बिहार मे फेर निवेश करत डालमिया परिवार

पटना । डालमिया परिवार कए बिहार संग पुरान संबंध रहल अछि। इ अलग गप अछि जे पिछला किछु साल स एहि परिवारक बिहार स संबंध केवल भावनात्‍मक रही गेल छल। मुदा डालमिया परिवार एक बेर फेर बिहार मे पैघ निवेश करबा लेल तैयार अछि। बिजली क कमी स जूझ रहल बिहार कए रोशन करबा लेल डालमिया पावर राज्य क बांका जिला मे 1,320 मेगावॉट क ताप विद्युत संयंत्र क निर्माण क प्रस्ताव रखलक अछि। एहि मे कंपनी करीब 8,000 करोड़ टका क निवेश करबाक योजना बनेलक अछि। एकर अलावा, कईटा दोसर कंपनी सेहो राज्य मे मोटगर निवेश करबा लेल तैयार भ गेल अछि। आधिकारिक सूत्र क कहब अछि जे राज्य मे बिजली क्षेत्र मे टका लगौनिहारक आब कतई कमी नहि अछि। साल क पहिल 3 मास मे बिहार मे बिजली क क्षेत्र मे निवेशक करीब 40 हजार करोड़ स बेसीक निवेश करबाक इच्छा जता चुकलथि अछि।
राज्य सरकार क उद्योग विभाग क प्रधान सचिव सीके मिश्रा सेहो एहि दावाक पुष्टि करैत कहला जे राज्य मे बिजली उत्पादन क मामला मे काफी निवेशक आगू आबि रहल छथि। एखन धरि एहि क्षेत्र मे करीब 1.45 लाख करोड़ टकाक निवेश क प्रस्ताव भेट चुकल अछि। संगहि, कईटा नव निवेशक सेहो एहि मामला मे सरकार स लगातार संपर्क मे छथि।
बिजली क्षेत्र मे आयल एहन निवेशक पाछु जानकारक कहब अछि जे राज्‍य सरकार एहि क्षेत्र मे निवेश लेल काफी कुछ करि रहल अछि। राज्‍यक नव औद्योगिक नीति क तहत राज्य मे निवेश करनिहार कए भारी मात्रा मे सब्सिडी देल जा रहल अछि। ओतहि कानून व्यवस्था क मामला मे सेहो राज्‍य मे प्रगति लोक देख रहल अछि।’
बिहार क उद्योग विभाग क दस्तावेज क मुताबिक साल क पहिल तीन मास मे 40,212 करोड़ क निवेश प्रस्ताव राज्य सरकार कए भेटल अछि। एहि मे स सबस पैघ प्रस्ताव दिल्ली क एकटा कंपनी इरा इन्फ्रा इंजीनियरिंग स भेटल अछि, जे राज्य क नवादा आ भागलपुर जिला मे 2,640 आओर 1,320 मेगावॉट क बिजलीघर क निर्माण क प्रस्ताव राज्य सरकार कए सामने पेश केलक अछि। एहि परियोजना मे कंपनी राज्य मे 22 हजार करोड़ क निवेश क प्रस्ताव रखलक अछि।
राज्य मे बिजली क क्षेत्र मे निवेश करनिहार एकटा कंपनी क अधिकारी कहला जे, ‘राज्य सरकार पिछला किछु साल मे कानून व्यवस्था आ बुनियादी ढांचाक मामला मे जबरदस्त काज केलक अछि। सड़क क मामला मे काफी काज भेल अछि। ताहि स हमरा सब कए अपन कच्‍चा माल कए अनबा आ ल जेबा मे काफी आसानी भ गेल अछि। राज्य मे बिजली क काफी जरूरत छैक, जे हमारा सबहक कारोबार लेल एकटा शुभ संकेत अछि’।

नीक वा अधलाह - ज़रूर कहू जे मोन होय

comments