15 स शुरू भ जाएत भागलपुर स हवाई सेवा

एयरपोर्ट अथार्टी आफ इंडिया देलक अनुमति
दू स तीन हजार टका होएत किराया
शीघ्र शुरू होएत किछु आओर नव शहर स सेवा
स्प्रीट एयर क बाद स्काई फिशर उतरल बिहार मे
एयर एशिया सेहो बिहार क शहर लेल देत सेवा

भागलपुर / पटना । आखिरकार केंद्र सरकार मानलक जे बिहार मे घरेलू उड़ान क अपार संभावना अछि। बिहार मे घरेलू उड़ान सेवा लेल भारी मांग कए देखैत आखिरकार एयरपोर्ट अथार्टी आॅफ इंडिया पटना स जिला मुख्यालय लेल उड़ान क अनुमति द देलक। एयरपोर्ट अथार्टी आॅफ इंडिया क एहि अनुमति स बिहार क करीब दर्जन भरि रनवे पर हवाई सेवा शुरू हेबाक बाट साफ भ गेल। अनुमति भेटलाक बाद सबस पहिने विमानन कंपनी स्काई फिशर भागलपुर समेत बिहार क चारिटा शहर स अपन सेवा शुरू करबाक घोषणा केलक अछि। ओतहि टाटा क विमान कंपनी एयर एशिया लेल सेहो बिहार क शहर स सेवा शुरु करबाक बाट खुलि गेल। स्प्रीट एयर पहिने बिहार क तीनटा शहर लेल सेवा द रहल अछि। स्प्रीट एयर पूर्णिया, गया और पटना स सेवा शुरू केने अछि।
15 अप्रैल से शुरू भ रहल स्काई फिशर क सेवा मे सबस पहिने भागलपुर विमान सेवा स जुडत। मुदा उम्मीद कैल जा रहल अछि जे बहुत जल्द बिहारक किछु आर नव शहर स विमान सेवा शुरू भ सकैत अछि, जाहि मे रक्सौल आ दरभंगा प्रमुख अछि। ओना पटना, गया आ पूर्णिया क बाद भागलपुर बिहार क चारिम शहर होएत जाहि ठाम स विमान सेवा शुरू होएत।
ज्ञात हुए जे इसमाद पिछला पांच साल स एहि अनुमति लेल मुहिम चला रखने छल। इसमाद क मानब अछि जे बिहार में 20 टा एहन रनवे अछि जेकरा किछु मरम्मतक उपरांत छोट विमान लेल मुहैया कराउल जा सकैत अछि, जखन कि गया, पूर्णिया आ पटना स विमान सेवा चालू अछि। दरभंगा सेवा लेल उपयुक्त अछि मुदा स्थानीय उदासीनता क कारण ओ उपेक्षित अछि। भागलपुर आ रक्सौल स शीघ्र सेवा शुरू हेबाक घोषणा बिहार कए आसमान जीतबाक सपना बहुत हद तक पूरा क देत।
स्काई फिशर कंपनी क अनुसार 15 अप्रैल स शुरू भ रहल ओकर विमान सेवा काफी सस्त अछि। 12 सीट वाला एयर टैक्सी क एकटा सीट क किराया 25 सौ स तीन हजार रुपया होएत। पटना एयरपोर्ट पर एयर टैक्सी कए पार्क करबा लेल आ देखरेख लेल जगह क आवंटन एक दू दिन मे भ जाएत, एकर बाद सेवा आरंभ क देल जाएत। फिलहाल कंपनी एकरा लेल बिहार सरकार स संपर्क में अछि। मुख्य एयरपोर्ट क दायरा कम हेबाक कारण स एयरपोर्ट अथार्टी जगह देबा स मना क देलक अछि, मुदा कंपनी स्टेट हैंगर मे जगह लेल राज्य सरकार स गप क रहल अछि। जगह उपलब्ध भेला पर 15 अप्रैल स जिला लेल एयर सेवा आरंभ क देल जाएत। एहि स पहिने प्टेस्ट आ प्रोमोशनल फ्लाइट सेहो चलाउल जाएत। कंपनी एकरा लेल खास तौर पर किराया कम रखलक अछि। कंपनी क अधिकारी क अनुसार अधिकतम तीन हजार टका क किराया मे कोनो व्यक्ति भागलपुर, पूर्णिया व गया स पटना आबि जा सकैत अछि। उड्डयन मंत्रलय की एजेंसी सेंटर फार एविएशन पालिसी सेफ्टी एंड रिचर्स क नेशनल एक्जक्यूटिव डायरेक्टर अतुल सिंह कहला जे मंत्रलय क सर्वे मे इ तथ्य सामने आयल अछि जे बिहार मे घरेलू उड़ान मे भारी संभावना अछि। सिंह कहला जे पटना स जिला मुख्यालय क उड़ान अधिकतम 30 स 50 मिनट क होएत।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर

नीक वा अधलाह - ज़रूर कहू जे मोन होय

comments

2 टिप्पणी

  1. Esamaad ke madhyam sa Darbhanga sa seho vimanseva suru hebak samaad bhetal chhal muda aai dhari ekar suruat nahi bhel.

Comments are closed.