मधुबनी मे खुलल हार्ट हॉस्पीटल

hatमिथिलांचल क विकास क बिना बिहार क तरक्की संभव नहि : नीतीश
मधुबनी । मुख्यमंत्री नीतीश कुमार कहला जे जाहि दिन हम बिहारी सेहत आ शिक्षा क क्षेत्र मे मजबूत भ जाइब तहिया हमर मुकाबला करबाक ककरो हिम्मत नहि होयत। ओ मधुबनी क राजनगर प्रखंड क मंगरौनी गांव क नवरतन स्थित जाह्ववी चंद्रकांत ठाकुर स्मारक न्यास इकाई द्वारा स्थापित हर्ट हास्पीटल क फीता काटिकए उद्घाटन क बाद आयोजित कार्यक्रम कए संबोधित करि रहल छलाह। ओ कहल जे हमरा स जे विकसित, आत्मनिर्भर बिहार बनेबाक सपना देखलथि अछि हुनके समवेत प्रयास क दिशा मे इ सुदूर ग्रामीण क्षेत्र मे स्थापित 50 शय्या क आधुनिक सुविधा स लैस हार्ट हास्पीटल अछि। राज्य क प्रसिद्ध हृदय रोग विशेषज्ञ डॉ एके ठाकुर एहि हार्ट हास्पीटल ग्रुप क चेयरमैन छथि। कुमार कहला जे एके ठाकुर चिकित्सा जगत मे त राष्ट्रीय स्तर पर अपन पहचान बनेने छथि, एहि ग्राम्यांचल मे इ हास्पीटल बनाकए ऐतिहासिक काज केलथि अछि। सीएम मिथिलांचल क अन्य सपूत कए सेहो एहि तरह क जनहित क कार्य करबाक अपील केलाह। मुख्यमंत्री कहला जे डॉ ठाकुर अपन मातृभूमि क कर्ज उतारबाक पुनीत कार्य केलथि अछि। ओ साढ़े चारि करोड़ क लागत स बनल हार्ट हास्पीटल क लेल डॉ एके ठाकुर कए बधाई दैत हुनका हर संभव सहयोग क आश्वासन देलाह। सीएम कहला जे जखन धरि मिथिलांचल क विकास नहि होयत बिहार क विकास संभव नहि। ओ कहला जे बाहर रहैत छथि आ जे मिथिलांचल क पैघ हस्ती छथि हम दूनू गोटे स आग्रह करैत छी जे ओ एहि ठाम उद्योग लगाबथि। राज्य सरकार हर सुविधा देबा लेल तैयार अछि। हाल क दिन मे विभिन्न प्रदेश मे बिहारी क विरुद्ध जारी बयानबाजी क चर्चा करैत कहला जे अगर बिहारी नहि होइते त पंजाब मे हरितक्रांति नहि भ सकिते। बिहार क बिना देश क कोनो उद्योग नहि चलि सकैत अछि। किछु शरारती तत्व बिहारी कए अपमानित करबाक साजिश कहियो महाराष्ट्र, कहियो असम त कहियो मध्य प्रदेश मे करैत रहैत छथि। एकर जेतबा निंदा कैल जाए से कम अछि। मुख्यमंत्री कहला जे हम भीख नहि मंगैत छी, बल्कि काज क बदला मे वाजिब हक लैत छी। हम बिहार क अपमान नहि सहि सकैत छी। हर स्थिति स निबटबा लेल सब मिलकए डटिकए मुकाबला करब।
बिहार मे सबस पैघ चुनौती बेरोजगारी क अछि। हम अपन उद्योग नीति कए सेहो काफी सरल बना देलहुं अछि। कार्यक्रम कए संबोधित करै पूर्व मुख्यमंत्री डॉ जगन्नाथ मिश्र कहला जे मिथिलांचल क ऐतिहासिक गांव मंगरौनी क इ अस्पताल वरदान साबित होयत। पंडित ताराकांत झा कहला जे उत्तर बिहार मे इ अस्पताल नव कीर्तिमान स्थापित करत। स्वास्थ्य मंत्री नंद किशोर यादव कहला जे बिहार सरकार मुख्यमंत्री के नेतृत्व मे स्वास्थ्य क क्षेत्र मे निरंतर कार्य करि रहल अछि। मंत्री रामाश्रय प्रसाद सिंह कहला जे इ अस्पताल एहि क्षेत्र क लेल मील क पत्थर साबित होयत। कार्यक्रम कए दिल्ली क सांसद महाबल मिश्र, विधायक विनोद नारायण झा, रामदेव महतो, रामप्रीत पासवान आदि सेहो संबोधित केलथि। मंच पर हरि प्रसाद साह, सांसद हुक्मदेव नारायण यादव, विधान पार्षद विनोद चौधरी, प्रो. विनोद सिंह, भाजपा जिलाध्यक्ष घनश्याम ठाकुर, जदयू जिलाध्यक्ष सत्येन्द्र कामत, डा. फैयाज अहमद सेहो छलाह। उद्घाटन कार्यक्रम क बाद सीएम अस्पताल परिसर क सब भवन क निरीक्षण सेहो केलथि। एहि अवसर पर संस्कृत क प्रख्यात विद्वान पंडित आद्याचरण झा मुख्यमंत्री सहित अन्य अतिथि कए पाग-दोपटा पहनाकए स्वागत केलथि।

नीक वा अधलाह - ज़रूर कहू जे मोन होय

comments