भागलपुर स उड़ान अगिला मास तक : कश्यप

0
39
esamaad maithili newspaper

बिहार मे हवाई सेवा पर इसमाद शुरू स नजरि रखने अछि। 2009 मे सबस पहिने इसमाद इ समाद देने छल जे स्प्रीट एयर दरभंगा आ पूर्णिया स सेवा शुरू करत। दरभंगा स त सेवा शुरू भेलाक संगहि बंद भ गेल आ पूर्णिया स चालू अछि। पिछला दू मास पूर्व भागलपुर स सेवा शुरू करबाक समाद भेटल आ कहल गेल जे स्काईफिशर 15 मई स इ सेवा शुरू करत। बिहार मे हवाई सेवा शुरू करबा मे भ रहल देरी पर इसमाद लेल कंपनीक महाप्रबंधक से विस्तार स गप केलथि अछि पत्रकार सुनील कुमार झा। प्रस्तुत अछि इसमाद लेल विशाल कश्यप स भेल खास गप-शप अंश। – समदिया

प्र. भागलपुर 15 मई स हवा मे सफर करबा लेल तैयार अछि, अहां तैया छी।
विशाल कश्यप : जी, तैयार त हमहुं सब छी, मुदा बिहार सरकार स एकटा महत्वपूर्ण कागज नहि भेटल अछि ताहि कारण स उड़ान मे विलम्ब भ रहल अछि। 15 मई स त नहि मुदा उम्मीद कैल जा सकैत अछि जे अगिला मास क पहिल वा दोसर सप्ताह स इ सेवा शुरू भ जाएत।

प्र. आखिर कोन एहन कागज अछि जे सेवा कए शुरू करबा मे बाधक बनल अछि।
विशाल कश्यप : कागज स्टेट हैंगर क उपयोग संबंधी अनुमति क अछि। पटना एअरपोर्ट पर जगह नहि भेटि रहल अछि, संगहि हैंगर क दिक्कत सेहो अछि। 9 मई कए हमरा सबकए चिट्ठी भेटि गेल छल जे हम सब एयर ओपरेशन क सकैत छी, मुदा अखन धरि हैंगर संबंधी चिट्ठी भेटल नहि अछि।

प्र. हवाई सेवा परिचालनक डेडलाइन कहिया धरि रखने छी
विशाल कश्यप : अखन धरि कोनो आधिकारिक घोषणा त नहि कैल गेल अछि, मुदा एहि मासक अंत बा जून क दोसर सप्ताह तक इ सेवा शुरू भ सकैत अछि।

प्र. मतलब हम सब तय मानि जे अगिला मास सेवा शुरू भ जाएत।
विशाल कश्यप : इ सब किछु बिहार सरकार आ एअरपोर्ट आॅथिरिटी पर निर्भर अछि, जेहन सहयोग हमरा सबहक हुनका सब स भेटत ओहिने सहयोग हम यात्री क देब। बिहार स विमान सेवा शुरू करब हमर व्यक्तिगत सपना अछि आ इ जल्द साकार होए बला अछि।

प्र. भागलपुर क अलावा कोनो नव शहर स सेवा शुरू करबाक योजना अछि बा नहि।
विशाल कश्यप : एखन हम सब पटना, गया आ भागलपुर स सेवा शुरू क रह छी आ एहि शहर पर ध्यान केंद्रीत क रखने छी। एहि ठाम स नीक रिेस्पोंस भेटि रहल अछि। हवाई परिचालन शुरू भेला क छह मासक बाद हम आन शहर क बारे मे सोचब। अखन त खाली पटना, गया आ भागलपुर मोन मे अछि।

प्र. भागलपुर एयरपोर्ट क मरम्मत पूरा नहि भ सकल अछि, अखन धरि एहि एअरपोर्ट क एनओसी नहि भेटल अछि। सेवा मे देरीक इ कारण सेहो अछि की।
विशाल कश्यप : कहल जा सकैत अछि। भागलपुर एअरपोर्ट पर किछु काज बांकी अछि चाहरदीवारी क अनुमोदन सेहो भेट गेल छल आ जल्द एकर निर्माण शुरू भ जाएत। स्ट्रिप आ बाउंड्रीक काज एक बेर पूर्ण भ जाए तखन एनओसी सेहो भेट जाएत।

प्र. अहां सब कोन प्रकारक सेवा शुरू क रहल छी।
विशाल कश्यप : हमरा सब कए त नॉन शिड्यूल क लाइसेंस भेटल अछि, मुदा हम सब एकरा नियमित रूप स भोर आ साँझ शुरू करबाक तैयारी मे छी। राति मे सेहो कार्गो सेवा पर विचार भ रहल अछि। एकर अलावा इमरजेंसी मे कियो विमान किराया पर लेत त हुनका सेहो उपलब्ध भ जाएत।

प्र. किराया सब तय भ गेल।
विशाल कश्यप : नहि यउ, अखन कोनो फाइनल फैसला त नहि भेल अछि मुदा तखनो भागलपुर स पटना क किराया 2 स 3 हजार तक रहत, वाराणसी स गया 4 हजार तक रहत, आ वाराणसी स पटना साढ़े तीन हजार तक रहत।

प्र. गप करबा लेल धन्यवाद।
विशाल कश्यप : अहूं कए धन्यवाद।

इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bihar news, darbhanga, latest bihar news, latest maithili news, latest mithila news, maithili news, maithili newspaper, mithila news, patna, saharsa

Please Enter Your Facebook App ID. Required for FB Comments. Click here for FB Comments Settings page