मैथिली मोजिल्लाक भविष्य एकर प्रयोक्तासब पर निर्भर करैत अछि : राजेश

आइ स किछु साल पहिने नेट पर जखन ब्राउजर खोलैत छलहुं त एकटा सपना जेकां छल जे ब्राउजर अपन भाषा अर्थात मैथिली मे उपलब्‍ध रहिते। ओ समय छल नेट क मतलब अंग्रेजी। हिंदी सेहो अंग्रेजीक स्‍थान लेबा लेल प्रयास क रहल छल। एहन मे आइ इ सूचना आनंदविभोर क दैत अछि जे ब्राउजर फायरफाक्स आब अपन भाषा मैथिली मे सेहो उपलब्‍ध अछि। मैथिलक एहि सपना कए साकार केलथि अछि मधेपुरा निवासी राजेश रंजन आ हुनक संग संगीता। मोजिल्ला 15.0 वर्जन उपलब्‍ध करेनिहार एहि मिथिला रत्‍न स इ’समाद लेल विस्‍तार स गप केलथि पत्रकार सुनील कुमार झा। प्रस्‍तुत अछि ओहि गपशप क किछु खास अंश- समदिया

प्र- सबस पाहिने ई कालजयी अविष्कार लेल बहुत बहुत धन्यवाद?
उ- धन्यवाद। ई आविष्कारक श्रेणी मे नहि आबि सकैछ…, आविष्कार त अहां फायरफाक्स कए कहि सकैत छी, हं…ई मैथिली मे आब उपलब्‍ध अछि एकरा मे हमर किछु योगदान अछि आओर एकरा लेल हमसब सौभाग्यशाली छी जे हम अपन बिहारक एकगोट भाषा मे फायरफाक्स बना सकलहुँ।

प्र- मोजिल्ला क लोकलाइजेशनक काज कोना शुरू भेल आ मैथिली मे मोजिल्ला ब्राउजर क ख्‍याल कोना आयल?
उ- हमरा पहिने स मोजिल्लाक हिन्दीक काजक अनुभव छल आओर एकरा स मैथिलीक काज करबामे बहुत मदति भेटल। कंप्यूटर कए अपन भाषा मे करबाक काज कए लोकलाइजेशन कहल जाइत अछि आओर ई एकटा जटिल प्रक्रिया अछि। अनुवाद एकगोट महत्वपूर्ण हिस्सा जरूर अछि मुदा बहुते एहन काज छै जेकर अनुभव रहै पर काज आसान भ जाइत अछि। एतए हमरा हिन्दीक काज करबाक लाभ भेटल। किछु उदाहरणक लेल लिंक देखू – पंजीयन, बगजिला खाता, सर्च ईंजन सेटअप, फायरफाक्स प्रोटोकॉल हैंडलर, न्यूजरीडर सेटअप, लाइवबुकमार्क फीड, फायरफाक्स वेबपार्ट, सूमो, मरक्यूरियल रिपोजिटरी, फायरफाक्स बिल्ड। एकरा अलावा आओर ढेर काज करए पड़ै छै।

प्र- मशीनी शब्द जेना सेंड, रिसीव वा एहन बहुत कूट शब्द क मैथिली अनुवाद मे कोन तरहक दिक्कत आयल?
उ- एकरा लेल हमसब एकटा प्रोजेक्ट अछि फ्यूल, जेकरा तहत एकटा कार्यशाला पटना मे आयोजित कैल गेल छल। ओहि कार्यशालामे पंडित गोविन्द झा, एके झा, रामानंद झा रमण, मोहन भारद्वाज, रघुवीर मोची सहित बीस स बेसी आदमी मौजूद छलाह जतए फ्यूल शब्दावली क निर्माण भेल। एहि स मूल समस्याक निदान भ गेल।

