28 हजार करोड भेल बिहार क योजना आकार

समदिया
नई दिल्‍ली। एहि साल योजना आयोग बिहारक योजना आकार 28 हजार करोड तय केलक अछि। योजना आयोगक संग भेल राज्‍य सरकारक बैसार मे इ अनुमोदन कैल गेल। इ राशि पिछला सालक तुला मे 30.9 प्रतिशत बेसी अछि। योजना आयोगक उपाध्‍यक्ष मोंटेक सिंह अहलुवालिया आ बिहारक मुख्‍यमंत्री नीतीश कुमारक बीच भेल बैसार मे राज्‍य क उपमुख्‍यमंत्री सुशील कुमार मोदी समेत कईटा अधिकारी मौजूद छलाह। बैसारक बाद श्री अहलुवालिया कहला जे ओ बिहारक विकास क गति स खुश छथि आ बिहार तेजी स विकसित राज्‍य दिस जा रहल अछि। ओ कहला जे एहि बेर मंजूर भेल योजना आकार मे राज्‍य सरकारक अंशदान 46.11 प्रतिशत अछि यानि 12910 करोड टका क व्‍यवस्‍था राज्‍य सरकार खुद करत, जखन कि बाजार स 28.27 प्रतिशत राशि यानि 7916 करोड कर्जक रूप मे लेल जाएत। बाकी बचल 25.62 प्रतिशत यानि 7174 करोड केंद्र देत। उल्‍लेखनीय अछि जे 2004-05 क योजना आकार मे केंद्र अंशदान 70 प्रतिशत छल, जे आब घटि कए 25.62 प्रतिशत पर आबि गेल अछि। बिहार लेल इ एकटा शुभ संकेत अछि जे इ राज्‍य अपन टांग पर ढार भ रहल अछि। बिहारक आर्थिक हालात पर चर्च करैत ओ कहला जे राज्‍य सरकार 2005-06 मे योजना आकारक मात्र 9.26 प्रतिशत अंशदान दैत छल जे आब बढि कए 46 प्रतिशत तक पहुंच गेल अछि। एहि स पता चलैत अछि जे राज्‍यक आर्थिक स्थिति केतबा मजबूत भ रहल अछि। एहि अवसर पर मुख्‍यमंत्री नीतीश कुमार कहला ले किछु साल पहिने तक कर्मचारी कए दरमाहा देबा लेल सेहो टका राज्‍य सरकार अपन स्‍तर स नहि जुटा पाबि रहल छल, मुदा आब एहि काज लेल ककरो मुंह नहि दखए पडैत अछि। ओ कहला जे हुनकर सरकार जहिया राज्‍य मे बनल राज्‍यक योजना आकार काफी कम छल। हुनकर सरकार 2005-05 मे 4676 करोड क योजना आकार केंद्र लग अनलक आ इ क्रमश: 8470, 9652,12851,14183,18717 आ 21018 करोड तक पहुंचेलक। एहि साल इ आकर 28 हजार करोड भ गेल अछि। मुख्‍यमंत्री कहला जे हुनकर प्राथमिकता नहि बदलल अछि किया कि बिहार कए एखन बहुत आगू ल जेबाक अछि आ विकासक गति सेहो तेज करबाक अछि। ओ कहला जे सरकारक प्राथमिकता एखनो आधारभूत संरचनाक विकास अछि। कुल योजना आकारक 19 प्रतिशत भाग सडक सन आधारभूत संरचनाक विकास मे खर्च कैल जाएत। ओ कहला जे बिहारक विकास दर आन राज्‍य स जरूर बेसी अछि मुदा बिहार कए विकसित राज्‍य बनेबा लेल एकरा आर बेसी करबाक जरूरत अछि। एना विकास करत त बिहार कए विकसित राज्‍य बनबा मे 20 साल लागि जाएत, ताहि लेल विकास गति कए कम स कम दोगुना करबाक प्रयास कैल जा रहल अछि। मख्‍यमंत्री कहला जे राज्‍य सरकार एकरा लेल कृषि पर खास ध्‍यान द रहल अछि आ एहि साल 77 लाख मैटिक टन चाउर क उत्‍पादन क बिहार नव इतिहास रचि देलक अछि। ओ कहला जे 11म योजना मे जीएसडीपी क वृद्धि दर 12.08 प्रतिशत छल, जाहि स प्रति व्‍यक्ति शुद्ध आय मात्र 8353 टका छल, मुदा वर्तमान दर मे 195 प्रतिशत क बढोतरी दर्ज भेल अछि आ इ 24681 टका भ गेल अछि। मुख्‍यमत्री कहला जे इ वृद्धि बिहारक अनुपात मे बहुत अछि मुदा विकसित राज्‍य लेल एखन लंबा रास्‍ता तय करबाक अछि। ओ राज्‍य सरकारक प्रस्‍ताव कए स्‍वीकार करबा लेल योजना आयोग क उपाध्‍यक्ष कए धन्‍यवाद देलथि।

maithili news, mithila news, bihar news, latest bihar news, latest mithila news, latest maithili news, maithili newspaper

नीक वा अधलाह - ज़रूर कहू जे मोन होय

comments