मुजफ्फरपुर मे बनत मिथिला क पहिल भूमिगत पार्किंग

मुजफ्फरपुर : अगर सबकुछ ठीक-ठाक रहल त मुजफ्फरपुर मे मिथिला क पहिल भूमिगत पार्किंग क निर्माण काज एहि सालक अंत तक शुरू भ जाएत। तिरहुत प्रमंडलक मुख्यालय मुजफ्फरपुर मे जाम क समस्या क निराकरण लेल जिला प्रशासन ओवरब्रिज बढेबाक संगहि समुचित पार्किंग क व्यवस्था सेहो क रहल अछि। योजना अगर मूर्त रूप लेलक त शहर क लोक कए वाहन लगेबा लेल जगह तकबाक जरूरत नहि रहत। जिलाधिकारी अनुपम कुमार क मुताबिक, महानगर क तर्ज पर शहर मे छह टा पार्क क निर्माण कैल जाएत आ प्रत्येक पार्क क भीतर वाहन लगेबा लेल अंडर ग्राउंड पार्किंग स्थल बनत, ताकि लोक कए गाड़ी लगेबा लेल जगह क अभाव नहि हुए। जिला प्रशासन शहरी क्षेत्र मे एकरा लेल जगह ताकब शुरू क देलक अछि। स्थल भेटलाक बाद एकरा लेल डीपीआर बनत। स्थल चयन आ डीपीआर बनेबाक काज बरसात खत्म भेला स पूर्व क लेबाक अछि। नगर विकास विभाग क अनुसार शहर मे निर्माण क आस मे पडल चारिटा पुरान पार्क क सेहो निर्माण जल्द शुरू होएत। डीएम डूडा कार्यपालक अभियंता कए सिटी पार्क, इंदिरा गांधी प्रियदर्शनी, समाहरणालय स्थित पार्क आ जुब्बा सहनी पार्क क पुनरीक्षित प्राक्कलन तैयार क शीघ्र निविदा क प्रक्रिया शुरू करबाक निर्देश देलथि अछि। एकर संगहि शहर मे चारिटा ओवरब्रिज क निर्माण कैल जाएत। जिला प्रशासन एकरा लेल सेहो जगह चिह्नित क प्रारंभिक प्रस्ताव नगर विकास विभाग कए पठा देलक अछि। नवका ओवरब्रिज सरैयागंज टावर, कल्याणी, अखाड़ाघाट पुल लग आ मिठनपुरा मे बनत। विभाग स बजट क स्वीकृति भेटला पर डीपीआर बनेबाक काज शुरू होएत। एहि साल एकर निर्माण क सेहो प्रक्रिया शुरू भ जेबाक उम्मीद अछि। एहि फ्लाई ओवर ब्रिज क निर्माण भ गेला स शहर मे जाम क समस्या स निजात भेटत जाएत।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments