दर्शकक स्‍नेह क परिणाम छी हमर दोसर फिल्‍म : मुरलीधर

मैथिलीक चर्चित फिल्म “सस्ता जिनगी महग सेनुर”क निर्देशक मुरलीधर मूलरूप सँ मिथिलाक निवासी छथि। भारत सरकारक छात्रवृति सँ 1978 में मुंबई पहुचि पद्म विभूषण पं. जसराज सँ संगीत सीखे लगलाह आ इप्टा सँ जुरलैथ। बीआर चोपडाक महाभारत मे कृपाचार्य सहित अनेको हिंदी,नेपाली आ मैथिली फ़िल्मक अभिनेता मुरलीधर निर्देशक रूप मे तखन चर्चित भेलाह जखन 1999 मे हिनक कथा-पटकथा-अभिनय-संगीत आ निर्देशन मे सस्ता जिनगी महग सेनुर प्रदर्शित भेल। आब हिनक दोसर मैथिलि फिल्म “सजना के आँगन मे सोलह सिंगार” प्रदर्शित होई बाला अछि। एहि सन्दर्भ मे प्रस्‍तुत अछि इ-समाद लेल किसलय कृष्ण संग भेल हुनक गप-सपक मुख्‍य अंश…

प्र.-मुंबई मे संगीत सीखैथ अनायास अभिनय आ निर्देशन दिस कोना भेल अपनेक पदार्पण ?
उ.-संगीत सीखबाक संगहि हम इप्टा सँ सेहो जुडि गेल छलहु आ यैह अभिनय-निर्देशन सँ आगाँ चलिक’
हमर जुडाव बनल….

प्र.-अपने फ़िल्मक प्रायः सभ विधाक काज केने छी…कने विस्तार सँ बताबियौक ईसमादक पाठक लेल…
उ.-जी..प्रारंभ मे हमर इच्छा पार्श्वगायक बनबाक छल…से किछु फ़िल्मक लेल कयबो केलहु…मुदा अपेक्षित
सफलता नहीं भेटल…पुनः संगीतकार बनबा लेल ज़ोगार मे लगलहु…पहिल बेर एकटा नेपाली फिल्म ‘देवकी’
क संगीत निर्देशन करैत पुनः हिन्दीक ‘मेम साहेब’,’यथार्थ’ आदि फ़िल्मक संगीत करबाक अवसर भेटल…आ फेर इप्टाक प्रभवे अभिनय दिस सेहो रुख कयल….

प्र.-पहिल बेर कोन फिल्म मे अभिनय कयलियैक…?
उ.-हिन्दीक ‘नक्सलपंथी’ आ तकर बाद नेपालीक कृष्णा मे बतौर नायक काज कयल आ हिंदी-नेपाली मे अभिनय सँ जुडल रहलहुं…

प्र.-आ सस्ता जिनगी महग सेनुर सँ निर्देशकीय पारी…..?
उ.-(खूब हँसैत) निश्चित…मुदा बड्ड कम लोक कें बुझल छैक जे हम एहि फ़िल्मक आधा निर्माता सेहो छलहु…बालकृष्ण झा आधा पैसा लगेने छलाह….जे से…निश्चित मैथिल दर्शक वर्गक अपार समर्थन भेटलैक…

प्र.-केहेन फायदा भेटल..?.हमर कहबाक तात्पर्य आर्थिक पक्ष सँ जुडल अछि…
उ.-किसलय जी…किछु-टा नहि…मुदा दर्शक जे स्नेह देलनि…तकरे प्रतिफल थीक जे आई हम दोसर फिल्म ‘सजना के आँगन मे सोलह सिंगार’ ल’क’ आबि रहल छी…

प्र.-मुदा एहि बीच मे हम कने ‘आउ पिया हमर नगरी’ दिस आन’ चाहब..जकर ९०% निर्देशन अहाँ कयने छलहुं…मुदा….?
उ.-(बात कटैत) एहि विन्दु पर फेर कहियो गप्प हेतैक….

प्र.-ठीक छै….सजना के आँगन ….के निर्माता के छथि आ कोन विषय-वस्तु पर अछि एकर पटकथा ?
उ.-संदीप झा शिक्षाविद छथि आ कैकटा इंजिनियरींग कॉलेज चला रहल छथि …वैह निर्माण क’ रहल छथि “सजना के आँगन मे सोलह सिंगार” क आ संवाद सेहो वैह लिखने छथि …कथा-पटकथा-संगीत आ निर्देशन हमर अछि…मिथिला समाज मे व्याप्त कुरीति सभ फ़िल्मक केंद्र मे अछि मुख्य फोकस विधवा विवाह पर अछि…..

प्र.-कने गीत-संगीत पर प्रकाश दैतियैक ….
उ.-सियाराम झा सरस आ स्वयं हमर गीत सभ अछि..जकरा उदित नारायण,साधना सरगम,दीपनारायण,इंदु सोनाली,बिनोद गुवार आ हम स्वयं सेहो स्वर देने छी…सरसक पुरान गीत ‘चेत कब्बड्डी …’ नव अंदाज़ मे अछि…

प्र.-अभिनय पक्ष मे के सभ छथि….आ फिल्म कहिया धरि प्रदर्शित हेबाक संभावना अछि…?
उ.-सस्ता जिनगी …क गजराज राजीव सिंह अपन खलनायाकीक दोसर पारी मे छथि…राहुल सिन्हा,राखी त्रिपाठी,तृप्ति नाडकर आदि से अभिनय सशक्त केने छथि आ से त’ दर्शक सेहो कहता….23,सितम्बर,2011 कें फिल्म प्रदर्शित करबाक योजना अछि….

प्र.-अंत मे मैथिली फिल्म उद्योग मे लागल युवा सभ लेल की कहबई अपनें …?
उ.-हम त’ यैह कहबनि जे पहिने सीखू आ तखन एहि क्षेत्र मे आउ आ मैथिली सिनेमा कें समृद्ध करू ….दोयम दर्ज़ा के काज नै करू … एहि सँ नै अहांक भला होयत आ ने मैथिलीक ….दर्शक सँ सेहो कहबनि जे बाज़ार सँ पायरेसी नहि कीनि…ओरिजिनल डिस्क कीनि अपन भाषाक फिल्म उद्योग कें समृद्ध करी …..

प्र-आगाँ की योजना सभ अछि मैथिली फ़िल्मक सन्दर्भ मे…?
उ.-एकटा नव फिल्म पर काज चलि रहल अछि …आगाँ माँ जानकीक इच्छा….

प्र.-अहाँ अपन व्यस्ततम समय मे सँ किछु समय द’ सकलहु ….ताहि लेल हम ईसमाद परिवार दिस सँ हार्दिक आभार प्रकट करैत छी…..
उ.-धन्यवाद…हमहूँ मुरलीधर मैथिलीक पहिल ई-पेपर ईसमाद कें शुभकामना आ धन्यवाद दैत छी…जे हमरा मोन पाडलहुं….

नीक वा अधलाह - ज़रूर कहू जे मोन होय

comments

9 टिप्पणी

  1. इसमाद के धन्यवाद संगे किसलय जी के सेहो धन्यवाद एतेक सुन्दर इंटरव्यू प्रकाशित के लेल

  2. मुरलीधर जी कें ईसमाद पढ़ि जानलहुं—-बहुत-बहुत धन्यवाद

  3. murlidhar jee sa interviewk lel kislay ke bahut subhkamna aa murlidhar jee ka agila filmk lel subhkamna.

  4. interview nik chhal….Kislayaji.Murlidharji ke dhanyabad,je maithili me cinema bna rahal chhathi.Hinka sang maithili cinema ke bahut duri taya karwak chhai.Punaha duno ke dhanyabad.

  5. i janbak ichha chal j hunak dosar film kakhan aib rahal chhain. murlidhar k mithilak maan badhebak a maithil k jagruk karbak lel bahut bahut dhanybad.

  6. thanks murlidhar for developing maithili film industry n also thanking to journalist kislay krishan for this intro

  7. मिथिला के प्रसिद्ध कलाकार, निर्देशक,गायक तथा संगीतकार मुरलीधर जी आर फ़िल्म आलेखक किसलय जी के सादर धन्यवाद अहि ज्ञानपरक,मनमोहक,तथा प्रेरक साक्षात्कार के लेल । ऎहन ऎहन समाचार पढि क मन खुश भय जायत आर गर्व से हो । किसलय जी सं विशेष आग्रह जे वो किछु आर कलाकारअक साक्षात्कार प्रस्तुत करथ। धन्यवाद

  8. मैथिली सिनेमाक शोमैन मुरली जीक साक्षात्कार नीक लागल…ईसमाद परिवार आ
    फ़िल्मकर्मी किसलय कृष्ण कय हार्दिक आभार देत छी ….रणधीर

Comments are closed.