लखीसराय आ बेगूसराय मे बनत नव औद्योगिक पार्क

पटना। बिहार सरकार आब अपन ध्‍यान धीरे-धीरे पटना आ आसपास क जिला स आगू लगा रहल अछि। सरकारी अधिकारीक कहब अछि जे सरकार लखीसराय आओर बेगूसराय मे नव औद्योगिक पार्क क निर्माण शुरू करि रहल अछि। एकरा लेल जमीन अधिग्रहण क काज अगिला मास स शुरू भ सकैत अछि। दूनू जिलाक जिलाधिकारी कए एहि संबंध मे आदेश द देल गेल अछि। दूनू जिलाधिकारी एकरा लेल जमीन अधिग्रहण क खाका तैयार करबा मे जुटि गेल छथि। अधिकारीक अनुसार बिहार मे आब छोट छोट काफी निवेश भ रहल अछि आ पैघ उद्योग कए बिहार मे निवेश क लेल प्रयास भ रहल अछि। एकरा लेल सबस पहिने जमीन चाही। ओ कहला जे पैघ उद्योग कए बेसी जमीन क जरूरत होइत अछि, मुदा बिहार मे जनसंख्या घनत्व काफी अछि। एहि लेल जरूरत क मुताबिक जमीन हासिल करबा मे काफी दिक्कत होइत अछि। हालांकि भूमि बैंक स बहुत किछु आसान भ जाएत। सरकार जमीन लेल भूमि बैंक बना रहल अछि जाहि लेल 1500 करोड टका सेहो आवंटित कैल जा चुकल अछि। सरकारक लक्ष्‍य एक साल मे कम स कम 1000 एकड भूमि एहि बैंक मे जमा करबाक अछि। अधिकारी कहला जे, सरकार अगिला 5 साल क दौरान 5,000 एकड़ भूमि जुटेबाक लक्ष्‍य रखलक अछि। सब साल करीब 1,000 एकड़ भूमि बैंक मे जोडबाक लक्ष्‍य अछि। सरकार हर जिलाधिकारी कए एहि सालक अंत धरि 100-100 एकड़ भूमि क इंतजाम करबाक आदेश जारी करि देलक अछि।
एकर संगहि अधिकारी इ सेहो कहब अछि जे पैघ उद्योग क बिना राज्य क तेज विकास मुमकिन नहि अछि। एहि लेल राज्य क नई उद्योग नीति मे हुनका लुभेबा लेल कईटा रियायतक प्रावधान कैल जा रहल अछि। नवका उद्योग नीति मे तरह तरह क रियायत क घोषणा करए जा रहल अछि। सूत्रक मानि त जून मे एकर एलान भ सकैत अछि आओर अगिला साल स इ प्रभावी सेहो भ सकैत अछि। नव औद्योगिक नीति निर्माण स जुड़ल जानकारी दैत अधिकारी कहला जे राज्य मे पैघ निवेश कए बढ़ावा देबा लेल सरकार पूंजी सब्सिडी बढेबा लेल तैयार अछि। एखन धरि कंपनी कए 5-10 फीसदी पूंजी सब्सिडी देल जा रहल अछि मुदा नव नीति मे सरकार 500 करोड़ स बेसी क निवेश पर नीक छूट देबा लेल तैयार अछि। एकर अलावा राज्य सरकार अपन नव नीति मे बिहार मे निवेशक लेल लालफीताशाही क मुश्किल सेहो कम करैजा रहल अछि। अधिकारी कहला जे 2006 मे एकल खिड़की कानून आयल छल। हालांकि एखन धरि इ प्रणाली कारगर नहि भ सकल अछि। सरकारक कोशिश अछि जे निवेशक कए सरकारी दफ्तरक चक्कर स बचाउल जाए। एकरा लेल एकल खिड़की व्यवस्था कए मजबूत कैल जा रहल अछि। संगहि आवेदन क निपटारा लेल सेहो एकटा तय समयसीमा तय कैल जा रहल अछि, जाहि स निवेशक क समय बरबाद हेबा स बचत आ निवेश क प्रक्रिया सेहो तेज भ सकत।

नीक वा अधलाह - ज़रूर कहू जे मोन होय

comments