पटना मेट्रो लेल बनत फिजिबिलिटी रिपोर्ट

पटना । पटना मे मेट्रो रेल क निर्माण लेल कैल जा रहल प्रयास आखिरकार किछु आगू बढल। योजना आयोग आ राज्‍य सरकारक बीच भेल बैसार क बाद इ तय भेल अछि जे पटना मे मेट्रो भ सकैत अछि। योजना आयोग क सलाहकार गजेंद्र हल्दिया आओर रवि मित्तल पटना कए मेट्रो रेल लायक शहर मानबा लेल तैयार भ गेलाह। राज्य सरकार क अधिकारीक संग भेल बैसार मे इ तय भेल अछि जे पटना मे मेट्रो रेल परियोजना लेल फिजिबिलिटी रिपोर्ट तैयार हेबाक चाही, जेकरा लेल एहि मास मे कहियो निविदा आमंत्रित कैल जाए। योजना आ विकास विभाग क प्रधान सचिव विजय प्रकाश क अनुसार पटना मे मेट्रो रेल परियोजना पीपीपी मोड मे बनत आ एकरा लेल फिजिबिलिटी रिपोर्ट छह मास मे तैयार करि लेल जाएत। ओकर बाद आगूक काज लेल निविदा आमंत्रित कैल जाएत। ओना बिहार सरकार एहि परियोजना लेल किछु काज पहिनो स केने अछि। पटना मे मेट्रो रेल परियोजना क डीपीआर तैयार करबा लेल दिल्ली मेट्रो रेल 10 लाख टका प्रति किलोमीटर क दर स 2.5 करोड़ क मांग बिहार सरकार स केने छल। एकर बाद विभाग अपन स्‍तर पर किछु परिकल्‍पना सेहो तैयार केने अछि। नगर विकास विभाग क अधिकारी क कहब अछि जे विभाग पटना मे मेट्रो रेल परियोजना लेल किछु परिकल्पना तैयार केने अछि। पटना सिटी स दानापुर तक लगभग 25 किलोमीटर स बेसी लेबा मेट्रो रेल क योजना सरकार बनेने अछि। एकर अलावा दानापुर क सगुना मोड़ स अशोक राजपथ होइत सेहो एकटा मेट्रो लाइन बिछेबाक योजना तैयार अछि। एहि परिकल्‍पनाक अनुसार दीघा मे मेट्रो क जंकशन होएत आ मेट्रो रेल लाइन कए कंकड़बाग स सेहो जोडल जाएत। अधिकारीक कहब अछि जे एहि परिकल्‍पना मे किछु जमीनी समस्‍या अछि जेकरा ल कए विभाग मंथन कए रहल अछि आ नबका फिजिबिलिटी रिपोर्ट क बाट ताकि रहल अछि जे एहि समस्‍या स ओ कोना निपटैत अछि। अधिकारीक अनुसार मेट्रो लेल सबस कठिन आ व्‍यस्‍त मार्ग अशोक राजपथ होएत। एहि सडक पर इंजीनियरिंग कॉलेज मोड़ स सुल्तानगंज तक जमीनक घोर अभाव अछि। एहन मे एहि ठाम कम स कम 20 स 30 फुट ऊंचाई स मेट्रो कए आगू ल जेबाक व्‍यवस्‍था करए पडत। ओना एतबा त आब तय अछि जे देर सबेर पटना मे मेट्रो चलत आ शहरवासी कए जाम क समस्या स काफी हद तक छुटकारा भेट जाएत।

नीक वा अधलाह - ज़रूर कहू जे मोन होय

comments