भूदान क 2 लाख 77 हजार एकड़ जमीन लापता

भूमिहीन कए भेटल 2 लाख 60 हजार एकड़ क पर्चा
पर्चाधारी डेढ़ लाख परिवार कए नहि भेटल जमीन पर हक

नर्मदा कुमारी
पटना : भूदान क जमीन पर दबंग क कब्जा बरकरार अछि, मुदा ओहि स बेसी गंभीर सवाल अछि जे आखिर भूदान क जमीनक खाता सरकार लग किया नहि अछि। बिहार राज्य भू-दान कमेटी क अध्यक्ष शुभमूर्ति सेहो एहि गप स सहमत छथि। हुनकर मानि त आब मात्र पांच-छह सौ एकड़ भूमि बांटबा लेल बचल अछि। ज्ञात हुए जे राज्य मे भू-दान क तहत 6 लाख 48 हजार एकड़ भूमि उपलब्ध कराउल गेल छल। जाहि मे दरभंगा महाराज डा कामेश्वर सिंह असगर 51 हजार एकड जमीन दान केने छलाह। कुल भूदानक जमीन मे स 2 लाख 60 हजार एकड़ भूमि क पर्चा भूमिहीन कए देल जा चुकल अछि। जखन कि तीन लाख 80 हजार एकड़ भूमि क संबंध मे स्पष्ट जानकारी सरकार लग नहि अछि। सरकारक कहब अछि जे दाता ओहन जमीन सेहो दान देने छथि जे नदी, नाला आ पहाड़ अछि। सरकारक एहि दावा क बावजूद प्राप्त जानकारी क अनुसार तीन लाख 80 हजार मे स एखन तक केवल एक लाख तीन हजार एकड़ भूमि क संपुष्टि सरकार क सकल अछि, भूदान क 2 लाख 77 हजार एकड़ जमीन एखनो लापता अछि। ओना तत्कालीन भूमि सुधार आयोग क अध्यक्ष डी बंद्योपाध्याय सेहो अयोग्य भूमि क सर्वे क अनुशंसा केने छलाह, मुदा सरकार इ नहि करा सकल अछि। दोसर दिस भू-दान कमेटी क अध्यक्ष क अनुसार पर्चा रहबाक बावजूद प्रदेश मे डेढ़ लाख परिवार एखनो बेघर अछि। ज्ञात हुए जे एखन धरि भू-दान क वितरण योग्य दो लाख 60 हजार एकड़ भूमि कए साढ़े तीन लाख परिवार मे बांटल गेल अछि, मुदा पर्चा भेटलाक बावजूद डेढ़ लाख परिवार कए एखन धरि जमीन पर कब्जा नहि भेट सकल अछि। इ स्थिति शहरी आ ग्रामीण क्षेत्र मे समान रूप स अछि। आधिकारिक सूत्र क अनुसार सासाराम, गया, मधेपुरा, कटिहार आ चंपारण क ग्रामीण इलाका मे भू-दान क सर्वाधिक जमीन अतिक्रमण क चपेट मे अछि। ओतहि राजधानी पटना क कुम्हरार आ गंगा क कछैर क भूदान क जमीन पर अवैध कब्जा क नव भवन क निर्माण कैल जा रहल अछि। बिहार राज्य भू-दान कमेटी क अध्यक्ष शुभमूर्ति त प्रदेश कांगे्रस कार्यालय सदाकत आश्रम पर सेहो करीब एक एकड़ जमीन कब्जा करबाक आरोप लगा देलथि अछि। सवाल अछि भूदान क ओ जमीन जे भूमिहीन लेल दान कैल गेल अछि ओहि जमीन पर कौन जमींदार क कब्जा अछि।

इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa

नीक वा अधलाह - ज़रूर कहू जे मोन होय

comments