बिजली क्षेत्र मे बिहार कए भेटल ‘महासनेस’

पटना। बिहार कए ऊर्जा क्षेत्र मे केंद्र महासनेस देलक अछि। बिहार मे अल्ट्रा मेगा पावर प्रोजेक्ट लगेबा लेल केंद्र तैयार भ गेल अछि। एहि योजना क तहत चार हजार मेगावाट स बेसी क बिजली उत्पादन केन्द्र बिहार मे स्थापित होएत। इ प्रोजेक्ट नालंदा जिला मे लगबाक संभावना अछि।
केन्द्रीय टीम अल्ट्रा मेगा पावर प्रोजेक्ट लगेबा लेल स्‍थान चयन करबा लेल पटना पहुंचल अछि। टीम क सदस्‍य ऊर्जा विभाग, जलसंसाधन विभाग, भूमि सुधार विभाग आओर बिहार राज्य विद्युत बोर्ड क अधिकारी क संग बैसार क हर संभावना पर मंथन क रहल छथि। स्‍थान चयन लेल दिक्‍कत इ अछि जे एहि प्रोजेक्ट लेल कम स कम 2400 एकड़ भूमि आ 120 क्यूसेक जल चाही। सेटेलाइट क सहयोग स भूमि क तलाश शुरू भ चुकल अछि। संभावना अछि जे जमीन नालंदा जिला मे उपलब्‍ध भ जाएत जाहि ठाम अल्ट्रा मेगा पावर प्रोजेक्ट लगाउल जा सकत। सूत्र कहैत अछि जे नालंदा मे जमीन त उपलब्ध भ जाएत मुदा जल उपलब्ध नहि अछि। विशेषज्ञ मुख्‍य रूप स एहि पर चर्च क रहल छथि। एहन मे एहि पर सेहो विचार भ रहल अछि जे गंगा नदी स नालंदा तक जल ल जाउल जाए जाहि स ओहि ठाम जल उपलब्ध कराउल जा सकए। ओना राज्‍यक अन्‍य स्‍थान पर सेहो जमीन ताकल जा रहल अछि।
मुख्यमंत्री नीतीश कुमार आ ऊर्जा मंत्री बिजेन्द्र प्रसाद यादव अल्ट्रा मेगा प्रोजेक्ट लेल काफी दिन स प्रयास क रहल छलाह। प्रदेश मे बिजली उत्पादन स संबंधित एहन प्रोजेक्ट आइधरि नहि लागल छल। एकरा लेल राज्‍य सरकारक बेगरता एहि स प्रकट होइत अछि जे बिहार इंफ्रास्टक्चर कए भूमि तकबा लेल मात्र एक सप्ताह क समय देल गेल अछि। केन्द्रीय टीम एक मास बाद फेर बिहार क दौरा करत आ पावर प्लांट लेल चयनित स्‍थलक निरीक्षण करत। सूत्रक कहब अछि जे भूमि उपलब्ध भेलाक बाद जल्‍द स जल्‍द इ प्रोजेक्ट बिहार मे लागब शुरू भ जाएत। ज्ञात हुए जे राज्य सरकार कए पिछला मास बाढ़ थर्मल पावर मे 50 फीसदी हिस्सेदारी भेटल आ पिछला सप्‍ताह बरौनी थर्मल लेल कोल लिंक देल गेल। दोसर दिस बिहार सरकार चौसा, बक्सर आ कजरा मे पावर प्लांट लगेबाक तैयारी सेहो शुरू क देलक अछि। ओना एकरा लेल एखन धरि कोल ब्लाक नहि भेटल अछि। बिहार राज्य विद्युत बोर्ड क जनसंपर्क निदेशक हरेराम पाण्डेय क कहब अछि जे अल्ट्रा मेगा पावर प्रोजेक्ट लगलाक बाद प्रदेश क बिजली समस्या एकटा इतिहास बनि जाएत। केन्द्रीय टीम मे केन्द्रीय विद्युत प्राधिकरण क निदेशक पीडी शिवाल, सचिव एमएस पुरी, मुख्य अभियंत अरुण कुमार जैन, पावर फाइनेंस कारपोरेशन क सलाहकार डीके गोल्होत्रा सहित अन्य अधिकारी शामिल छथि।

maithili news, mithila news, bihar news, latest bihar news, latest mithila news, latest maithili news, maithili newspaper

नीक वा अधलाह - ज़रूर कहू जे मोन होय

comments

2 टिप्पणी

  1. नालंदा में कियेक फेर..? की एकर वजह तकनीकी अछि जे ओ झारखंड के कोयला इलाका सं सटल अछि वा नीतीश कुमार के इलाका के वजह से एना..?

  2. bahut neek laagal . apne loknik sampark me rahab aa jatba dhari humra lel shambhav hoyat apne lokni ke kaaj aayab . sadhanyabaad .

Comments are closed.