नालंदा क समतुल्‍य होएत बलिराजगढ

चंद्रधारी संग्रहालय कए भेटल अंतरराष्‍ट्रीय पहचान
दरभंगा/मधुबनी ।
बलिराजगढ आ नालंदा दूनू बिहार लेल महत्‍वपूर्ण अछि, दूनू पर सरकार क ध्‍यान अछि । सरकार लेल बलिराजगढ आ नालंदा समतुल्‍य अछि। इ कहब अछि मुख्‍यमंत्री क सांस्‍कृतिक सलाहकार पवन वर्मा क । दू दिनी यात्रा पर दरभंगा प्रमंडल पहंचल श्री वर्मा बलिराजगढ समेत कईटा महत्‍वपूर्ण स्‍थलक भ्रमण केलथि। श्री वर्मा कहला जे 70 क दशक मे बलिराजगढ कए पुरातत्‍व विभाग अपन अधीन केने छल, मुदा एखन धरि एकर सही प्रकार स उत्‍खनन नहि कैल गेल अछि। श्री वर्मा कहला जे अगर एकर सही प्रकार स उत्‍खनन कैल जाए त नालंदा त बड नव मिस्र क सभ्‍यता तक एकरा स पुरान नहि रहत। इ दुनिया क ज्ञात इतिहास कए बदलि सकैत अछि। ओ कहला जे मुख्‍यमंत्री खुद एहि स्‍थान क भ्रमण क चुकल छथि आ हुनक निर्देश पर ओ बलिराजगढ भ्रमण करबा लेल आयल छथि। श्री वर्मा कहला जे मिथिला क संस्‍कृति गौरवशाली रहल अछि आ एकर संरक्षण हर हाल मे कैल जाएत । मधुबनी क कईटा गाम आ स्‍थान क भ्रमण केलाक बाद श्री वर्मा दरभंगा क चंद्रधारी संग्रहालय देखबा लेल पहुंचलाह । संग्रहालय देखलाक बाद ओ कहला जे पटना संग्रहालय क बाद राज्‍य मे दोसर सबस पैघ संग्रहालय दरभंगा क चंद्रधारी संग्रहालय कए अंतरराष्‍ट्रीय पहचान देल जाएत । राज्‍य सरकार एकरा लेल प्रयास शुरू क देलक अछि । श्री वर्मा कहला जे ओ एकर ब्‍लू पिंट तैयार क मुख्‍यमंत्री लग प्रस्‍तुत करताह । श्री वर्मा कहला जे एहि संग्रहाल मे बहुत रास एहन वस्‍तु अछि जेकरा देखबा लेल देश नहि बल्कि विदेश स लोक आउत । पदभार ग्रहण केलाक बाद पहिल बेर दरभंगा आयल श्री वर्मा चंद्रधारी संगहालय कए एक एक टा वस्‍तु क गहन छानबीन केलथि । हुनक जिज्ञासा पुरान पाथर क मूर्ति मे विशेष रूप स छल । ओ बलिराजगढ स संबंधित वस्‍तु क जानकारी सेहो चाहैत दलाह। मुदा ओ इ जानि काफी दुखी भेला जे मूर्ति क दानदाता क नाम क उल्‍लेख अछि मुदा मूर्तिक संबंध मे कोनो जानकारी नहि अछि, जाहि स ओकर महत्‍व क पता नहि चलि पाबि रहल अछि । ओ राज दरभंगा क पुरान कीर्ति सब देख अचंभित भेलाह, खास क सिक्‍की स बनल ताजमहल कए ओ बेर बेर निहारलाह । क्‍यूरेटर शम्‍स अबरार हुनका इ जानकारी सेहो देलथि जे संग्रहालय मे कईटा कोठरी कई साल स बंद अछि आ ओहि बंद कोठली मे सेहो कईटा धरोहर अछि । एहि जानकारी पर आश्‍चर्य व्‍यक्‍त करैत श्री वर्मा कहला जे बंद कोठली कए यथाशीघ्र खोलेबाक प्रयास कैल जाए आ संग्रहालय मे राखल सब वस्‍तु क ढंग स प्रदर्शन करबाक व्‍यवस्‍था कैल जाए । ओ कहला जे एहि ठाम जेतबा संग्रह अछि ओ पर्यटक कए दरभंगा ऐबा लेल बाध्‍य क देत, बस जरूरत अछि एकरा सही प्रकार स प्रदर्शित कैल जाए जाहि लेल ओ एकटा ब्‍लू प्रिंट तैयार क रहल छथि । श्री वर्मा क संग पूर्व विधान पार्षद संजय झा सेहो छलाह ।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर

नीक वा अधलाह - ज़रूर कहू जे मोन होय

comments