पटना मे शुरू भेल पहिल विश्व महिला कबड्डी प्रतियोगिता

0
44

पटना | पटना क नवनिर्मित कंकड़बाग स्थित पाटलिपुत्र स्पोर्ट्स कॉम्पलेक्स मे पहिल विश्व महिला कबड्डी प्रतियोगिता प्रारंभ भ गेल। एकर उद्घाटन मुख्यमंत्री नीतीश कुमार केलथि। एहि प्रतियोगिताक संग पटना विश्‍वस्‍तरीय प्रतियोगिताक आयोजन करनिहार शहरक सूची मे शामिल भ गेल। इ प्रतियोगिता चार मार्च तक चलत। एहि प्रतियोगिता मे कुल 16टा टीम भाग ल रहल अछि। उद्घाटन कार्यक्रम क दौरान रंगारंग कार्यक्रम पेश कैल गेल। एहि मौका पर भारतीय वायु सेना क महिला पैराट्रपर्स सब हैरतअंगेज प्रदर्शन देखेलथि। एहि कार्यक्रम क सीधा प्रसारण डीडी स्पोर्ट्स पर कैल गेल। राज्य कबड्डी संघ क सचिव कुमार विजय कहला जे भारतीय एमेच्योर कबड्डी महासंघ, एशियाई कबड्डी महासंघ आओर अंतर्राष्ट्रीय कबड्डी महासंघ क तत्वावधान मे आयोजित एहि प्रतियोगिता क सबटा मैच दूधिया रोशनी आओर सिंथेटिक मैट पर खेलल जाएत। विजय कहला जे सबटा टीम कए चार पुल मे बांटल गेल अछि। पूल-ए मे भारत, कोरिया, चीनी ताइपे आ मेक्सिको कए राखल गेल अछि, जखनकि पूल-बी मे थाईलैंड, जापान, तुर्किस्तान आ कनाडा कए सम्मिलित कैल गेल अछि। पूल-सी मे बांग्लादेश, श्रीलंका, मलेशिया आओर इटली क टीम अछि, जखनकि पूल-डी मे ईरान, इंडोनेशिया, नेपाल आओर अमेरिका कए राखल गेल अछि। एकर समापन चार मार्च कए होएत। ओहि दिन पुरस्कार वितरण सेहो कैल जाएत।

Please Enter Your Facebook App ID. Required for FB Comments. Click here for FB Comments Settings page