सपना भेल साकार, छपरा रेल चक्‍का कारखाना मे उत्‍पादन शुरू

पटना। सारण जिलाक दरियापुर स्थित बेला रेल चक्का कारखाना मे पहिया क उत्पादन शुरू भ गेल। एहि कारखाना स पहिल खेप मे छहटा पहिया जखन तैयार भ निकलल त एकटा पैघ सपना पूरा भ गेल। मुख्य मेकेनिकल इंजीनियर एके सिंह कहला जे एहि ठामक सबटा यूनिट कए एक संग चलबा पर काज क विस्‍तार होएत। ओ कहला जे एखन छह दिन धरि इ ट्रायल चलत जाहि मे करीब 12-13 सौ पहिया क उत्‍पादन होएत।
ज्ञात हुए जे शनिदिन वैदिक मंत्रोच्चारण क बीच निर्माण काज क शुभारंभ भेल छल। चिमनी स जखन धुआं निकलल त ओहि ठाम उपस्थित कईटा मजदूरक आंखि नोरा गेल। करीब तीन-चारिटा अधिकारी भोर दस बजे दहकैत भट्ठी मे लोहा कए गलेबाक काजक शुरूआत केलथि। एकर बाद अधिकारी आ एलएनटी क इंजीनियर अपन-अपन काज मे लागि गेलाह। 15 हजार करोड़ क लागत स तैयार रेल कारखाना मे पहिया क उत्पादन काज फिलहाल ट्रायल क रूप मे शुरू कैल गेल अछि। पहिल खेप मे तैयार छह टा पहियाक संबंध मे अधिकारीक कहब अछि जे सबटा पहिया सब तरह स ठीक अछि। पहिया क ढांचा आ गुणवत्‍ता देख इंजीनियर आ कर्मी मे काफी उल्लास अछि।
जानकारी क अनुसार बेला रेल चक्का कारखाना स गत 19 जुलाई कए पहिया उत्‍पादन सुनिश्चित छल, मुदा कोनो कारणवश काज शुरू नहि भ सकल। एकर बाद 21 जुलाई क तिथि निर्धारित कैल गेल। 21 कए मशीन मे किछु तकनीकी खराबी आबि गेल जाहि स काज क शुभारंभ नहि भ सकल। एकर बाद जर्मनी स एक्सपर्ट बजाउल गेल। एक्सपर्ट काफी प्रयास क मशीन कए ठीक केलथि। एकर बाद कारखाना स पहिल खेप मे छहटा सही पहिया निकालल गेल। एहि संबंध मे आरएलबीयू क असिस्टेंट इंजीनियर सुजय कुमार सिंह क कहब अछि जे सबटा पहिया मानक पर ढार उतरल अछि। ओ कहला जे एखन एक दिन मे कम स कम 30टा पहिया निकालबाक उम्मीद अछि। ओ कहला जे सबटा मशीन ठीक तरह स काज क रहल अछि। जर्मन एक्सपर्ट क देखरेख मे फिलहाल मशीन क संचालन भ रहल अछि। ज्ञात हुए जे जुलाई 2009 मे तत्कालीन रेल मंत्री लालू प्रसाद एकर शिलान्यास केने छलाह।

maithili news, mithila news, bihar news, latest bihar news, latest mithila news, latest maithili news, maithili newspaper

नीक वा अधलाह - ज़रूर कहू जे मोन होय

comments