बिहार क जाम अहांक नाम

पटना। बिहार क शराब आब देश कए मदहोश करत। इसमाद पहिने इ बता चुकल अछि जे हथिदह से अपन कारोबारक शुरूआत करनिहार लीकर किंग विजय माल्‍या अपन एकटा आओर संयंत्र बिहार मे लगा रहल छथि। एकरा लेल विजय माल्या क अगुआई वाला यूबी ग्रुप मुजफफरपुर लग लीचीक बगान खरीद चुकल छथि आ संयंत्रक लेल सेहो जमीन ल लेलथि अछि। विजय माल्‍या कए बिहार मे निवेश स एहि क्षेत्रक आन महारथि सेहो बिहार एबा लेल उत्‍सुक भ गेलथि अछि। देश-विदेश क कईटा नामी-गिरामी शराब निर्माता कंपनी बिहार मे निवेश क इच्छा जता रहल छथि। एहि मे डेनमार्क क काल्र्सबर्ग जइसन पैघ नाम सेहो शामिल अछि। अपन योजना कए जल्द स जल्द परवान चढेबा लेल एहि मे स किछु कंपनी त बिहार मे जमीन कीनबाक कवायद सेहो शुरू करि देलक अछि।
राज्य क उद्योग विभाग क अधिकारी क कहब अछि जे राज्य मे पिछला किछु मास मे कईटा कंपनी निवेश क इच्छा जतेलक अछि। एहि मे स कई टा शराब निर्माता कंपनी राज्‍य मे अपन बीयर संयंत्र लगेबा लेल पैघ निवेशक प्रस्‍ताव देलक अछि। दरअसल इ कंपनी सब राज्‍य मे मकई आ गहूंम क पैदावार स काफी खुश अछि, संगहि लीची कए ल कए सेहो कंपनी मे उत्‍साह देखल जा रहल अछि। सरकार सेहो अन्‍य क्षेत्र क जेकां एहि क्षेत्र मे सेहो निवेशक कए कई प्रकारक सहूलियत द रहल अछि। सूत्र क मुताबिक बिहार मे निवेश क इच्छा रखनिहार कंपनी मे सबस पहिल नाम यूबी समूह क अछि ओकर बाद काल्र्सबर्ग जइसन पैघ कंपनी सेहो कतार मे अछि।
राज्य सरकार क एकटा वरिष्ठ अधिकारी अपन नाम नहि उजागर करबाक शर्त पर कहला जे, ‘दरअसल, यूबी ग्रुप आ काल्र्सबर्ग क मामला अंतिम चरण मे अछि। एहि स राज्‍य मे काफी पैघ निवेश हेबाक उम्मीद कैल जा रहल अछि। सूत्रक मानि त यूबी समूह अपन नवका प्लांट क लेल पटना क नजदीक पालीगंज इलाका मे जमीन सेहो कीन लेलक अछि।
अधिकारी क कहब सेहो अछि जे यूबी समूह अपन संयंत्र पालीगंज मे स्थापित करबाक फैसला केने अछि। एकरा लेल कंपनी 70-80 एकड़ जमीन ताकि लेने अछि। जमीन अधिग्रहण मे सरकार कंपनीक मदद करबा लेल तैयार अछि। काल्र्सबर्ग क गप सेहो कहियो फाइनल भ सकैत्‍ अछि। हालांकि, कंपनी एखन अपन संयंत्रक लेल जमीन नहि कीनलक अछि। मुदा उम्मीद अछि जे एक दू माह मे इ तय भ जाएत जे ओ कौन ठाम अपन संयंत्र लगा रहल अछि। राज्‍य सरकारक एकटा अधिकारीक कहब अछि जे केवल एहि दूनू परियोजना स राज्य मे लगभग 700-800 करोड़ टका क निवेश आउत।
ओ कहला जे इ सच अछि जे काल्र्सबर्ग कए फिलहाल रुचि राज्य मे बियर उत्पादन करबा मे अछि मुदा ओ जल्‍द यूबी ग्रुप जेकां एहि ठाम आन चीज सेहो बनाउत। ओ कहला जे राज्य मे मकई क उत्पादन आ बेहतर अर्थव्यवस्था कए देखैत एहि कंपनी क दिलचस्पी बिहार मे बढब स्‍वभाविक अछि। बिहार मे देश भरि मे सबस बेसी मकई क उत्पादन होइत अछि। संगहि मकई क खेती सेहो साल भरि होइत अछि।
ओना कंपनी दिस स बस एतबा कहल गेल जे सरकार स गप भ रहल अछि एखन कोनो प्रकारक खुलासा कहब मुश्किल अछि।

नीक वा अधलाह - ज़रूर कहू जे मोन होय

comments