दीपावली आ छठ क बीच अक्टूबर मे होएत कोशी फिल्म फेस्टिवल सीजन-2

0
190

सहरसा । सहरसा ग्रुप क बैनर तर आयोजित भ रहल कोशी फिल्म फेस्टिवल क दोसर आयोजनक घोषणा क देल गेल। कोशी फिल्म फेस्टिवल क संयोजक आनंद झा कहला अछि जे एहि साल कोशी फिल्म फेस्टिवल क आयोजन दुर्गापूजा आ छठ क बीच होएत। इ आयोजन 30-31 अक्टूबर कए सहरसा मे होएत। रविदिन एफ.वाई.आई मे आयोजित प्रेस बैसार मे श्री झा कहला जे पाबनि-तिहार लेल लोक सब गाम अबैत अछि, एहि दौरान एकर आयोजन स प्रवासी सब सेहो एहि मे शामिल हेताह। ओ कहला जे गत वर्ष सहरसा मे कोशी फिल्म फेस्टिवल क एतिहासिक आयोजन कैल गेल। फिल्म फेस्टिवल मे जतय 18 बेहतरीन फिल्मक स्क्रीनिंग भेल ओतहि क्षेत्र क निर्माता-निर्देशक आ पैघ – छोट परदा क कलाकार कए आमंत्रित कैल गेल छल। फेस्टिवल मे पंकज झा, नवनीत झा, मनीष सिंह राजपूत, श्रीराम यादव, विपुल आनंद, अमिय कश्यप, मनोज श्रीपती, रजीनकांत पाठक, अमृत सिन्हा आदि अनेक फिल्म निर्माता क शामिल भेल छलाह। सहरसा मे फिल्म क प्रति सकारात्मक माहौल बनल छल। कोशी फिल्म फेस्टिवल क आयोजन क्षेत्र मे फिल्म निर्माता कए आकर्षित केलक अछि।

फिल्म फ्रीवे क माध्यम स आमंत्रित कैल गेल अछि फिल्म

आयोजन स जुडल इ’समाद फाउंडेशनक प्रबंध संपादक सुनील कुमार झा कहला जे एहि साल फिल्म फेस्टिवल मे फिल्म मंगेबा लेल सबस चर्चित माध्यम फिल्म फ्रीवे क चुनाव भेल अछि। एहि माध्यम स फिल्म आमंत्रित कैल गेल अछि। जाहि स देश-विदेश स फिल्म एबाक उम्मीद अछि। हिंदी आ मैथिली क आलावा अन्य भारतीय भाषा क फिल्म सेहो आमंत्रित कैल गेल अछि, बशर्ते ओकर सबटाइटिल हिंदी मे हो । एखन धरि कुल 24टा फिल्म प्राप्त भेल अछि। फिल्म क एंट्री क अंतिम तारीख 30 सितंबर अछि। 30 सितंबर तक प्राप्त फिल्म मे स ज्यूरी क द्वारा चयनित फिल्म क प्रदर्शन कैल जायत। सुनील कहला जे एहि बेर कोशी फिल्म फेस्टिवल मे दर्शक नीक सिनेमा क आनंद ल सकताह।

क्षेत्र क कलाकार कए भेटत मंच

फिल्म फेस्टिवल मे फिल्म क प्रदर्शन क आलावा स्थानीय कलाकार क प्रस्तुति सेहो मुख्य आकर्षण होएत। विदित हो जे गत वर्ष कोशी फिल्म फेस्टिवल मे जाहि कलाकार द्वारा प्रस्तुति देल गेल हुनका स्थानीय आ देश स्तर पर पहचान भेटल। एहन मे कोशी फिल्म फेस्टिवल क आयोजन मे स्थानीय कलाकार कए मंच देबा जिम्मेदारी बनैत अछि। एहि बेर ग्रामीण क्षेत्र स सेहो प्रतिभा कए आमंत्रित कैल जायत।

कोशी फिल्म फेस्टिवल क मंच स भेटत मेरिट अवार्ड    

विदेश मे स्थापित सैफ श्री आशीष झा कोशी फिल्म फेस्टिवल टीम स संपर्क केलथि अछि आ कहला अछि जे जे.झा.मेरिट अवार्ड क तहत कोशी फिल्म फेस्टिवल क मंच स एकटा चयनित प्रतिभावान छात्र कए रू 5000/- क मेरिट अवार्ड आ प्रशस्ति पत्र प्रदान कैल जाएत।

फिल्म राइटिंग तथा मोबाइल फिल्म मेकिंग वर्कशाप पर विचार

सुनील कहला जे एहि बेर सहरसा मे फिल्म राइटिंग आ मोबाइल फिल्म मेकिंग वर्कशाप क आयोजन पर सेहो विचार भ रहल अछि। एहि वर्कशाप मे फिल्म क लेखक द्वारा फिल्म क कहानी लिखबाक हुनर सिखाउल जायत। ओतहि मोबाइल स केना फिल्म बनाउल जा सकैत अछि एहि पर सेहो वर्कशाप मे गुर बताउल जायत। प्रतिभागी के स्थानीय लोकेशन पर मोबाइल स बनल चयनित फिल्म क प्रदर्शन एहि आयोजन मुख्‍य आकर्षण रहत। एकरा लेल विप्लव विशाल कई गोटा स संपर्क क रहल छथि।

सहरसा ग्रुप क एडमिन साकेत आनंद कहला जे विगत 8 साल स सहरसा ग्रुप सहरसा क निवासी आओर प्रवासी कए जोड़बाक कार्य क रहल अछि। लगातार 4 वर्ष सहरसा ग्रुप मिलन समारोह क आयोजन क बाद वर्ष 2018 मे कोशी फिल्म फेस्टिवल क नींव रखलक,जेकरा खूब समर्थन भेटल। एहि तरह क आयोजन हमर सबहक सामाजिक जिम्मेदारी अछि।

आयोजन क तैयारी पर विचार करबा लेल एकटा बैसार सेहो भेल अछि जाहि मे साकेत आनंद, आनंद झा, सुनील कुमार भानु, अमन पराशर, दीपक कुमार झा, अजय कुमार,कुणाल, अश्विनी कुमार, विनय कुमार, कुमार विक्रमादित्य, अमरेंद्र कुमार, अमरज्योति जयसवाल, अनुज कुमार, मनीष कुमार, शुभम भारती, रौशन झा, शालिनी सिंह, मयंक कुमार, बिपिन कुमार सिंह, दिलीप कुमार, अविजित आनंद, रौशन कुमार भगत आ अन्य कई गोटे उपस्थित छलाह।

Comments

comments

LEAVE A REPLY

Please enter your comment!
Please enter your name here