दोनार ओवरब्रिज क बाट साफ, अगिला साल शुरू होएत निर्माण

नई दिल्‍ली। पटना स ल कए दिल्ली तक भेल निरंतर प्रयास क बाद बाद आखिरकार दरभंगा क दोनार चौराहा पर चारिमुहानी रेल ऊपरि पुल क बाट साफ भ गेल। इ ऊपरि पुल पटना क बाद बिहार क कोनो आन शहर मे प्रस्‍तावित दोसर चारिमुहानी रेल ऊपरि पुल होएत। नगर विधायक संजय सरावगी मंगलदिन दोनार ऊपरि पुल क निर्माण अगिला वित्‍त वर्ष मे शुरू भ जेबाक जानकारी देलथि। ओ कहला जे एकरा राज्‍य सरकार पहिने पास क चुकल छल आब रेलवे सेहो एकरा स्वीकृति प्रदान क देलक अछि। इ सेहो लगभग तय अछि जे एहि ऊपरि पुल क निमार्ण बिहार सरकारक पुल निर्माण निगम करत आ एहि लेल निगम डीपीआर तैयार क रहल अछि। आब इ तय भ गेल जे जल्द रेलवे क्रासिंग आ दोनार मे लागि रहल जाम स शहरवासी कए छुटकारा भेट जाएत।
इ शहर क एकटा ज्वलंत समस्या मे स एक छल। दोनार मे रेल ऊपरि पुल लेल प्रयास त लगभग दू दशक स भ रहल छल, मुदा एकरा मुकाम तक पहुंचेबा में नगर विधायक संजय सरावगी आ सांसद कीर्ति आजाद अहम भूमिका निभेलथि अछि। सूत्र स भेट रहल जानकारी क अनुसार एहि ओवरब्रिज लेल 32 करोड़ 53 लाख क प्रस्ताव अछि ओना एकर पुष्टि नहि भ सकल अछि। श्री सरावगी एहि संबंध मे कहला इ ऊपरि पुल केतबा मे बनत इ त पता नहि मुदा इ दू कात नहि बल्कि चारि कात खसत। पूर्व मे छपकी त पश्चिम मे नाका-5 दिस, उत्‍तर मे हॉलीक्रास त दक्षिण मे बेता दिस खसत। एहि प्रकार स दोनार चौराहा पर पटनाक मीठापुर ऊपरिपुल जेकां एकटा पैघ चौराहा क निर्माण होएत। श्री सरावगी एहि आशंका कए सेहो दूर केलथि जे एहि पुल क चौडाई कटहलबाडी मे बनल पुल सन होएत। नगर विधायक कहला जे इ ऊपरि पुल दू लेनक होएत आ कहटलबाडी स लगभग दोगुना चौडा होएत। ज्ञात हुए जे दोनार क पूर्वी आ पश्चिमी हिस्‍सा मे काफी दूर तक घन आबादी भ चुकल अछि। रेलवे फाटक स लकए माछ बाजार तक काफी कम चौडा सडक अछि, कईटा मकान सेहो अतिक्रमण केने अछि। कुल मिला कए दोनार चौराहा क आसापास रेलवे लाइन क एहि पार कईटा डायट, कई नामी-गिरामी इंगलिश मीडियम स्कूल आ बाजार भेला स जाम क समस्‍या बिकराल भ चुकल अछि आ दोनार भ कए यात्रा करब दिन-ब-दिन दुष्कर होइत जा रहल अछि। एहि संबंध मे इ’समाद समय समय पर लिखैत रहल अछि आ नगर विधायक इ साफ क देलाह अछि जे ओवरब्रिज क बाट मे आबि रहल सबटा बाधा दूर भ चुकल अछि अगिला वित्‍तवर्ष मे शासन स धन अवमुक्त होइत देरी एहि ठाम निर्माण कार्य शुरू भ जाएत।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna

नीक वा अधलाह - ज़रूर कहू जे मोन होय

comments

2 टिप्पणी

  1. Esamaad Team- Sakri-Laukaha-Nirmali broad gauge conversion kahya complete hoyte. Ehi par agar prakash dalito te badhya hoaite.

  2. Darbhanga shahar me rahnihar lok sabh ke jaam sa mukti diyeba lel overbridge jaroori achhi. Jainagar sahar ke pravesh par seho ekta overbridge ke avasyakta achhi.

Comments are closed.