सिविल कोर्ट कर्मी कए छठा वेतन क तोहफा

पटना। राज्य सरकार आब सिविल कोर्ट क कर्मी पर मेहरबान भ गेल अछि। हुनकरो राज्यकर्मी क भांति छठा वेतन क फायदा देबाक निर्णय कएल गेल अछि। एहि स करीब 9500 कर्मी कए वेतन वृद्धि क लाभ भेटत। लाभ ओहि तिथि स भेटत, जेहि तिथि स राज्यकर्मी कए भेट रहल अछि। सर्वोच्च न्यायालय आ पटना उच्च न्यायालय क आदेश क आलोक मे इ निर्णय कएल गेल अछि। एखन धरि हुनका शेट्टी कमीशन क सिफारिश क आलोक मे वेतन क भुगतान भ रहल छल। गुरुदिन क राज्य मंत्रिपरिषद क बैठक मे एहि स संबंधित प्रस्ताव कए मंजूरी देल गेल। एकरा अतिरिक्त नियत वेतन पर नियुक्त शिक्षक क वेतन वृद्धि, प्रथम श्रेणी स पास होबै वाली छात्रा कए दस हजार टका, शहरी किसान कए डीजल अनुदान, पटना मे अंतरराष्ट्रीय स्तर म्यूजियम क स्थापना क प्रस्ताव कए सेहो मंजूरी देल गेल, जेकर संबंध मे रिपोर्ट कार्ड पेश करैत मुख्यमंत्री 24 नवंबर कए घोषणा केने छलाह।
बैठक क बाद कैबिनेट सचिव गिरीश शंकर कहला जे शैक्षणिक सत्र 2008-09 मे राज्य क माध्यमिक विद्यालय स बिहार विद्यालय परीक्षा समिति क दसवीं कक्षा मे प्रथम श्रेणी स पास होबै वाली 37 हजार 707 छात्रा कए मुख्यमंत्री बालिका प्रोत्साहन योजना क तहत प्रति छात्रा दस हजार टका प्रोत्साहन राशि देल जाइत। एकरा लेल 37.70 करोड़ टका क मंजूरी देल गेल अछि। राज्य क माध्यमिक, उच्च माध्यमिक आ प्राथमिक विद्यालय क 2 लाख 21 हजार 500 शिक्षक कए एक अप्रैल 2010 स एक हजार टका अतिरिक्त मासिक मानदेय क भुगतान कएल जाइत। इ राशि नियमित वृद्धि क अतिरिक्त होइत। माध्यमिक आ उच्च माध्यमिक विद्यालय क करीब 11500 शिक्षक क लेल 28.20 करोड़ आ प्रारंभिक विद्यालय क 2.10 लाख नियोजित शिक्षक क लेल 142 करोड़ टका क मंजूरी देल गेल अछि।
चालू वर्ष क रबी मौसम मे सरकार शहरी इलाका मे खेती करै वाला किसान कए सेहो 15 टका प्रति एकड़ क दर स तीन सिंचाई क लेल अधिकतम 450 टका डीजल अनुदान देबाक निर्णय कएल गेल अछि। पहिने इ सिर्फ ग्रामीण किसान क लेल छल। शहरी इलाका मे प्रखंड विकास पदाधिकारी क माध्यम स राशि क वितरण होइत। चिह्नवाक काज सेहो हुनके रहत। कुल डीजल अनुदान क लेल 318 करोड़ टका क मंजूरी देल गेल अछि। संग खरीफ विपणन मे धान-चावल क अधिप्राप्ति क लेल केन्द्र सरकार द्वारा निर्धारित न्यूनतम समर्थन मूल्य आ बोनस क अतिरिक्त राज्य सरकार किसान क 50 टका प्रति क्विंटल क दर स अतिरिक्त प्रोत्साहन राशि क लेल 35 करोड़ टका क मंजूरी देल गेल अछि। पटना मे अंतरराष्ट्रीय स्तर क संग्रहालय क निर्माण क प्रस्ताव कए सेहो कैबिनेट हरी झंडी द देल गेल।
बैठक मे पटना दंत महाविद्यालय आ अस्पताल मे भारतीय दंत परिषद क मापदंड क अनुरूप शैक्षणिक आ गैर शैक्षणिक पद कए मिलाकर 66 अतिरिक्त पद क सृजन क मंजूरी देल गेल। स्वास्थ्य विभाग क एकटा अन्य प्रस्ताव पर चर्चा क बाद इंदिरा गांधी आयुर्विज्ञान संस्थान शेखपुरा क क्षेत्रीय कैंसर संस्थान कए समृद्ध बनबाक लेल चालू वर्ष मे केमोथेरापी डे-केयर यूनिट क निर्माण क लेल 4.14 करोड़ टका क मंजूरी देल गेल।

नीक वा अधलाह - ज़रूर कहू जे मोन होय

comments