सात करोड क रंगदारी प्रकरण : आगि जरूर अछि, मुदा धधरा नहि

ज्ञानेश्‍वर
पटना।
काफी समय क बाद रंगदारी क मांग फेर स चर्चा मे अछि । केन्द्र मे जेल मे बंद जदयू क पूर्व विधायक मुन्ना शुक्ला छथि । दू करोड़ स शुरु भेल कहानी सात करोड़ क मांग तक जा पहुंचल अछि । समय क हिसाब स इ चार नवंबर कए जदयू क आयोजित रैली स जुडि गेल अछि । मीडिया विशेष क इलेक्ट्रानिक हल्‍ला बोल क भूमिका मे अछि । विपक्ष कए सेहो मुद्दा भेट गेल अछि।
शिकायती संत लाल यादव छथि,जे मुन्ना शुक्ला क प्रभाव वाला क्षेत्र मे एकटा शैक्षणिक संस्थान क निर्माण करा रहल छथि । मुदा पूरा मामला मे किछु झोल सेहो दिखा रहल अछि । पुलिस प्रारंभिक जांच क आधार पर आरोप क पुष्टि केलक अछि,संगहि विस्‍तारित जांच क आवश्‍यकता सेहो महसूस केलक अछि। बिहार क अंडरवर्ल्ड आ एकर किरदार क हैसियत कए बहुत करीब स देखनिहार छी। संत लाल यादव क संपदा कए सेहो हद तक जानैत छी। मांग भेल होएत, एहि स असहमत नहि भेल जा सकैत अछि, मुदा सात करोड़, इ नहि मानल जा सकैत अछि। आओर ओ सेहो अधिकार रैली क खर्चा लेल इ त हजम नहि भ सकैत अछि ।
बिहार क अंडरवर्ल्ड कए जेतबा महारथी एखन धरि भेल छथि, हम नहि जनैत छी जे कियो एखन धरि सात करोड़ क मांग करबाक कूवत रखैत छथि । सात करोड क धन राशि कियो एहिना नहि मांगि सकैत अछि आ नहि कियो एहिना द सकैत अछि। शुक्र अछि जे बिहार मे एखन अपहरण इंडस्‍ट्री बंद अछि,मुदा तहिया चलैत छल तखनो सात करोड़ क फिरौती नहि वसूलल जा सकल छल। अपहरण इंडस्ट्री क चर्चा एहि संदर्भ मे हम एहि लेल केलहुं जे मुंहमांगी राशि अदा करबाक सर्वाधिक मजबूरी मे परिजन तखने होइत छथि। बहुत रास धनाढ्य आ हुनकर कारोबार कए सेहो जानैत छी, से एकर सेहो पता अछि जे सात करोड़ अदा करबाक क्षमता रखनिहार बिहार मे केतबा छथि। फेर संत लाल यादव त हाल क दिन क निकलल तारा छथि,सितारा बनबा मे एखन देरी अछि ।
जहां धरि हमरा भेटल फीडबैक अछि त इ दूनू गोटेक संबंध किछु दिन पहिने तक बहुत बढिया छल। दूनू एक-दोसर क मददगार बनल छलाह । गप कतए बिगडल, पुलिस क विस्‍तारित जांच रिपोर्ट मे एकर राजफाश भ सकैत अछि । गप मुकदमा तक एहि लेल पहुंच गेल किया त मुन्ना् शुक्‍ला क तामस सातम आसमान पर जा पहुंचल अछि। तामस जान पर नहि आबि जाए एहि लेल रिपोर्ट दर्ज भ गेल । अधिकार रैली निकट भेलाक कारण हंगामा मचि गेल । स्वयं नीतीश कुमार कए जांच क आदेश देब मजबूरी भ गेल।
बिहार मे भेल बहुत रास रेला-रैली कए हम करीब स देखने छी । लालटेन आ तेल पिलावन रैली सेहो मोन अछि । अधिकार रैली क तैयारी कए देख एकटा समानता होर्डिंग क कब्जा पर देखा रहल अछि । पूर्व क भांति किस्‍म–किस्म क जीव-जंतु सड़क आ पोस्‍टर-बैनर पर आबि गेलाह अछि । जिनकर नाम काफी अछि, ओ बड़ रुप मे मौजूद छथि। रैली कोनो तमाशा नहि बनि जाए, एहि पर खास सतर्कता जदयू कए रखबाक चाही । नीक गप इ जे रैली रविदिन छी । दुकान सब बंद रहत,से शिकार बनबा स बचि जाएत।
मुन्ना् शुक्ला प्रकरण कए छोडि दी त एखन धरि कोनो ज्ञात स्रोत स कोनो धनाढ्य इ जानकारी नहि देलथि अछि जे रैली लेल कोनो नेता/ दबंग क फोन पैघ राशि कए चुकता करबा लेल आयल अछि। हां, एतबा जरूर जे कईटा सामान्य किस्‍म क विधायक कए इ विलाप करैत जरुर सुनलहुं जे माल त अफसर कमा रहल अछि,खर्च क भार ओ उठा रहल छथि। इ स्वीकारबा मे कोनो संकोच नहि जे एनडीए-1 क तुलना मे एनडीए-2 क पुलिसिंग बेहद कमजोर अछि। तखनो ओ दिन एखन घुरल नहि अछि जे मोबाइल पर कोनो गुमनाम नंबर स फोन एला पर कंपकंपी छूट जाइत छल। जखनकि सच इ सेहो अछि जे न केवल मुन्ना शुक्‍ला, बल्कि सबटा दबंग लग जेलों मे फोन सबदिन मौजूद रहल । हां, मुदा जेल स राति मे घर जेबाक आ दिन मे मार्कट जाकए गदर काटबाक छूट आब नहि अछि । आपराधिक-सह-राजनीतिक बंदी मे यातना त सर्वाधिक शहाबुद्दीन भोगि रहल छथि।
चार नवंबर क रैली शांति स भ जाए इ नीतीश कुमार सेहो चाहैत हेताह। जिला क यात्रा मे हुनका विरोध क सामना करबाक अनुभव अछि। विरोध रोकबाक जे तरीका पुलिस अपनेलक, ओ लोकतांत्रिक नहि छल । ओहुना गुजरात क नतीजा क बाद समीकरण आ मुद्दा बदलत, एहि लेल बहुत हो-हल्‍ला क एखन जरुरत ककरो नहि बुझा रहल अछि।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna

नीक वा अधलाह - ज़रूर कहू जे मोन होय

comments