सदन मे गूंजल दरभंगा क उपेक्षा क मुद्दा

पटना। बिहार विधानसभा आ विधान परिषद मे दरभंगाक प्रतिनिधि शहर स ल कए गाम तक क ज्वलंत समस्या पर सरकार स उत्‍तर पूछलथि। विनोद चौधरी, इजहार अहमद आ गोपाल जी ठाकुर सरकार पर एक एक करि सवालक झडी लगा देलथि। दरभंगा जिलाक प्रतिनिधिक एहन सक्रियता हालक वर्ष मे देखबा लेल नहि भेटल छल। खासबात इ सेहो रहल जे जनप्रतिनिधि जे मसला उठेलाह ओ आम जनता स जुडल छल न कि कोनो खास समूह स। सबस पहिने विधायक इजहार अहमद प्रधानमंत्री सडक योजना क तहत निर्मित सिसौनी-पोखराम स बहेड़ी मुख्य पथ कए जोड़बा लेल बनल सडक क हाल पर सरकार स जवाब मंगलथि। डा. अहमद ग्रामीण कार्य मंत्री स पूछलथि जे सड़क बनलाक दू तीन मास बाद सडक एतबा जर्जर कोना भ गेल। ओ कहला जे एहि सडक मे घटिया सामग्री क उपयोग भेल अछि। एहि पर मंत्री कहब छल जे सड़क क निर्माण मानक क अनुसार भेल अछि। सडक अगर जर्जर भ गेल अछि त एकर कारण भारी वाहन आ यातायात अछि। एहि पर डा.अहमद भड़कि गेलाह आ मंत्री कए कहलाह जे अधिकारी अहां कए गुमराह क रहल छथि, जमीनी सच्‍चाई स अहां दूर छी। डा अहमद क तेवर देख मंत्री कहला जे प्रधान सचिव स सड़क निर्माण क जांच होएत आ अहां हुनकर संग रहब।
एकर बाद बेनीपुर स्थित कर्पूरी ठाकुर बाबा नागार्जुन स्टेडियम क जीर्णोद्धार क संबंध मे सरकार स सवाल पूछल गेल। एहि संबंध मे विधायक गोपाल जी ठाकुर क सवाल क उत्‍तर दैत खेल मंत्री सुखदा पांडेय कहलथि जे निधि उपलब्ध भेलाक तुरंत बाद उक्त स्टेडियम क जीणोद्धार कार्य लेल जिला प्रशासन कए कहल जाएत। मंत्री सुखदा पांडेय कहलथि जे शांति नायक उच्च विद्यालय बहेड़ी क प्रांगण मे स्टेडियम क निर्माण कार्य लेल 24 लाख 97 हजार टका उपलब्ध कराउल गेल अछि।
दोसर दिस विधान परिषद मे सेहो दरभंगा क नाम गुंजल। विनोद कुमार चौधरी दरभंगा स संबंधित कईटा मसला एक संग उठेलथि। ओ नगर विकास विभाग क मंत्री स डीएमसीएच क स्त्री आ प्रसूति विभाग मे जल जमाव आ रामबाग परिसर स्थित धार्मिक स्थल मे पसरल गंदगी पर सरकार स जबाव मंगलथि। विनोद कुमार चौधरी कहला जे डीएमसीएच क गायनिक वार्ड मे जल जमाव अछि। एहि स रोगी आ हुनकर परिजन कए भारी कठिनाई होइत अछि। एकर अलावा केडिया सर्जिकल स होटल पी एण्ड पी तक सड़क पर सेहो जल जमाव रहैत अछि। एहि पर नगर विकास मंत्री प्रेम कुमार कहला जे डीएमसीएच परिसर क जल निकासी अल्लपट्टी रेलवे पुल स पूरब छपरा घाट दिस होइत अछि। एहि मे निजी स्वामित्व क किछु भूमि अछि। भूमि क अधिग्रहण करि नाला बनाउल जा रहल अछि। नाला निर्माण क 82 प्रतिशत काज पूरा भ चुकल अछि। श्री चौधरी क सूची लंबा छल ओ शहर क राम बाग स्थित ऐतिहासिक धार्मिक स्थल गोसाउनिक घर क सामने अनाधिकृत लोक द्वारा व्यावसायिक आयोजन पर सवाल उठेलथि आ कहला जे एहि आयोजन क कारण जूठ पत्तल आ दुर्गध लोकक मंदिर परिसर क प्रति आस्‍था प्रभावित क रहल अछि। एहि पर मंत्री कहला जे कानूनी कार्रवाई करबा लेल दरभंगा क जिला प्रशासन आ नगर आयुक्त कए पत्र लिखल जा रहल अछि। परिसर क आस्‍था कोनो हाल मे बहाल राखल जाएत। दूनू सदन मे जाहि रूप स दरभंगाक मसला उठि रहल अछि इ एकटा सकारात्‍मक संदेश द रहल अछि। उम्‍मीद अछि जिलाक बाकी प्रतिनिधि सेहो सदन मे समस्‍या कए उठेबाक प्रयास करताह।

नीक वा अधलाह - ज़रूर कहू जे मोन होय

comments

2 टिप्पणी

  1. aabo jagu mithila washi ham sab mithila washi sab s aagu chhi dharti s l k chandrma tak pahuch gelo aabo bachabu apan bhasha ke apan bachha ke jaroor sikhabu apan matri bhasha hamar vinti achhi . jai mithila.

  2. apan matri bhoomi ke nahi bisharu yo mithila washi ant samay me maa ke mamta kaj aayat. ki hamar mata ke tarah kaj aayat

Comments are closed.