दार्शनिक क जन्म स्थली अछि मिथिला : सिंह

0
14

दरभंगा मे भेल दी इंडियन फिलॉशोफिल कांग्रेस क 87म कांग्रेस
दरभंगा।
लनामिवि क कुलपति डा. एसपी सिंह कहला अछि जे जनक, याज्ञवल्क्य आ विद्यापति सन अनेक दार्शनिक क जन्म स्थली मिथिला रहल अछि। महान दार्शनिक बुद्ध क बिहार क धरती पर नालंदा आ विक्रमशिला सन विवि छल। कुलपति डा.सिंह उक्त गप दरभंगा मे आयोजित दी इंडियन फिलॉशोफिल कांग्रेस क 87म कांग्रेस क उदघाटन सत्र कए संबोधित करैत कहला। ओ कहला जे शिक्षणगण छात्र कए विषयवस्तु क जानकारी देबाक संगहि हुनका स्वाध्याय लेल उत्प्रेरित करथि। प्रतिकुलपति डा. ध्रुव कुमार कहला जे सूचना क्रांति क दौर मे हम नैतिकता स समझौता करबा लेल बाध्य भ गेल छी। फलत: गुणवत्तापूर्ण शिक्षा मे गिरावट आबि गेल अछि। एहन स्थिति मे दर्शनशास्‍त्री क भूमिका महत्वपूर्ण भ जाइत अछि।
इंडियन इंस्टीट्यूट आफ एडवांस स्टडीज क पूर्व निदेशक प्रो.भुवन चंदेल अपन संबोधन मे क क्रम मे जनक, याज्ञवल्क्य, गणेश उपाध्याय आ मंडल मिश्र आदि दार्शनिक क चर्चा करैत कहला जे मिथिला क धरती पर दर्शन क अध्ययन लेल पहुंचनिहार एहि ठामक भ कए रहि गेल। इंडियन फिलॉसोफिकल कांग्रेस क चर्चा करैत प्रो.चंदेल कहला जे एकर शुरुआत विश्वकवि रविंद्र नाथ टैगोर आ सर्वपल्ली राधाकृष्णन केने छलाह। ओ आयोजन पर प्रसन्नता व्यक्त करैत मिथिला क लोकक प्रति आभार प्रकट केलथि।
इंडियन फिलासाफिकल कांग्रेस क अध्यक्ष आ रामकृष्ण मिशन विवेकानंद कालेज चेन्नई मे दर्शनशास्त्र क विभागाध्यक्ष रहि चुकल डा.टीएन गणपति अपन अध्यक्षीय संबोधन मे कहला जे आइ शिक्षक लग समय आ धन क कमी नहि अछि, मुदा ओ एकर सदुपयोग नहि क पाबि रहल छथि। हुनकर कहब छल जे नव लोक क कर्तव्य अछि जे ओ पुरान पीढ़ी क दार्शनिक क अनुभव स सीख लथि। एकरा लेल अध्ययन क आदत लगेबाक चाही। विधान पार्षद डा. विनोद कुमार चौधरी कहला जे मिथिला क संस्कृति अपूर्व अछि। ओ कहला जे एहि कांग्रेस क माध्यम स छनिकए आबि रहल गप पर राज्य सरकार अमल करत।
धन्यवाद ज्ञापन करैत कुलानुशासक डा. टीएन झा कहला जे प्रत्येक वैज्ञानिक मूलत: दार्शनिक होइत अछि। विवि क दर्शनशास्त्र क विभागाध्यक्ष डा.सतीश चंद्र मिश्रा पाहुनक स्वागत मिथिला क परंपरा क मुताबिक केलथि। कार्यक्रम क संचालन विश्‍वविद्यालयक प्रख्‍यात मंच संचालक डा.पुतुल सिंह केलथि।

maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna

Please Enter Your Facebook App ID. Required for FB Comments. Click here for FB Comments Settings page