मिथिला क पोखरि मे पोसल जाएत वियतनामी माछ

दरभंगा । मिथिला क महान अर्थशास्‍त्री राजा नरेंद्र सिंह क नारा ‘पग-पोखरि माछ मखान’ कए बिहार सरकार सेहो दोहरेबाक प्रयास क रहल अछि। मिथिला कए आर्थिक समृद्धि लेल बिहार सरकार पग पग स्थित पोखरि मे मत्‍स्‍य पालन कए बढाबा देबाक योजना पर काज करब शुरू क देलक अछि। ज्ञात हुए जे आजादी क किछु साल बाद तक एहि इलाका क माछ देश-विदेश तक जाइत छल मुदा आइ एहि ठाम क थारी मे सेहो आंध्रप्रदेश क माछ देखाइत अछि। एहन मे माछक उत्‍पादन बढेबा लेल जाहि पोखरि सब मे देसी माछ क पैदावार तक बंद भ चुकल अछि ओहि सब मे आब वियतनाम मूल क माछ पोसल जाएत। रेहू, नैनी, मांगुर, भाकुड़, झींगा, कतरी, पोठी क संग संग मिथिला मे पंगाश मछली क उत्‍पादन सेहो भ सकत। एकरा लेल जिला मत्स्य विभाग तैयारी शुरू क देलक अछि।
मिथिला क पोखरि मे वियतनामी मूल क पंगाश माछ क पालन क पाछु ओकर तर्क इ अछि जे पंगाश प्रजाति क माछ विपरीत परिस्थिति मे सेहो अपना आप कए बचेबाक सामर्थ रखैत अछि। सरकार ताहि लेल एकर उत्‍पादन लेल मछली पालक कए 60 फीसदी अनुदान सेहो देत। जानकारक कहब अछि जे पंगेसियस सूची मे सबस लोकप्रिय प्रजाति पंगास वियतनाम क मेकांग डेल्श क प्रमुख प्रजाति अछि। इ वियतनाम क अलावा थाईलैंड, लाओस, कंबोडिया, वर्मा आ चीन क किछु इलाका मे पोसल जाइत अछि। इ कैट-फिस प्रजाति क माछ अछि। एकर शरीर चमकीला, लंबा, माथ छोट, मुंह पैघ, जबडा मे छोट नुकीला दांत आ लैटरल लाइन पर कारी धारी होइत अछि।
जिला मत्स्य पदाधिकारी द्वारिका प्रसाद गुप्ता क अनुसार माछ उत्पादन लेल प्रसिद्ध एहि जिला मे देसी माछ क प्रजाति सब विलुप्त होइत जा रहल अछि। रेहू, नैनी, मांगुर, भाकुड़, झींगा, कतरी, पोठी आदि एहि ठामक खास प्रजाति छल, मुदा एकर उत्पादन मे लगातार कमी आबि रहल अछि। एहन मे वियतनामी मूल क माछ पोसबाक योजना पर दरभंगा जिला मे काज शुरू भ गेल अछि। ओना एखन कोनो पोखरि मे एकर जीरा नहि खसाउल गेल अछि मुदा कुल 14टा आवेदन आबि चुकल अछि जेकरा स्वीकृति लेल पटना पठाउल गेल अछि। उम्‍मीद अछि जे अगिला वित्तीय वर्ष स दरभंगा मे एकर उत्पादन क प्रक्रिया शुरू भ जाएत।
ओ कहला जे सबस पैघ गप इ अछि जे सरकार पोखरि क आकार क अनुसार माछक उत्‍पादनक लक्ष्‍य तय क रहल अछि, जाहि स मिथिला माछ उत्‍पादन मे नहि केवल आत्‍मनिर्भर भ जाएत, बल्कि दोसर राज्‍य कए सेहो माछ निर्यात भ सकत। जानकारीक अनुसार मिथिला मे माछ क उत्पादन प्रति हेक्टेयर 15 टन तक करबाक लक्ष्‍य राखल गेल अछि।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर

नीक वा अधलाह - ज़रूर कहू जे मोन होय

comments