हाजिर छी हम : भविष्‍य काल स वर्तमान काल तक क यात्रा

1
18


विशेष संपादकीय / सुषमा
इ समाद आइ एक साल आओर पूरा करि लेलक। निश्चित रूप स जखन इ शुरू केने रहि त एकटा सपना देखने रहि आ लोक कए सेहो सपना देखेबाक कोशिश केने रहि। बिहार मे समाचारक नाम पर केवल घोटाला, अपराध आ राजनीतिक आरोप-प्रत्‍यारोप छपैत छल। अखबार एकटा धंधा बहुत पहिने बनि गेल अछि एहन मे बिहारक किछु पत्रकार क इ दावा जे बिहार मे खून बिकाइत अछि आ अखबारक प्रसार बढेबा लेल अपराध कए प्रमुखता देब मजबूरी अछि, हमरा सब कए स्‍वीकार नहि छल। टुटल सडक, अपराध आ असभ्‍य समाज बिहार क नाम पर दुनियाक सामने परोसल जा रहल छल। कोनो समाज मे नीक आ अधलाह दूनू क्रिया होइत अछि, मुदा बिहार एकटा पैघ समय एहन देखलक जाहि मे ओकर नीक काज दिस कियो देखबाक कोशिश नहि केलक। समाचाक अर्थ स देखल जाए त सामान्‍य भ चुकल घटना समाचार नहि मानल जाइत अछि। जेना कुत्‍ता आदमी कए कटलक समाचार नहि कहल जाइत अछि, मुदा आदमी कुत्‍ता कए कटलक इ समाचार कहल जा सकैत अछि। बिहार मे अपराध, घोटाला आ रंगदारी सामान्‍य घटना भ गेल छल। एहन मे अगर कतहु एहि स विपरित काज भ रहल छल त ओ हमरा सब लेल समाचार भ गेल छल। बदलाव क आहट स सुनि रहल छलथि, मुदा विश्‍वासक कमी सबहक कलम रोकि दैत छल। इ एकटा जुआ जेकां छल। एक टा सपना जेकां छल। आखिर भविष्‍य की होएत ओकर प्रमाणिता त समय क संग भेट सकैत अछि आ कोनो काज या योजना एक दिन मे जमीन पर नहि आबि सकैत अछि। समाद परिवार इ सपना देखलक आ सपना पर विश्‍वास केलक जे बिहार मे बदलाव भ रहल अछि। जेना जेना घोषणा जमीन पर उगैत गेल, इसमाद क विश्‍वसनीयता बढैत गेल। आइ हम इ कहबा लेल तैयार छी जे हम सबटा गप भविष्‍य काल मे नहि वर्तमान काल मे सेहो क रहल छी। एकटा समय एहन जरूर छल जखन मे लिखबा लेल मजबूर छलहुं जे ”होएत”, मुदा आइ ओहि स स बहुत ”भ गेल” तक पहुंच चुकल अछि। ”होएत” स ”भ गेल” तक पहुंचबाक गति जरूर मध्‍यम रहल, मुदा ओ झूठ नहि छल। सबटा सपना सच नहि भेल मुदा सपना किछु एहनो रहल जे सच भ सामने अछि। आइ बिहार क अखबार मे योजना पहिल पन्‍ना पर जगह पाबि रहल अछि। अखबारक प्रसार बढि रहल अछि। निश्चित रूप स बिहार मे केवल खून नहि बिकाइत अछि।अपराध आ राजनीति कोनो समाजक एकटा अभिन्‍न अंग अछि। ओकर बिना कोनो समाजक कल्‍पना करब बेमानी अछि। बिहार मे सेहो अपराध आ राजनीति समाचारक महत्‍पूर्ण हिस्‍सा अछि। मुदा आजुक अखबार एकरा नजरअंदाज क रहल अछि। सरकारक पैघ स पैघ गलती बिहारक अखबार स ओहिना गायब अछि जेना पहिने सरकारक पैघ स पैघ उपलब्धि गायब छल। इसमाद समय समय पर सरकार क नीति क आलोचना करैत रहल अछि, जे आगू सेहो जारी रहत। मुदा सरकारक आलोचना क बीच ओ उपलब्‍धि कए नजर अंदाज नहि कैल जा सकैत अछि जे बिहारक समाज अर्जित क रहल अछि। औद्योगिकीकरण क मोर्चा पर छोट सन मुदा दूरगामी सफलता बिहार कए एहि साल भेट रहल अछि। इ एकटा एहन क्षेत्र अछि जाहि मे एखनो एकर गति स बेसी एकर सक्रियता पर बहस हेबाक चाहि। जाहि ठाम उद्योग लागब एकटा सपना भ गेल छल ओतहि कईटा इकाइ उत्पाद शुरू करबाक तैयारी मे आबि चुकल अछि। ब्रिटेनिया आओर बंसल बिस्किट्स क अनमोल ब्रांड बनब एहि मास स शुरू भ गेल अछि। पार्ले-जी बिस्कुट क उत्‍पादन सेहो शुरू भ गेल अछि। बांका में बिजली क एकटा निजी इकाई एहि साल स उत्पादन शुरू करत। एकर अलावा दूटा चीनी मिल आ किछु फूड प्रोसेसिंग क इकाइ सेहो एहि साल स उत्‍पादन शुरू क रहल अछि। रोहतास मे रूचि सोया अपन वेजिटेबुल आयल इकाई में मार्च तक उत्पादन शुरू करत। आरा में लागल सुमन एग्रोटेक क इकाई सेहो उत्‍पादन शुरू करबाक घोषणा क देलक अछि। बांका में ‘जास इंफ्रास्ट्रक्चर’ द्वारा शुरू कैल जा रहल विद्युत प्लांट क 660 मेगावाट मे स 500 मेगावाट बिहार कए भेटत। एहि स राज्‍य मे बिजली संकट त दूर नहि होएत मुदा किछु सुधार जरूर होएत। चीनी निगम क बंद पडल सुगौली आ लौरिया मे उत्‍पादन शुरू भ चुकल अछि। साल क अंत तक रैयाम आ सकरी चीनी मिल में सेहो उत्पादन शुरू भ सकैत अछि। एहन मे कहल जा सकैत अछि जे पिछला किछु साल मे हम बिहारक ओ भविष्‍य देखेबा मे बहुत हद तक सफल भेलहुं अछि जे वर्तमान मे अहां देख रहल छी।

Please Enter Your Facebook App ID. Required for FB Comments. Click here for FB Comments Settings page

1 COMMENT

Comments are closed.