प्र- मैथिली मोजिल्ला क की भविष्य अछि, अंतरजाल पर मैथिली मे मोजिल्ला एला स मैथिली क विस्तार मे कोन तरह सहायता भेटत?
उ- मैथिली मोजिल्लाक भविष्य एकर प्रयोक्तासब पर निर्भर करैत अछि। पहिने फायरफाक्स मैथिली बीटा मे रहै आब अहा एतए देखि सकैत छी जे ई बीटा स हटि क हिन्दी सबहक संग आबि गेल अछि आओर अहाँ एकरा एतए स डाउनलोड क सकैत छी। हमरा ई देखि कए प्रसन्नता होइत अछि जे विदेह एहि पर काफी सहयोग देलक अछि। ज सबलोग क लेल टूल स्तर स वेबसाइट ताकि एकरा पर बहुत काज करबाक आवश्यकता अछि नहि त ओ दिन दूर नहि जखन हमर सबहक भाषाक अस्तित्वक लेल पैघ समस्या भ जाएत।

प्र- मैथिली मे मोबाइल अप्लिकेशन वा आन-आन एप्लीकेशन क की सम्भावना/भविष्य अछि?
उ- आब आगा क समय मोबाइलक समय छै, एहि लेल ई जरूरी अछि जे एकरा पर काज कैल जाए। फायरफाक्स मोबाइल ब्राउजरक लेल शीघ्र हम काज आरंभ करब। मोबाइलमे बहुत संभावना अछि एकरा पर ध्यान देब जरूरी अछि।

प्र- अहाक टीम म कतेक लोग अछि, हुनकर की योगदान अछि? टीम कोना काज करैत अछि?
उ- टीम स्वैच्छिक रूपेँ काज करैबला लोकसबहक समूह छै। एकरामे हम, संगीता, प्रतिभा आओर राकेश महत्वपूर्ण छी, जे फ्यूल स लए कए बहुत काजमे मदति करैत रहैत छी। आब व्यक्तिगत रूपेँ हमर काज एतए मेंटरक अछि। ई काज मे सीएसडीएस स जुड़ल सराय मदति केलथि। रविकांत, सतीश, गोरा, अमन, अंकित, पराग सन बहुत लोक स नैतिक प्रोत्साहन भेटल। सब कए बहुत धन्यवाद।

प्र- एखन धरि एकर कतेक डाउनलोड भ गेल अछि।
उ- डाउनलोडक संबंधमे हम अखनि नहि बता सकैत छी, दू-एक महीना क बाद हम मोजिल्ला स इ बुझबाक प्रयास करब…हम एखन पुणे मे छी आओर हम नहि कहि सकैत छी जे एकरा लेल मैथिल की सोचि रहल छथि।..हम मधेपुराक रहनिहार छी आओर मधेपुरामे फायरफाक्सक रीव्यू वर्कशाप भेल छल…जनवरी माह मे…बड़-बुजुर्ग कए बहुत सराहना भेटल छल।

प्र- एकर निर्माण समय मे कोनो एहन क्षण जे इ’समाद संग शेयर करए चाहब?
उ- फ्यूलक कार्यशाला हम नहि बिसरि सकैत छी। खास क गोविन्द झा सन बुजुर्ग लोक दू दिन तक बिनु हिलल-डुलल शब्दक निर्माणमे मदति केलथि। हम हुनका जिनगी भरि नहि बिसरि सकैत छी। एहन नहि अछि जे हम दोसर लोकनिक महत्व कए कम क कए देखि रहल छी। परंच नब्बे बरसक झा इ रूप एकटा साधक सन लागल। हम बस एकटा कार्यकर्ता छी आओर हमरा सब भाषा बहुत नीक लागैत अछि।

प्र- समय देबा लेल बहुत बहुत धन्यवाद?
उ- अहां कए सेहो धन्यवाद।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna

नीक वा अधलाह - ज़रूर कहू जे मोन होय

comments

3 टिप्पणी

  1. बहुत बहुत धन्यवाद ।
    हम निक जेकाँ प्रयोग कए रहल छी ।

Comments are closed.