सुर समाद लेल हकार

मैथिलीक सुपरिचित गीतकार मे युवा पीढ़ीक प्रमुख हस्ताक्षर छथि सुधीर जी। हिनक गीत विभिन्न माध्यम स’ मैथिलीक प्राय: सभ घर-अँगना, दुरा-दरबज्जा, टोल-परोस, गाम-घर, हाट-बजारमे बजैत- गनगनैत रहैत छनि। कतौ ने कतौ, कोनो ने कोनो क्षण अहाँ ज़रूर हिनक गीत सुनि ठमकल होयब। मोन मे ई विचार हिलकोर मारनहि होयत जे ई मधुर गीतक सुन्दर शब्दक रचना के केने हेताह? मुदा गीत प्राय: गीतकारक नाम स’ नै हम सब गीत के मधुर आवाज़ देनिहारक नाम स’ मोन रखैत छी। मैथिल श्रोता प्राय: गीत कए मधुर आवाज़ देनिहार स’ नीक जेना परिचित छी, मुदा गायक लोकनि कए सुन्दर रचना देनिहार स’ नीक जेना भिज्ञ नै भ’ पबैत छी। मैलोरंग एकर बेगरता स’ नीक जेना अवगत भेल। तेँ एहि बातक खगता कए भरबाक लेल अपन कार्ययोजना मे ‘सुर समाद’ जोड़लक अछि। मैलोरंगक ई सुर समाद आयोजित अछि दिनांक 27 मई, 2012 (रविदिन) क’ सायं 06.30 बजे स’। स्थान अछि : राजेन्द्र भवन ट्रस्ट, 210, दीनदयाल उपाध्याय मार्ग, नई दिल्ली – 110002।
ई जानि आश्चर्य होयत जे मैथिलीक युवा गीत रचनाकार सुधीर क तीन स बेसी गीत क एखन धरि रेकर्डिंग भ’ चुकल छनि, जे हम सब कोनो ने कोनो माध्यम स’ कोनो ने कोनो अवसर पर सुनैत आबि रहल छी। जखन एतेक गीतक रेकर्डिंग भेल अछि तखन शायदे कोनो एहन गायक बा कि गायिका हेता या हेतीह जे सुधीर क सुमधुर गीत कए अपन आवाज नहि देने हेताह वा हेतीह। गीतक ई संख्या इहो सूचित करैत अछि जे एतेक गीत लेल कैसेटक प्राय: सब कम्पनी (मैथिली लेल) कए सुधीर क गीत कए अपना संग लेब’ पड़ल होयतै।
एखन तक एहि तरह क आयोजन प्राय: नै भेल अछि अप्पन भाषा मे, तेँ एहि लेल मैलोरंग प्रथम प्रयास केलक अछि। अपन दिल्लीक प्रेक्षक लेल मैलोरंग एहि रचनाकारक किछु चयनित गीत रचना केँ सुमधुर आवाज़ देनिहार गायक आ गायिका लोकनि कए एक मंच पर अनबाक प्रयास केलक अछि।
सुधीर क गीत कए मैलोरंग मंच पर आवाज देताह मैथिलीक सुपरिचित गायक / गायिका सब, जिनका स’ अहाँ लोकनि नीक जेना परिचित छी: सुरेश पंकज, देवानंद, रश्मि रानी, धनिकलाल मंडल, सुनील पवन, कुमकुम मिश्रा, रिचा ठाकुर, अंजू झा, आमोद झा आ विकाश झा। एहि आयोजन मे उस्ताद जौहर अली खान सन निस्सन वायलिन वादक सुधीर क गीत रचना पर अपन वायलिनक तार स’ ध्वनि तरंगित करताह। दिल्लीक प्रेक्षक गण लेल ई रोमांचक क्षण होयत।
मैलोरंग द्वारा जारी विज्ञप्ति मे कार्यक्रम स्‍थल तक पहुंचबा लेल दिशा-निर्देश देल अछि जाहि मे कहल गेल अछि जे एहि स्थान पर पहुँचबाक लेल मैट्रो माध्यम स’ प्रगति मैदान मैट्रो स्टेशन वा मण्डी हाउस मैट्रो स्टेशन उतरि सकैत छी। एहि दूनू स्टेशन स’ लगभग 10 मिनट पैदल चलला बाद ई स्थान अबैत अछि। अपन गाड़ी स’ सेहो आबि सकैत छी जे कि रास्ता अछि कनाट प्लेस आ आ.टी.ओ दूनू दिस स’। बस स’ सेहो आई. टी.ओ. आयल जा सकैत अछि।

maithili news, mithila news, bihar news, latest bihar news, latest mithila news, latest maithili news, maithili newspaper

नीक वा अधलाह - ज़रूर कहू जे मोन होय

comments