सामाजिक सहयोग सँ होयत भैरवा में जलाभिषेक : डीएम

दुनू समुदाय के लोक प्रशासन के सहयोग करबाक देलक भरोसा
मधुबनी । मधुबनी जिलाक बिस्फी प्रखंड के भैरवा गांव में बनल शिव मंदिर में हरेक वर्ष सावन मास में जलाभिषेक करेनाई प्राशासनक वास्ते चुनौतीपूर्ण कार्य रहैत अछि। कारण, जे ओहि गाम में दू समुदाय के बीच हमेशा तनातनी रहैत अछि। आबय वला किछुए दिनक बाद सावन में भैरवा शिव मंदिर में बल्हाघाट सँ जल ल’ क’ कांवरिया ओतय जलाभिषेक करताह। शांतिपूर्ण जलाभिषेक होई, ताहि हेतु 19 जुलाई वृहस्पति दिन मधुबनीक डीएम शीर्षत कपिल अशोक टीपीसी भवन में दुनू समुदाय के प्रबुद्धजनक संग एकटा बैसकी कयलाह। जाहि में एखन जिलाक प्रभारी एसपी अश्विनी कुमार सेहो शामिल रहैथ। बैसकी में ओतुका जनप्रतिनिधि लोकनि सेहो भाग लेलनि। पूर्व विधायक हरिभूषण ठाकुर बचौल के कहब छलन्हि जे भैरवा मेला के राजकीय मेला घोषित कैल जाय, जाहि सँ एतुका विकास भ सकय। एहि मौका पर हंस ठाकुर जानकारी दैत बजलाह जे बलहा घाट सँ पूरब सड़क क्षतिग्रस्त अछि, जाहि सँ श्रद्धालु कांवरिया के काफी परेशानी हेतैन। एकरा शीघ्र मरम्मत कराओल जाय। किछु लोक इहो विचार देलैन जे जिनका सब पर 107 के कार्रवाई कैल गेल अछि हुनका लेल प्रखंडे में शिविर लगाओल जाय जाहि सँ बेनीपट्टी एबा जयबाक परेशानी सँ ओ लोकनि बाँचि जाइथ। लोकक मांग छल जे, बलहाघाट पर स्वच्छ ज’ल आ शौचालय के व्यवस्था हेबाक चाही। डीएम बजलाह जे एहि बेर सामाजिक सहयोग सँ जलाभिषेक संपन्न कराओल जायत। हुनकर कहब छल जे एहि बेर परुकां सालक अपेक्षा बेसी नीक व्यवस्था राहत। डीएम खबरदार करैत कहला जे, मेलाक दौरान शांतिभंग आ सौहार्द बिगाड़’ वला के विरुद्ध कठोर कार्रवाई कैल जायत। ओ इहो आश्वासन देलनि जे निर्दोष लोक पर स  सीसी एक्ट हटाओल जायत। प्रभारी एसपी अश्विनी कुमार बजला जे भैरवा मेला में प्रशासनिक व्यवस्था चुस्त-दुरुस्त रहत। एहि दौरान डीजे बजबै पर पूर्ण प्रतिबंधक घोषणा ओ केलन्हि। मेला में सहयोग करयवला के परिचय पत्र देबाक घोषणा सेहो भेल। बैसकी में कुमार गौरव, डीडीसी अजय कुमार, वरीय उप समाहर्ता दुर्गानंद झा, एसडीओ मुकेश रंजन, डीएसपी पुष्कर कुमार आदि सेहो शामिल भेला। बैसकी समाप्त भेलाक बाद डीएम एवं एसपी भैरवा मंदिर परिसर एवं बलहा घाट के निरीक्षण सेहो कैल।

नीक वा अधलाह - ज़रूर कहू जे मोन होय

comments