक सब अपन लाकर में राखल सोना के पहचान केनाइ प्रारंभ कए देलक। जेना-जेना शहर के बंजारी मोड़ स्थित एसबीआई बैंक क एडीबीआई शाखाक जाँच बढ़ि रहल अछि, रोज नव-नव खुलासा भए रहल अछि । एखन धरि एहि बैंक स 23 करोड़ 90 लाख टकाक लोन 300 लोक कए देल गेल छल । एहिमें स 181 क जाँच भए रहल अछि । एहिमें स 77 लोकक सोना पूरा नकली भेटल । एहि सबगोटे पर प्राथमिकी दर्ज कैल गेल अछि । एहिक खुलासा भेलाक बाद अधिकारी सबहक हाथ-पैर फूलय लागल छनि ।

प्रथम दृष्टि मे बैंक कर्मचारी सेहो संदेह के घेरा मे छथि । एसबीआई क क्षेत्रीय प्रबंधक क आदेश पर भेल जाँचक बाद कैकटा तथ्य सोझा आबि रहल अछि । एहि फर्जी कांड लेल तत्कालीन शाखा प्रबंधक शैलेन्द्र कुमार नगर थाना मे गोल्ड लोन लेनिहार 77 गोटे पर नकली सोना जमाकए लोन लेबय के आरोप में एफआईआर दर्ज करौलथि ।

नकली गहना लए क लोन लेबय पहुँचल छल बैंक

11 मई कए बैंकक अधिकृत सोना चाँदी जाँच एक्सपर्ट सतीश प्रसाद मांझा बजार क मो. यूनिस क संग बैंक आबिकय सर्विस मैनैजर सुरेश राम आ कैश अधिकारी प्रवीण पाठक स भेंट कयलथि आ कहलथि जे लोन लेबाक अछि । एहि एवज मे मोट रकम देबाक पेशकश सेहो कैल गेल । युनिस अपना संगे सोना क हार, चेन, अंगूठी, सिकड़ी आनने छल । जखन दूनू अधिकारी क संदेह भेलनि त ओ दूनू क पकड़बाक प्रयास केलनि मुदा नकली गहना छोड़ि दुनू पड़ा गेलाह ।

एफआईआर क बाद 24 घंटा मे तीन आरोपी लोन वापस जमा कयलनि

एफआईआर दर्ज हेबाक 24 घंटाक भीतर तीनटा बड़का लोनी अपन लोन जमा करौलथि । आशा देवी गहना राखिकय 4 लाखक लोन लेने छलथि ओ वापस केलन्हि । रमाकांत प्रसाद 3 लाख टका आ मांझा थानाक भरकुईया गामक चन्द्रभूषण पाण्डेय 2 लाख 43 हजार टका बैंक मे जमा केलथि । नगर थाना क राजेश कुमार दू टा बैंक खाता सँ 6 लाख 40 हजारक लोन नकली गोल्ड राखिकय लेने छलथि, जखन धोखाधड़ी क मामला दर्ज भेल तँ 3 लाख टका दए खाता कए बंद करौलथि ।

3 साल मे तीनटा बैंक आफिसर क बदली भेल मुदा खेल जारी रहल

तीन साल मे तीनटा बैंक प्रबंधक क बदली भेल, फील्ड अधिकारी आ कैश अधिकारी क बदली होएत रहल आ लोन देबाक खेल जारी रहल । शाखा प्रबंधक राधव पाण्डेय क तबादला क बाद रंजन कुमार, फेर शैलेन्द्र कुमार एलाह । फील्ड अधिकारी सुरेंद्र सिंह क तबादला क बाद नव अधिकारी योगदान देलथि ।

नीक वा अधलाह - ज़रूर कहू जे मोन होय

comments

कोई जवाब दें

Please enter your comment!
Please enter your name here