दरभंगा मेडिकल कॉलेज मे पीजी डिग्री क सीट बढल

दरभंगा। प्रदेश मे आब विशेषज्ञ डॉक्टर क कमी नहि रहत। केंद्र सरकार राज्य क पांचटा मेडिकल कॉलेजों क पीजी डिग्री क सीट मे वृद्धि करबाक स्वीकृति द देलक अछि। एहि मेडिकल कॉलेज मे पीजी क 185टा सीट मे वृद्धि तय भ गेल। इंफ्रास्ट्रक्चर क लेल 70.17 करोड़ टका सेहो भेटत। एहि मे प्रदेश सरकार कए 25 प्रतिशत राशि खर्च करबाक अछि। प्रदेश सरकार क आग्रह पर वर्ष 2009 मे मेडिकल काउंसिल ऑफ इंडिया क टीम मेडिकल कॉलेज क निरीक्षण केने छल। दरभंगा मेडिकल कॉलेज अस्पताल कए 15 विभाग मे पीजी डिग्री क 39टा सीट क वृद्धि कैल गेल अछि। एहि कॉलेज क शिशु रोग, एनाटॉमी, पीएसएम आ स्त्री रोग आओर प्रसूति विभाग मे चारि-चारि टा सीट क स्वीकृति भेटल अछि। फिजियोलॉजी, फर्माकॉलोजी, रेडियोडायग्नोसिस, फोरेन्सिक मेडिसीन आ शिशुरोग विभाग मे दू-दू टा सीट क वृद्धि भेल अछि। बायोकेमेस्ट्री, मनोचिकित्सा, माइक्रोबायोलॉजी आ सर्जरी विभाग मे एक-एक टा सीट क स्वीकृति देल गेल अछि। एनेस्थेसिया विभाग क पीजी डिग्री मे तीनटा सीट क वृद्धि भेल अछि। इंफ्रास्ट्रक्चर क लेल 7.09 करोड़ राशि भेटल अछि। एसके मेडिकल कॉलेज मुजफ्फरपुर क 12टा विभाग मे पीजी डिग्री क 26टा सीट पर नामांकन क स्वीकृति देल गेल अछि। इंफ्रास्ट्रक्चर क लेल एकरा 18.12 करोड़ टका भेटल अछि। जेएन मेडिकल कॉलेज भागलपुर क 14टा विभाग मे 58टा सीट क वृद्धि भेल अछि। एहि कॉलेज कए 23.49 करोड़ राशि क स्वीकृति देल गेल अछि। नालंदा मेडिकल कॉलेज पटना क 16टा विभाग मे 58टा सीट क वृद्धि भेल अछि। एहि कॉलेज कए 18.78 करोड़ भेटल अछि। पीएमसीएच क तीनटा विभाग मे मात्र चारि टा सीट क वृद्धि भ सकल अछि। एहि कॉलेज कए 2.69 करोड़ भेटल अछि। दरभंगा मेडिकल कॉलेज क प्राचार्य डा. एसएन सिन्हा कहला जे बढल सीट पर नामांकन क प्रक्रिया अगिला सत्र स शुरू होएत।

नीक वा अधलाह - ज़रूर कहू जे मोन होय

comments