मासक अंत तक भ जाएत पावर ग्रिड संग संयुक्त उद्यम क स्थापना

पटना। भोज बेर मे कुम्‍हर रोपबाक आरोप स बचबा लेल बिहार सरकार पावरग्रिड संग मिल कए एकटा संयुक्त उद्यम क स्थापना एहि मासक अंत तक क लेत। बिजलीक गंभीर संकट स गुजरि रहल बिहार कए अगिला दू साल बाद मांग स बेसी बिजली उपलब्‍ध भ जाएत, मुदा बेहतर ट्रांसमिशन लाइंस नहि रहबाक कारण स बिजली उपभोक्‍ता तक नहि पहुंचायल जा सकत। एहन मे
सरकार उपलब्‍ध बिजली कए उपभोक्‍ता तक पहुंचेबा लेल प्रयास तेज क देलक अछि। इ’समाद एहि संबंध मे पहिने समाद द चुकल अछि जे इ संयुक्त उद्यम बिहार मे पारेषण (ट्रांसमिशन) व्यवस्था कए मजबूत करत। संगहि, भविष्य क जरूरत कए देखैत नव ट्रांसमिशन लाइन स्थापित करत। एहि संदर्भ मे ऊर्जा मंत्री विजेंद्र यादव कहला जे अगिला 5 साल मे राज्य मे बिजली क उपलब्‍धता कम स कम 4,000-5,000 मेगावॉट भ जाएत, जे एखुनका 1,800 मेगावॉट स काफी बेसी अछि। एहि हिसाब स राज्य मे बिजली क मांग सेहो बढत। एहन मे सरकार अपन पारेषण आ वितरण (टीऐंडडी) घाटा कए कम स कम रखबाक प्रयास मे एखने स जुटि गेल अछि। एहि लेल सरकार पावरग्रिड संग करार केलक अछि। बेहतर ट्रांसमिशन व्यवस्था लेल सरकार अगिला 5 साल मे 6,000 करोड़ टका खर्च करबाक फैसला लेलक अछि। एकरा लेल विश्व बैंक, एशियाई विकास बैंक (एडीबी) आ पावर फाइनैंस कॉरपोरेशन ऋण उपलब्ध करेबा लेल तैयार भ गेल अछि। इ काज तीन चरण मे होएत। ट्रांसमिशन व्यवस्था मे सुधार क इ काज 2016-17 तक पूरा भ जाएत।
ओ कहला जे बिहार मे बिजली क मांग तेजी स बढि रहल अछि। मुदा बेहतर ट्रांसमिशन लाइंस नहि रहबाक कारण मांग क अनुरूप सरकार बिजली नहि कीन पाबि रहल अछि। किया त बिजली कए उपभोक्‍ता तक पहुचेबा लेल बेहतर ट्रांसमिशन लाइंस क जरूरत अछि। एहि लेल बिहार राज्य विद्युत बोर्ड आ पावरग्रिड क बीच एकटा संयुक्त उद्यम स्थापित करबा पर सैद्धांतिक रूप स सहमति भ गेल अछि। आब बस किछु छोट-मोट मसला पर चर्चा बाकी अछि जेकर बाद एहि मासक अंत तक समझौता कए अंतिम रूप द देल जाएत। फेर राज्य कैबिनेट स मंजूरी ल कए महीना क अंत तक एहि संयुक्त उद्यम क स्थापना क देल जाएत।
यादव कहला जे राज्‍य मे ट्रांसमिशन लाइन काफी पुरान अछि आ वर्तमान मांग लेल इ बहुत कमजोर भ चुकल अछि। नवका उद्यम राज्य मे अगिला 25 साल तक ट्रांसमिशन क व्यवस्था देखत आ ओहि अनुरूप काज करत। संगहि, इ उद्यम भविष्य क जरूरत कए देखैत नवका लाइन बिछेबाक काज सेहो करत।
पावरग्रिड क अध्यक्ष आ प्रबंध निदेशक आर एन नायक सेहो एहि उद्यमक पुष्टि केलथि अछि। ओ कहला अछि जे एहि संदर्भ मे बिहार सरकार स गप अंतिम चरण मे अछि। हम राज्य विद्युत बोर्ड संग मिलकए ट्रांसमिशन कक्षेत्र मे एकटा संयुक्त उद्यम एहि मासक अंत तक स्थापित करबाक प्रयास मे छी। राज्य सरकार एहि उद्यम कए अगिला 25 साल तक बिहार मे ट्रांसमिशन व्यवस्था क रख-रखाव क काज देबा लेल तैयार भ गेल अछि।’

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna

नीक वा अधलाह - ज़रूर कहू जे मोन होय

comments