बांका मेगा थर्मल संयंत्र लेल जमीन तैयार

पटना : बिजली संकट झेल रहल बिहार मे एकटा आओर बिजली घर लगबाक बाट खुजि गेल अछि। जानकारी क अनुसार इ बिजली संयंत्र बांका मे लागत। बिहार विद्युत बोर्ड आ एनटीपीसी मिल कए इ बिजली संयंत्र लगाउत। बांका मे प्रस्‍तावित इ तेसर बिजली घर होएत। एहि स पहिने दूटा निजी कंपनी बिजली संयंत्र लगा रहल अछि। जानकारी क अनुसार चार हजार मेगावाट क्षमता क मेगा सुपर थर्मल पावर केंद्र स्थापित करबा लेल जमीन ताकल जा रहल अछि। एकरा लेल एनटीपीसी पहाड़ी इलाका क 2,440 एकड़ जमीन क मांग केलक अछि। कंपनी एहि संबंध मे एकटा मांग पत्र बांका प्रशासन कए पठेलक अछि। एहि पर प्रशासन ककवारा आ कटोरिया क बीच प्रभावती नगर इलाका क आसपास क जमीन परियोजना लेल उपलब्ध करेबाक निर्णय लेलक अछि। विद्युत बोर्ड आ एनटीपीसी क अधिकारी बुधदिन बांका जा कए प्रस्तावित स्थल क जायजा लेलथि।
सरकारी क्षेत्र क थर्मल पावर स्थापित भेला स एकरा लेल जमीन क अधिग्रहण सेहो सरकारी स्तर स कैल जाएत। विद्युत बोर्ड क अधिकारी क कहब अछि जे बांका मे जमीन भेटला स आब आगू क प्रक्रिया शुरू होएत।
एहि संबंध मे सांसद पुतुल कुमारी कहलथि जे थर्मल पावर केंद्र लगबा स बांका क विकास कए गति भेटत। बांका लेल इ एखन धरिक सबस पैघ उपलब्धि अछि। ओ कहलथि जे बिहार क बिजली संकट दूर करबा लेल विद्युत बोर्ड आ एनटीपीसी मे समझौता भेल अछि। एकरा लेल जे जमीन क जरूरत होएत बांका देबा लेल तैयार अछि। ओ बांका क बेकार पडल पहाड़ी बंजर भूमि पर थर्मल पावर केंद्र बनेबाक प्रस्ताव देलथि अछि। दोसर दिस बांका क भू-अर्जन पदाधिकारी जयश्री ठाकुर कहला जे एहि संबंध मे प्रशासन कए कईटा पत्र भेटल अछि। कटोरिया-चांदन इलाका क जमीन चिन्हित कैल गेल अछि। एनटीपीसी आ विद्युत बोर्ड क टीम प्रस्तावित जमीन क मुआयना केलक अछि। टीम दिस स झंडी भेटला पर जमीन अधिग्रहण क प्रक्रिया शुरू कैल जाएत। ओ कहलथि जे प्रभावती नगर लग कटोरिया मुख्य सड़क पर ढाई हजार एकड़ स अधिक जमीन उपलब्ध अछि। एहि मे रैयती आओर बिहार सरकार दूनू क जमीन अछि। गौरतलब अछि जे एहि ठाम पहिने स निजी क्षेत्र क दूटा कंपनी पावर प्लांट लगा रहल अछि।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna

नीक वा अधलाह - ज़रूर कहू जे मोन होय

comments