बेरंग भ गेल मिथिला क रंगक शहर लखीसराय

लखीसराय । होलिका क दहन मिथिला मे भेल, मुदा ओहि समय होली रंग स नहि बल्कि सम्‍मतक छाउर स खलेबाक परंपरा छल। मुदा जखन होली मे रंग क प्रयोग शुरू भेल त मिथिला कए रंग मे लपेटबा लेल एकर उत्‍पादन शुरू भेल । ओना त बहुत दिन त रंग बाहर स अबैत रहल, मुदा रंग क शहर क नाम स मशहूर लखीसराय मे मुख्‍य रूप स रंगक व्यवसाय जमाउल गेल । आइ लखीसराय रंगहीन अछि। धीरे-धीरे एकर रंग फीका पडैत रहल अछि ।
लखीसराय कए रंग क शहर बनबाक इतिहास देखी त वर्ष 1937 मे चिरंजी लाल ड्रोलिया एहि शहर मे ड्रोलिया केमिकल कंपनी नामक फैक्ट्री क शुभारंभ केलथि, जाहि मे सेनूर क निर्माण कैल जाइत छल। लखीसराय क बनल सेनूर देश क अलावा नेपाल आ बांग्लादेश तक क हाट-बाजार मे जाइत छल । रंग क त्योहार होली स किछु मास पूर्व लखीसराय मे सिंदूर क संग-संग रंग अबीर आ गुलाल क निर्माण शुरू भ जाइत छल। रंग निर्माण लेल कच्चा माल मुंबई, पुणे, दिल्ली, जबलपुर आ अलवर स मंगाउल जाइत छल।
लखीसराय क रंग कारोबार एतबा फलल-फुलल जे ड्रोलिया क अलावा कईटा आओर कारखाना एहि शहर मे खुलल, मुदा मिथिला क कपार कही बा कालचक्र क फेर, आन कारोबार जेकां एहि कारोबार कए सेहो पहिने बिजली आ फेर खराब कानून व्यवस्था चौपट क देलक । 1980 क आसपास आधा स बेसी कारखाना क दुहारि पर ताला लटकि गेल छल। एखन वाणिज्य कर विभाग द्वारा निबंधित मात्र छहटा कारखाना अछि जाहि मे सेनूर क निर्माण होइत अछि।
कहियो होली क तीन मास पूर्व स लखीसराय क कारखाना अबीर आ गुलाल बनेबा मे जुटि जाइत छल। सेनूर वाणिज्य कर स मुक्त अछि जखन कि अबीर आ गुलाल पर पांच फीसदी बिक्री कर देय अछि। ओतहि रंगो पर 13 फीसदी वाणिज्य कर देय अछि, मुदा आइ एहि कारोबार कए खत्‍म भेला स रंग क व्यवसाय स सरकारी खजाना मे एक पाइ तक नहि पहुंचैत अछि।
वर्ष 1937 स एहि व्यवसाय स जुड़ल शहर क रजिस्टर्ड कारखाना मे भले भारी पैमाना पर रंग क निर्माण नहि भ रहल अछि, मुदा होली क मौसम मे किछु किछु रंग क उत्‍पादन भ जाइत अछि। होली स दुर्गा पूजा तक एहि ठाम कुल पांच करोड़ टकाका व्यवसाय करबा क गप कहल जाइत अछि । सवाल अछि आखिर मिथिला क उद्योग और मिथिला क औद्योगिक नगर क विकास आ ओकरा फेर स जीवंत करबा लेल कोनो प्रयास अगर नहि होएत त एक दिन इ उपमा मात्र इतिहास मे दर्ज भ जाएत जे रंगक शहर बेरंग भ गेल।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर

नीक वा अधलाह - ज़रूर कहू जे मोन होय

comments