बिहार मे 28 साल बाद 11 दिसंबर कए होएत छात्र संघ चुनाव

पटना | प्राचीन विश्वविद्यालय मे स एक पटना विश्वविद्यालय मे 28 साल बाद 11 दिसंबर कए छात्र संघ क चुनाव करेबाक घोषणा भ गेल अछि। एहि स जतए छात्र संगठन मे प्रसन्नता अछि ओतहि चुनाव स माहौल सेहो गरमा रहल अछि। पटना विश्वविद्यालय क कुलपति प्रो़ शंभुनाथ सिंह चुनाव घोषणा करैत कहला जे इ चुनाव लिंगदोह कमेटी क सिफारिश क आधार पर नहि भ सकत।
ओना त सबटा छात्र संगठन एकर स्‍वागत के लक अछि आ कहलक अछि जे एहि स छात्रक समस्‍या क नीक स निदान भ सकत, मुदा राष्ट्रीय जनता दल (राजद) क छात्र इकाई क बिहार प्रदेश अध्यक्ष स्वदेश कुमार कहला अछि जे चुनाव लिंगदोह कमेटी क सिफारिश क आधार पर नहि भेला स हम सब दुखी छी। ओना किछु छात्र नेता कोर्ट जेबाक गप सेहो केलथि मुदा एखन अपन नाम जाहिर करबा स परहेज केलथि।
छात्र जनता दल (युनाइटेड) क प्रदेश अध्यक्ष रंजन कुमार कुलपति क एहि फैसला कए हिम्मत वाला फैसला करार देलथि आ कहला जे चुनाव न केवल पटना विश्वविद्यालय मे, बल्कि राज्य क सबटा विश्वविद्यालय मे हेबाक चाही।
भारतीय राष्ट्रीय छात्र संगठन (एनएसयूआई) क नेता वरुण सेहो एहि फैसला क स्वागत केलथि, मुदा ऑल इंडिया स्टूडेंट्स एसोसिएशन (आइसा) क नेता अभ्युदय क कहब अछि जे इ छात्र संगठन क लड़ाई क पहिल जीत छी। छात्र क भावना क ख्याल आ ओकर समस्या क समाधान नहि विश्वविद्यालय प्रशासन क सकैत अछि आ नहि सरकार। छात्र क ख्याल छात्र संगठन टा क सकैत अछि। ऑल इंडिया स्टूडेंट्स फेडरेशन (एआईएसएफ ) क सुशील कुमार सेहो कुलपति क एहि निर्णय कए सही कहला अछि।
गौरतलब अछि जे बिहार क कोनो विश्वविद्यालय मे वर्ष 1984 क बाद छात्र संघ क चुनाव नहि भेल अछि। एहि चुनाव लेल छात्र संगठन बराबर आंदोलनरत रहल अछि।
बिहार मे अंतिम छात्र संघ क चुनाव वर्ष 1984 मे पटना विश्वविद्यालय मे भेल छल। एहि स पूर्व मगध विश्वविद्यालय मे 1980 मे छात्र संघ क चुनाव भेल छल। एकर बाद छात्र संघ चुनाव क मांग लगातार उठैत रहल मुदा चुनाव नहि भेल।
ज्ञात हुए जे राजद अध्यक्ष लालू प्रसाद, भारतीय जनता पार्टी (भाजपा) क नेता आ राज्य क उपमुख्यमंत्री सुशील कुमार मोदी, स्वास्थ्य मंत्री अश्विनी चौबे पटना विश्वविद्यालय छात्र संघ क नेता रहल छथि। 28 वर्ष पूर्व भेल चुनाव मे शंभु शर्मा अध्यक्ष आ रणवीर नंदन महासचिव निर्वाचित भेल छलाह।

एहि वर्ष नौ जनवरी कए मुख्यमंत्री नीतीश कुमार जखन पटना कॉलेज क दौरा केने छलाह, तखन ओ स्पष्ट कहने छलाह जे राजनीति कए प्रोत्साहित करबा लेल छात्र संघ चुनाव क आवश्यकता अछि। तखने स इ तय मानल जा रहल छल जे आब छात्र संघ चुनाव होएत।
उल्लेखनीय अछि जे बिहार मे कुल 15टा विश्वविद्यालय अछि। दरभंगा बिहार क एहन एक मात्र शहर अछि, जाहि ठाम एकहि परिसर मे दूटा विश्वविद्यालय अछि- ललित नारायण मिथिला विश्वविद्यालय आ कामेश्वर सिंह दरभंगा संस्कृत विश्वविद्यालय। एहि दूनू विश्वविद्यालय मे सेहो तीन दशक से छात्र संघ चुनाव नहि भ सकल अछि।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna

नीक वा अधलाह - ज़रूर कहू जे मोन होय

comments