लनामिवि भवन क रखरखाव लेल पांच करोड़ स्वीकृत

दरभंगा। आखिरकार बिहार सरकार क ध्‍यान कामेश्‍वर नगरक दुर्दशा पर गेल। सरकार एहि परिसर मे स्थित महल आ भवन क रखरखाव लेल पांच करोड टका देबाक घोषणा केलक अछि। विधान परिषद सदस्य प्रो.विनोद कुमार चौधरी लनामिवि क धरोहररूपी महल आ भवन क दशा सुधारबाक मांग सदन मे करैत रहलाह अछि। बुधदिन सेहो विधान परिषद मे 2012-13 क शिक्षा बजट पर बहसक दौरान ओ एहि मामला कए उठेलाह। प्रो.चौधरी लनामिवि क भवन क रखरखाव पर सरकार कए ध्‍यान देबाक मांग केलथि। एहि पर शिक्षा मंत्री पीके शाही सदन कए जानकारी देलथि जे लनामिवि क भवन क रखरखाव लेल सरकार तत्‍काल पांच करोड़ टका द रहल अछि। ज्ञात हुए जे इसमाद पिछला कई मास स ललित नारायण मिथिला विश्‍वविद्यालय स्थित महल आ भवनक स्थिति पर समाद दैत रहल अछि। इसमाद बेर बेर कहलक अछि जे विश्‍वविद्यालय मे नरगौना महल सहित कईटा एहन मकान अछि जेकर रख रखाव नहि भ पाबि रहल अछि। नरगौना पैलेस क रंग रोगन तक कई साल स नहि भ सकल अछि। कहियो महल रहल नरगौना आइ एकटा जर्जर मकान बनि चुकल अछि। किछु एहने स्थिति यूरोपियन गेस्‍ट हाउस आ हेड आफिस क सेहो अछि। विश्‍वविद्यालय प्रशासन लेल एहि धरोहरक रक्षा लेल कोनो योजना नहि अछि। एहन मे आशंका प्रबल अछि जे सरकार जे टका विश्‍वविद्यालय कए द रहल अछि ओहि स भवन क रख रखाव भ सकत। इतिहास गवाह अछि जे विश्‍वविद्यालय प्रशासन भवनक रख रखाव पर सबस बेसी खर्च कुलपति निवास लेल करैत अछि। एहन मे एहि टकाक पैघ हिस्‍सा सेहो कुलपति आवास मे खर्च भ सकैत अछि। विश्‍वविद्यालयक मद स्‍थानांतरणक इतिहास सेहो कम गौरवशाली नहि अछि ताहि लेल एकरो उम्‍मीद अछि जे रख रखावक नाम पर किछु नव निर्माण कैल जा सकैत अछि जे एहि भवन आ महलक सौंदर्य कए बढेबाक बदला मे खत्‍म क सकैत अछि। कुल मिला कए जनप्रतिनिधि आ दरभंगाक जनता कए विश्‍वविद्यालय प्रशासन पर नजरि रखबाक जरुरत अछि जे ओ पांच करोड टकाक उपयोग ओहि मद मे करै जाहि मद लेल इ राशि देल जा रहल अछि। उम्‍मीद अछि विश्‍वविद्यालय परिसर कए बचेबाक लेल जनता निगरानी करत।

नीक वा अधलाह - ज़रूर कहू जे मोन होय

comments

1 टिप्पणी

  1. नीक बात ।

    आब देखा चाही कि ई राशि अपेक्षित लक्ष्य लेल कतबा आ कहिया धरि खर्च कयल जाइत अछि ।

Comments are closed.