मिथिला कए झटका, डालमिया नहि लेत लौहट मिल

नई दिल्‍ली। अशोक पेपर मिल, रैयाम आ सकरी चीनी मिल क बाद आब लौहट चीनी मिल खुलबाक संभावना तत्‍काल खत्‍म भ गेल। मिथिला क्षेत्र क औद्योगिक विकास क सपना देखनिहार लेल इ एकटा पैघ झटका कहल जा सकैत अछि। लौहट मिल लेल चयनियत डालमिया समूह साफ क देलक जे लौहट मे कोनो निवेश नहि करत। डालमिया ग्रुप क एकटा पैघ अधिकारी एहि गप क जानकारी देलथि अछि। ओ कहला जे मधुबनी जिलाक लौहट चीनी मिल लेल कंपनी बिहार सरकार संग संपर्क में छल आ लौहट मिल लेबा लेल इच्‍छुक छल, मुदा किछु स्‍थानीय समस्‍या कए देखलाक बाद कंपनी महाराष्‍ट्र क कोल्‍हापुर मे एकटा चीनी मिल क अधिग्रहण करबा क फैसला लेलक अछि। कंपनी बिहार सरकार कए एहि संबंध मे सूचना द देलक अछि जे ओ लौहट चीनी मिल लेबा मे आब इच्‍छुक नहि अछि।
ज्ञात हुए जे 28 मार्च कए राज्य मंत्रिमंडल लोहट चीनी मिल कए 30 साल लेल निजी कंपनी कए लीज पर देबाक फ़ैसला केने छल। लोहट चीनी प्रसिद्ध उद्योगपति डालमिया क कंपनी कए लीज देल गेल छल। एहि मिल स चीनी आ इथेनॉल क उत्पादन करबाक योजना छल। सरकार डालमिया कए लोहट क जमीन पर एकटा विद्युत संयंत्र लगेबा लेल सेहो कहि रहल छल, मुदा कंपनी एहि लेल बेसी उत्‍साहित नहि छल। कंपनी इ खुलासा नहि केलक अछि जे आखिर कोन स्‍थानीय कारण रहल जे ओ एहि परियोजना स अपन हाथ खींच लेलक, मुदा जानकारक कहब अछि जे मिल मामला मे मधुबनी क एकटा नेता क गैर जरूरी हस्‍तक्षेप एकर कारण भ सकैत अछि। कारण चाहे जे हुए मुदा एतबा जरूर अछि जे डालमिया लेल निवेश क नजरि स मधुबनी स बेहतर कोल्‍हापुर भ गेल आ ओ लोहट स हाथ खींच लेलथि। आब देखबाक चाही जे बिहार सरकार एहि मिल लेल फेर कहिया टेंडर करैत अछि।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna

नीक वा अधलाह - ज़रूर कहू जे मोन होय

comments

2 टिप्पणी

Comments are closed.