15 सितंबर स शुरू होएत भागलपुर स हवाई सेवा

पटना : भागलपुर स हवाई सेवा 15 सितंबर स शुरू भ जाएत। एहि सेवा लेल अंतिम बाधा आइ खत्म भ गेल। विमान सेवा उपलब्ध करेनिहार निजी विमान कंपनी स्काइफिशर एयरवेज लिमिटेड आ राज्य सरकार क बीच समझौता पत्र पर हस्ताक्षर कैल गेल। सरकार कंपनी कए विमान सेवा क परिचालन लेल तमाम आवश्यक सुविधा उपलब्ध कराउत। ओतहि स्काइ फिशर राज्य क विभिन्न जिला मुख्यालय कए राजधानी स जोड़बा क संगहि एयर एंबुलेंस आ चार्टर विमान सेवा शुरू करत। फिलहाल कंपनी क योजना वाराणसी- गया-पटना- भागलपुर क बीच वायु सेवा शुरू करबाक अछि। यात्री क रुझान देखला पर अगिला चरण मे राज्य क अन्य शहर आ पड़ोसी राज्य क समीपवर्ती जिला कए सेहो विमान सेवा स जोड़ल जाएत।
सोमदिन कंपनी क दूटा विमान विमान दिल्ली पहुंच जाएत। विमानन संबंधी औपचारिकता पूरा केलाक बाद 15 सितंबर स विमान सेवा शुरू भ जेबाक उम्मीद अछि।
बिहार हैंगर मे राज्य सरकार दिस स सिविल विमानन विभाग क सचिव दीपक कुमार सिंह आ स्काइफिशर क प्रबंध निदेशक ऋषिकेश करार पर हस्ताक्षर केलथि। करार क अनुसार पटना एयरपोर्ट स्थित बिहार हैंगर मे कंपनी अपन विमान पार्क करबाक संगहि एकर मरम्मत आ देखभाल संबंधी काज क सकत। इ सुविधा पहिल बेर कोनो निजी कंपनी कए देल जा रहल अछि। विमानन सचिव दीपक कुमार सिंह क अनुसार इ पहिल मौका अछि जखन कोनो कंपनी पटना कए बेस बनाकए अपन सेवा शुरू करत। कंपनी क प्रबंध निदेशक ऋषिकेश कहला जे आपदा क स्थिति मे सेहो कंपनी राहत काज लेल अपन विमान मुहैया कराउत।
ओ कहला जे कंपनी अपन एकटा विमान कए नियमित सेवा मे लगाउत जखन कि दोसर विमान विशेष सेवा लेल रहत। विशेष सेवा क तहत एहि विमान कए निजी पार्टी, पर्यटन आ निजी यात्रा लेल किराया पर लेल जा सकत। किराया क संबंध मे ओ कहला जे नियमित सेवा और विशेष सेवा लेल किराया क निर्धारण एक दू सप्ताह मे भ जाएत। सूत्रक कहब अछि जे पटना स भागलपुर क किराया दू हजारक आसपास भ सकैत अछि।

इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments