बदलत इब्राहिम खां मकबरा क सूरत

भागलपुर । पर्यटन विभाग कए धीरे धीरे बिहारक उपेक्षित स्‍थल दिस ध्‍यान जा रहल अछि। एहि क्रम मे उपेक्षित रहल ऐतिहासिक इब्राहिम खां मकबरा क सूरत बदलबाक प्रयास शुरू कैल गेल अछि। एकरा लेल जिला प्रशासन द्वारा कला संस्कृति आ युवा विभाग कए प्रस्ताव पठाउल गेल छल। प्रस्ताव मे कहलगांव स्थित एएसआइ (आकरेलॉजिकल सर्वे ऑफ इंडिया) क कंजरवेटर स मकबराक तकनीकी आ पुरातात्विक पहलू कए सेहो उभारबाक आग्रह कैल गेल छल। कला संस्कृति आ युवा विभाग एहि प्रस्‍ताव कए मंजूर कए आगूक कार्रवाई लेल काज शुरू करि देलक अछि। जिला पदाधिकारी नर्मदेश्वर लाल क अनुसार ऐतिहासिक स्मारक कए चिह्नित करबाक आ अभिलेखीकरण क लेल गठित समिति क रिपोर्ट क आधार पर अन्य स्मारकक जीर्णोद्धार क प्रस्ताव सेहो राज्य सरकार लग पठाउल गेल अछि। उल्लेखनीय अछि जे इ’समाद विक्रमशिला समेत जिलाक प्रमुख ऐतिहासिक स्थल आ स्मारक क उपेक्षा पर लगातार समाद प्रकाशित करैत आयल अछि। जिला प्रशासन क एहि कदम स स्‍थानीय लोक क संग पूरा बिहार गदगद अछि। सबहक कहब अछि जे चलू देर स सही मुदा ऐतिहासिक स्थल कए चिन्हित करि ओकर अभिलेखीकरण क लेल समिति क गठन करबा लेल आ इब्राहिम खां मकबरा क जीर्णोद्धार लेल जिला प्रशासन आ कला संस्कृति आ युवा विभाग दूनू धन्‍यवाद क प्रात्र अछि।
इतिहासकार क अनुसार इब्राहिम खां मुगल बादशाह जहांगीर क शासनकाल मे बंगाल क गवर्नर छलाह। जहांगीर क पुत्र शहजादा खुर्रम (शाहजहां) जखन अपन पिता क खिलाफ विद्रोह करि देलथि त एहि विद्रोह कए दबेबा लेल सन 1623 मे जहांगीर इब्राहिम खां कए एहि ठाम पठेलथि। इब्राहिम खां क दोसर नाम फतेह जंग सेहो छल। विद्रोह दबेबाक प्रयास मे इब्राहिम खां मारल गेलाह। जहांगीर क सिपहसलार हुनकर सिर मुगल दरबार मे पठेलक, जखनकि हुनकर शरीर कए गंगा क एहि पार जेकरा आब छोटी खंजरपुर क नाम स सब जनैत अछि, ओहि ठाम दफना देलक। हुनकर मजार कए लाल किला क दीवान-ए-खास क भांति भव्य बनाउल गेल छल। निर्माण क बाद स एखनधरि मात्र एक बेर सन 1845 मे एकर मरम्मत भेल अछि। ओकर बाद स इ ऐतिहासिक इमारत क उपेक्षा कैल जाइत रहल अछि। देखरेख क अभाव मे इ इमारत जर्जर भ चुकल अछि।
आइ उपेक्षाक कारण स मकबरा क चारू दिस अतिक्रमण भ चुकल अछि। एकर दीवार क संग लोक घर तक बना लेने अछि। जिलाधिकारी लाल एकरा अतिक्रमण मुक्त करबाक जिम्मेदारी अपर समाहर्ता कए सौंपलाह अछि। अपर समाहर्ता कहला जे ओ सदर अनुमंडलाधिकारी कए अतिक्रमण हटेबा लेल दिशा-निर्देश देलथि अछि। मकबरा कए अतिक्रमण मुक्त करबा लेल आ ओकर सौंदर्यीकरण करबा लेल जल्द काज शुरू होएत।

नीक वा अधलाह - ज़रूर कहू जे मोन होय

comments

1 टिप्पणी

  1. ओ समय कहिया आओत जखनि मधुबनीमे अवस्थित भौआडाक किला आ राजनगर आ मधुबनी जिलाक पुरातत्व सँ जुडल वस्तु पुरातत्व विभागक संरक्षण पाओत कारण नहि तँ मिथिलाक इतिहासक चिह्न अतिक्रमण भ जा रहल अछि आ भ जाएत । ई समादकेँ मैथिली आ मिथिलाक प्रति जे चिन्तन देखैत छी ओ मोनकेँ प्रसन्न क दैत अछि धन्यवाद एहि टीमकेँ ।

Comments are closed.