बिहार आ भूटान मे पर्यटन कए बढाबा लेल समझौता

पटना। भूटान क चारि दिनक यात्रा पर गेल मुख्यमंत्री नीतीश कुमार यात्रा क दोसर दिन भूटान क राजा जिग्मे खेसर नामग्याल वांगचुक स भेंट केलथि आ भूटान क संग पर्यटक क संख्या बढेबा संबंधि करार केलथि। राजा मुख्यमंत्री कए बतेलाह जे कोना भूटान क लोक ग्रास नेशनल हैप्पीनेस स प्रभावित छथि। भूटान नरेश कहला जे इ अवधारणा बॉडी, स्पीच आ माइंड कए पूरा विकास स संबंधित अछि। एहि तीनू क अपन-अपन निहितार्थ अछि। बॉडी क मतलब स्वास्थ्य सेवा क विकास स अछि जखन कि स्पीच क अर्थ जनतांत्रिक मूल्‍यक विकास आ माइंड क मतलब शिक्षा सुविधा क विकास अछि। नीतीश सामान्‍यत कुर्ता पजामा धारण करैत छथि। मुदा नरेश क आवास पर मुख्यमंत्री सूट पहिर कए गेलाह। मुख्यमंत्री राजा कए हुनकर विवाह क बाद बिहार एबाक निमंत्रण देलथि। संगहि मुख्यमंत्री भूटान नरेश स बिहार क संस्कृति एक बुझबाक अनुरोध केलथि। राजा स भेंट केलाक बाद मुख्यमंत्री भूटान क आर्थिक मामलाक मंत्री लियोन पो खंडू यांगचुप स भेंट केलथि। भेंट क दौरान पनबिजली परियोजना स बिहार कए बिजली प्राप्त हेबा पर चर्चा भेल।
भूटान क पर्यटक क लेल परिवहन क व्यवस्था करबा मे बिहार पर्यटन विकास निगम आ रायल भूटान पर्यटन काउंसिल अपना मे एक-दोसर कए सहयोग करत। एहि संबंध मे पर्यटन विभाग क प्रधान सचिव दीपक कुमार भूटान क पर्यटन काउंसिल क संग करार केलथि अछि। दूनू संस्था पर्यटन कए बढ़ावा देबा लेल संयुक्त रूप स बाजार सेहो ताकत। थिंपू क तारायाने केंद्र मे सांझखन बिहारी कलाकार सांस्कृतिक कार्यक्रम सेहो प्रस्तुत केलथि।
मिथिलाक जट- जटिन, सीपिया नृत्य आओर शिव स्तुति आओर भोजपुरी झूमर प्रस्तुत कैल गेल। एहि दौरान प्रदर्शनी सेहो लगाउल गेल छल। प्रदर्शनी मे भारी भीड़ देखल गेल। थिंपू क पांच सितारा होटल ताज ताशी मे बिहारी व्यंजन क भोज छल। भोज मे बिहिया पूड़ी, लिट्टी-चोखा, जलेबी आओर रबड़ी सबहक पसंद बनल।
दिन भरि क व्यस्तता क बावजूद ओ बिहारी मूल क लोक सब स गप करबा लेल समय निकालबा मे कोनो कोताही नहि केलथि। ओ थिंपू मे प्रवासी बिहारी लोक स गप करि गदगद भ गेलाह। मुख्यमंत्री कए बताउल गेल जे भूटान मे पैघ संख्या मे बिहारी बसल छथि, जे भूटान क नव निर्माण मे पैघ भूमिका निभा रहल छथि। राजधानी थिंपू आ फुन शो लिंग मे बिहारी व्यवसायी क पैघ पैघ दुकान अछि। भूटान क शाही नाई सेहो बिहार क छथि।

नीक वा अधलाह - ज़रूर कहू जे मोन होय

comments

Comments are closed.