रैयाम क बाद आब लोहट मिल लूटबाक कोशिश

पटना । मिथिला मे औद्योगिक क्रांति क जनक लोहट चीनी मिल कए लूटबाक प्रयास भ रहल अछि। बिहार सरकार बंद पडल चीनी मिल कए खोलबाक सपना देखा दरअसल पुरान मिल क सामान कए लूटबाक नीति लागू क देलक अछि। एहि नीति कए लागू करबा मे किछु स्‍थानीय विधायक काफी सक्रिय छथि। रैयाम आ सकरी चीनी मिल पहिने लूटल जा चुकल अछि, आब पंडौल प्रखंड क बंद पडल लोहट चीनी मिल कए सेहो लूटबाक प्रयास तेज भ गेल अछि। सरकार पहिने कहलक जे एहि मिल कए डालमिया ग्रुप ल रहल अछि। बाद मे इ साफ भ गेल जे डालमिया एहि मिल लेल इच्‍छुक नहि अछि। लोक कए लागल जे सरकार मिल खोलबा लेल चिंतित अछि आ कियो मिल लेबा लेल तैयार नहि अछि, जखन कि इ पूरा नाटक छल। सरकार इ मिल कए बेचबाक कोनो प्रयास नहि केलक। इंसोल इनर्जी प्राइवेट लि. फरीदाबाद कए इ मिल औनेपौने दाम मे बेचबा लेल डालमिया क नाम सामने आनल गेल छल। मधुबनी जिला क एकटा विधायकक करीबी एहि कंपनी क मालिक उदय मोहन झा मिल खोलबा स बेसी मिल क पुरान मशीन आ सामान बेचबा लेल भूमि तैयार क रहल छथि। हुनका प्रदीप चौधरी स अनुभव सेहो भेटल अछि जे कोना मिल खोलबाक सपना देखा मिल क सामान बेचल जा सकैत अछि। श्री चौधरी रैयाम चीनी मिलक ईंट ईंट बेच लेलथि। जानकारक कहब अछि जे इंसोल इनर्जी प्राइवेट लि. जेतबा मे इ मिल लेलक अछि ओहि स डेढ गुना बेसी टका त ओ मिलक मशीन बेच कए कमा लेत, जमीन बुझू जे मंगनी मे कब्‍जा केने रहत। लोहट मिल कए जेना चुपचाप बेचबाक काज भेल ओ अपने आप मे संदेह उत्‍पन्‍न करैत अछि। इसमाद 28 मार्च 2012 कए इ समाद देने छल जे डालमिया कए लोहट चलेबा लेल 30 सालक लीज पर देल जा रहल अछि। मुदा इसमाद नवंबर मे इ सूचना सेहो देलक जे डालमिया ग्रुप इ साफ क देलक अछि जे ओ लोहट चलेबा लेल इच्‍छुक नहि अछि। एहि बीच बिहार सरकार एहि मिल कए इंसोल इनर्जी प्राइवेट लि. कए बेच देलक। सवाल उठैत अछि जे एतबा जल्‍दी इ फैसला कोना भ गेल। सरकार जनता क आंखि मे भ्रम पैदा करबा लेल डालमियाक नाम सामने अनने छल।
लोहट मिल मे सेहो शुरुआत रैयाम जेकां भेल। बिना कोनो तामझाम क प्रबंधन दिलीप कुमार झा 13 नवंबर कए मिल मे पूजा केलथि। फेर दिसंबर मे मिल परिसर क सफाई शुरू भ गेल। दिलीप झा सेहो प्रदीप चौधरी जेकां दावा केलथि जे जनवरी, 2013 मे तकनीशियन क एकटा टीम द्वारा मिल कए आधुनिकीकरण करबाक प्रक्रिया प्रारंभ कैल जाएत। मुदा जनवरी की मई आबि गेल, भेल किछु नहि। प्रबंधन बस मौका क फिराक मे रहल जे नव मशीन लगेबाक नाम पर पुरान मशीन कए परिसर स बाहर कोना ल जाई। ओना देखेबा लेल प्रबंधन मिल मे एकटा गार्ड क नियुक्ति केने अछि आ साफ सफाई किछु किछु होइत रहैत अछि जाहि स लोक कए इ बुझबा मे अबैत रहै जे मिल खुलबाक प्रक्रिया चालू अछि। मुदा मिल प्रबंधनक सबटा दावा झूठ क किताब तखन बनि जाइत अछि जखन एकर तकनीकी पहलू पर गप करबा लेल ककरो से संपर्क करू। लोहट चीनी मिल कए कुसियारक कोनो क्षेत्र एखन धरि आवंटित नहि भेल अछि। मिल लग जेतबा जमीन अछि ओहि स मिल मात्र एक मास चलि सकैत अछि। क्षेत्र आवंटनक मामला इ अछि जे लोहट लग जे पहिने क्षेत्र छल ओ क्षेत्र आइ रैयाम आ सकरी कए आवंटित क देल गेल अछि, एखन मे लोहट लेल कोनो आसपासक क्षेत्र नहि बचैत अछि। सवाल उठैत अछि जे बिना क्षेत्र आवंटन कए मिल कोना स्‍थापित या चालू भ सकैत अछि। दोसर जे प्रदीप चौधरी जेकां उदय मोहन झा कए सेहो एहि कारोबारक कोनो अनुभव नहि अछि। कुल मिला कए देखल जाए त इ मिल चलेबा लेल नहि बल्कि लूटबा लेल कीनल गेल अछि आ एहि लूट मे मधुबनी क एकटा विधायक क अहम भूमिका अछि। ओना रैयाम चीनी मिल मे सेहो मधुबनी जिलाक विधायक अशोक यादव क भूमिका उजागर भ चुकल अछि।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bihar news, darbhanga, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments