मैलोरंग देखेलक पैघ नटकिया

Bada Natkiya Kaun

नई दिल्ली । झूठ, जाल, आ फरेब क एहि दुनिया मे सब अपना आप कए सब स पैघ साबित करबा मे लागल रहैत अछि, मुदा असली विजेता वैह होइत अछि जे एहि संसार रूपी मंच क सबस पैघ नटकिया होयत अछि। दिल्ली क श्री राम सेंटर मे काल्हि मैलोरंग रेपटर्री क प्रस्तुति पैघ नटकिया के मंचन मे किछु एहने समाद देल गेल।
सब दिन जेंका त्य समय स शुरू भेल एहि नाटक क शुरुआत प्रकाश झा ( निर्देशक मैलोरंग) क स्वागत अभिभाषण स भेल, दर्शक क अभिवादन क बाद नाटक क शुरुआत अतिथि स्वागत गान स भेल जे कि नाटक क हिस्सा छल। फेर शुरू भेल नाटक, आ मंच पर एलथि मुकेश आ सोनिया झा दूनू क हँसी ठिठोली क बीच दर्शक कए नाटक की अछि, आ केकरा बारे मे अछि एकर संबंध मे जानकारी देल गेल। ओकर बाद एक एक क कए मंच पर कलाकार आबैत गेलाह आ हँसी क फुहार छुटैत गेल। अनिल मिश्रा आ प्रवीण कुमार साहूकार आ हिसाबी क रोल मे अपन अभिनय क १०० प्रतिशत देलैथि ओतहि राजीव रंजन, दीपक ठाकुर सेहो अपन अभिनय क बेहतरीन प्रदर्शन केलैथि। प्रवीण क एक-एक टा चुटकी आ राजीव क एक एकटा लचक पर दर्शक पेट पकडि कए हसबा लेल मजबूर भ जाएत छल। ओतहि मुकेश क मुन्सियाही प्रवृति, संवाद आ मासूमियत बला संवाद दर्शक क कुर्सी पर से उछलवा स नहि रोकि सकल। नाटक क अंत मे मौउगी बनल मुकेश क अभिनय आ बोल दर्शक क लोट-पोट कए देलक।

सोनिया झाक वस्त्र विन्यास सेहो गज़ब क छल हुनकर रचनात्मकता अभिनय क संग इहो मे अछि से पहिल बेर देखार भेल। फेर ओ चाहे मुकेश क घाघरा चोली मे देखार होए वा राजीव रंजन क पेंट आ टी-शर्ट पर छपल नायिका क फोटो स। राजीव मिश्र क संगीत आ ध्वनि सेहो गज़ब छल एहन बुझायल जे कलाकार लोकनि बहुत दिन स एहि लेल मेहनत क रहल छलाह। रश्मि झा आ राजीव रंजन क स्वर एहि संगीत प्रधान हास्य नाटक मे चारि चान लगा देलक।

ज्ञात हो जे अविनाश चन्द्र मिश्र द्वारा लिखित नाटक बड़ा नटकीया कौन क मंचन कैक बेर विभिन्न प्रेक्षागृह मे होयत रहल अछि। अविनाश चन्द्र मिश्र क बेहतरीन नाटक मे इहो नाटक क नाम आबैत अछि। पैघ नटकिया के क नाम से एकर मैथिली अनुवाद केलैथि अछि मेलोरंग रेपटर्री क चीफ मुकेश झा संगेहि बता दी जे इ मंचन पहिल बेर एहि नाटक क मैथिली मंचन छल। एहि ठाम एकटा संयोग आर छल जे एकहि रेपटर्री द्वारा संभवत: पहिल बेर एकहिं नाटक क हिंदी आ मैथिली मंचन भेल छल।
कर्यक्रम क अंत मे जेना की बुझल अछि मैलोरंग सभ बेर अपन आगामी मंचन क सूचना दैत अछि। एहि बेर मैलोरंग अपन आगामी मंचन क तिथि क घोषणा त नहि केलक अछि मुदा एहि साल तीन टा नाटक क घोषणा केलक अछि जाहि मे विद्यापति क नाटक मणि मंजरी जेकर संभवत: पहिल मंचन होयत, दोसर सेक्सपियर क बहुचर्चित नाटक रोमियो जूलियट आ महेंद्र मलंगिया क देह पर कोठी खसा दिय शामिल अछि।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर

नीक वा अधलाह - ज़रूर कहू जे मोन होय

comments