भ्रष्ट कुंवर क मकानक 62टा कोठली बनत क्लासरूम


पटना। एक जमाना छल जखन मगध पर राज करबा लेल बख्तियार शिक्षाक आधारभूत संरचना कए ध्वस्त करि देने छल, आइ बख्तियारपुरक नीतीश कुमार बिहार पर राज करबा लेल भ्रष्ट अधिकारिक घर मे स्कूल खोली शिक्षाक लेल आधारभूत संरचना बढा रहल छथि। मगध पर राज करबाक अछि त जनता कए मूर्ख बना कए राखू, बख्तियार क एहि नीति कए अंगरेजी स ल कए लालू प्रसाद तक लागू करबा मे पाछु नहि रहलाह। मुदा नीतीश एहि नीति कए खत्म करबा लेल प्रयासरत छथि। एहि कडी मे पूर्व एमवीआई रघुवंश कुंवर क समस्तीपुर क मोहिउद्दीन नगर स्थित टांरा गाम क मकान आ राजधानी क पूर्वी चित्रगुप्त नगर (गांधी नगर) क मकान नंबर 50ए/1293 मे बहुत जल्द नौनिहाल शिक्षा ग्रहण करत। औरंगाबाद क पूर्व एमवीआई रघुवंश कुंवर क कारी कमाई स बनल एहि आलीशान भवन मे कुल मिला कए 50टा कोठली अछि, जे आब स्कूलक कक्षा बनत।
निगरानी क विशेष अदालत एक मास क भीतर एहि मकान समेत कुंवर क अन्य अवैध संपत्ति कए जिला प्रशासन कए सौंप दैत। पटना क मकान क संग-संग समस्तीपुर क मोहिउद्दीननगर प्रखण्ड स्थित हुनकर पैतृक गाम टौरा मे बनल हुनकर आलीशान भवन मे सेहो स्कूल खोलबाक तैयारी करि लेल गेल अछि। कुंवर क पटना स्थित भव्य मकान कए देखिकए हुनकर हैसियत क अनुमान आसानी स लगाउल जा सकैत अछि। करीब दू कट्ठा क भूखंड मे बनल एहि भवन मे दर्जन भरि कोठली अछि, जे सर्वसुविधा संपन्न अछि।
एकर ठीक सामने दू कट्ठा स बेसीक भूखंड खाली पड़ल छै, जेकर प्रयोग वाहन लगेबा लेल कैल जा रहल अछि। एहि खाली भूखंड क पश्चिमी छोर मे करीब आधा दर्जन एस्वेस्टस क कोठली बनल अछि जे फिलहाल खाली छै। आस-पड़ोस क मानी त कुंवर क लग मे तीनटा छोट गाड़ी अछि। कुंवर क पांचटा बेटी, जाहि मे स एकटाक विवाह भ चुकल अछि। दूटा बेटी राज्य स बाहर शिक्षा ग्रहण करि रहल छथि। लोकक अनुसार बडक़ी बेटी दिल्ली मे डॉक्टर छैन।
ओतहि समस्तीपुर क मोहिउद्दीननगर प्रखण्ड स्थित टौरा गांव मे बनल हुनकर आलीशान भवन कए दूर स चिन्हल जा सकैत अछि। स्थानीय लोकक कहब अछि जे एहि मकान मे चारि दर्जन स बेसी कोठली अछि। फिलहाल एहि मकान मे एमवीआई रघुवंश कुंवर क भाई आ अन्य परिजन रहैत छथि।
गौरतलब अछि जे कुंवर कए निगरानी अन्वेषण ब्यूरो क विशेष टीम 24 सितम्बर, 2008 कए 50 हजार टका रिश्वत लैत गिरफ्तार केने छल। एहि मुकदमा क सुनवाई मे न्यायालय कुंवर क करीब पैंतालीस लाख टकाक चल-अचल संपत्ति कए जब्त करबाक आदेश देलक अछि। इ दूनू संपत्ति रघुवंश कुंवर आ हुनकर पत्नी ललिता देवी क नाम पर अछि।

नीक वा अधलाह - ज़रूर कहू जे मोन होय

comments