औरंगाबाद सँ मधुबनी- जयनगर बनत फोर लेन सड़क

0
6

अजय धारी सिंह
मधुबनी। केंद्र क मोदी सरकार एक बेर पुनः मिथिलांचल केँपैघ उपहार देल अछि ।औरंगाबाद- जयनगर तक फोर लेन सड़क बनेबा क स्वीकृति देल गेल अछि जे देश क राजधानी दिल्ली से पड़ोसी देश नेपाल जयबा मे सुबिधाजनक होयत। टटका समाचार क अनुसार औरंगाबाद से नेपाल सीमा समीप अवस्थित जयनगर तक एक नव फोर लेन सड़क बनत। केन्द्र सरकार क भारतमाला योजना अंतर्गत एहि परियोजना केँ तैयार कैल गेल अछि जकर नाम नाॅर्थ साउथ कॉरीडोर राखल गेल अछि।

बख्तियारपुर- ताजपुर संँ होयत कनेक्टिविटी। गंगा नदी मे बख्तियारपुर- ताजपुर के मध्य निर्माणाधीन फोर लेन पुल से उत्तर में नेपाल आ दक्षिण में बिहार क सीमा रजौली से भाया झारखंड उड़ीसा तक आवागमन क सुबिधा हेतु नव सड़क निर्माण करबा पर विचार कैल जा रहल अछि।एन एच २८ ताजपुर इमली चौक- दरभंगा क बिठौली – जाले – पुपरी- जालेश्वर नेपाल सीमा तक फोरलेन बनेबा लेल मार्ग रेखण निर्धारण कार्य शुरू होयबा क संभावना अछि। फोर लेन क काज पूर्णतः ग्रीनफील्ड हेतैक। दक्षिण मे बख्तियारपुर सँ रजौली तक फोरलेन बनेबाक योजना अछि।

कहल जाईछ जे पहिने मात्र दरभंगा तक एहि सड़क केँ बनेबाक योजना केन्द्र क छल परन्तु राज्य सरकार प्रस्ताव दय एकरा नेपाल सीमा तक विस्तारित करौलक अछि। औरंगाबाद सँ शुरू भेला क कारणे ई सड़क जी टी रोड अर्थात एन एच २ सँ सेहो सम्पर्कित होयत। एहि तरहेँ दिल्ली से भाया बिहार नेपाल तक ई सड़क फोरलेन भय जायत।पथ निर्माण विभाग एहि कॉरीडोर के मार्ग रेखण निर्धारित कय केंद्र सरकार केँ समर्पित कयलक अछि। केंद्र एहि हेतु एन एच ए आई केँ प्राधिकृत कयलक अछि जकर स्वीकृति पश्र्चात एकर मार्ग रेखण पर अंतिम निर्णय लेल जायत। जमीनक उपलब्धता आ यातायात घनत्व क कारणे मार्ग रेखण मे परिवर्तन संभावित छैक परंतु आरम्भिक आ अंतिम विंदु निर्धारित अछि आ पटना केँ एहि से सम्पर्कित करबा पर सहमति भ गेल छैक।

एहि सड़क केँ बनेबा सँ दक्षिण बिहार सोझे नेपाल संँ सम्पर्कित होयत। वर्तमान मार्ग रेखण अनुसारेँ सड़क क लंबाई २७१ किमीअनुमानित अछि।सड़क औरंगाबाद सँ शुरू भय भाया जहानाबाद कच्ची दरगाह आओत आ कच्ची दरगाह- बिदुपुर पुल पार करैत वैशाली जिला मे प्रवेश करत। संभवतः बख्तियारपुर- ताजपुर पुल सँ सेहो संपर्कित होयत।एहन परिस्थिति मे वैशाली छूटि जायत आ पटना सँ सीधे समस्तीपुर जिला पहुँचत। गंगा नदी पार कयला बाद ई सड़क समस्तीपुर, दरभंगा, मधुबनी क बाद जयनगर नेपाल सीमा पर समाप्त होयत। एहि परियोजना मे लागत कम करैबा लेल किछु पुरान सड़क सबहक अधिग्रहण कय सम्मिलित करबाक संभावना अछि।

Please Enter Your Facebook App ID. Required for FB Comments. Click here for FB Comments Settings page